प्रकाशितवाक्य 14

आजाद लौका चे गीत

1 # प्र.वा 7:3 बल्ति मैं ङेखले कि माये सामणे सिय्योन पहाड़ा उपर मैमणे भिले। ते ओचे लारे हेक लख चवालीस हजार बन्दी छी वांचे मत्था उपर ओचे ते ओचे ब़ा चे नां लिखले आले छै।

2ते स्वर्ग़ कनु मैं हेक इसड़ा शब्द सुणला, जको पाणीया चा पछाड़ा ते बदला चे गरजणे ची अवाजी आलीकर हुता। ते जको शब्द मैं सुणला, ओ इसड़ा हुता, मनाकि वीणा बजाणे आले जिंवे वीणा बजावी पले। 3ते वे सिंहासन चे सामणे ते चऊं जीते जींया ते प्राचीना चे सामणे हेक इसड़े नवें गीत गावी भिलते, जको हेक लख चवालीस हजार बन्दा चे सिवाय जको धरती कनु मोल गेहती कर छुड़ाली गेली हुती सेर्फ वानु छोड़ती कर नेरे कुई वी ऊं गीत ना सीख सग़ले।

4ये वे बन्दी छी यांणे कुई असतरी लारे आपणे आप नु गन्दे कोनी करले। कांकि वे कुंवारे हुते, ते जिठे-किठे मैमणे जते, वे बन्दी ओचे भांसु टुरती पड़ती। सारी इन्सानी जाति कनु मोल गेहती कर छुड़ाती गेले ते। वे नरीकारा चे ते मैमणे चे वास्ते रहड़ी चे पेहले फल हुते। 5वाणे कङी वी कूड़ कोनी मारले हुते, वे बेकसूर हुते।

तीन स्वर्ग़दूत

6बल्ति मैं हेक नेरे स्वर्ग़दूता नु आसमाना चे आधे मां उङरते हुले ङेखले, जाये कनु धरती उपर रेहणे आला ची हर-हेक जाति, ते कोल्‍ल, ते भाषा, ते लौका नु सुणावणे वास्ते सनातन सुसमाचार हुता। 7ते ओणे बङी अवाजी लारे केहले, “नरीकारा कनु ङरा ते ओची स्तुति करा। कांकि ओचे न्यां करने चा समय आती गेला, ते भज़न गांवा, ते जेह्णे स्वर्ग़ ते धरती ते समुन्दर ते पाणीया चे सोते बणाले।”

8 # प्र.वा 18:2 बल्ति ऐचे बाद हेक नेरा, ङुजा, स्वर्ग़दूत ईं केहता हुला आला, “ढेती गेला, ओ बङा बेबीलोन शहर ढेती पला, जेह्णे आपणे व्यभिचार ची भयानक मदिरा सारीया जातिया नु पिलाली।”

9बल्ति तीजा स्वर्ग़दूत बङी अवाजी लारे हा केहता हुला आला कि, “जको कुई ओ ङरावणे ढौरा ची ते मूर्ति ची पूजा करे, ते आपणे मत्थे जा आपणे हाथा उपर ओची मौहर ची छाप लवावी, 10ते ओ नरीकारा चे गुस्से ची मदिरा जको मुंगरा मां नाखली गेली पीयें, ते पवित्र स्वर्ग़दूता चे सामणे, ते मैमणे चे सामणे जाखते ते गन्धक चे दर्दा मां पड़ला रिही। 11ते वांचे दर्दा चा धूंआ हमेशा तक चवीता रिही, ते जको ओ ङरावणे ढौरा ची ते मूर्ति ची पूजा करी, ते जको ओचे नांवा ची मौहर लवावे, वानु रात-ङिओ चैन नी मिली।” 12पवित्र लौका चा सब्र ऐचे मां छै, जको नरीकारा ची आज्ञा नु मने, ते ईशु उपर विश्‍वास राखी।

13ते मैं स्वर्ग़ कनु हा शब्द सुणला कि, “लिखती गे, जको बन्दी प्रभु मां मरली, वे हमा कनु धन्‍न छी।”

आत्मा किहे, “हां, हाओ ठीक छै। वानु आपणी मेहनत करने उपर हमा आराम मिली कांकि वांचे कर्म, वांचे लारे छी।”

धरती ची रहड़ बाढणी

14बल्ति मैं ङेखले कि माये सामणे ओठे हेक चिट्टा बदल हुता। ते ओ बदला उपर हेक बन्दे ब़ेहले हुते जको इन्साना चे पूता आलीकर ङिसे पलता। जाये ठोङा उपर सोने चा मुग़ट ते हाथा मां तेज धारी ची ङातरी छै। 15बल्ति हेक नेरे स्वर्ग़दूता ने मन्दरा महु निकलती कर ओनु, जको बदला उपर ब़ेहला हुता, बङी अवाजी लारे केहले, “आपणी ङातरी चती कर रहड़ी नु बाढणे ची तियारी कर, कांकि रहड़ बाढणे चा समय आती गेला। ऐवास्ते कि धरती ची रहड़ पकती चुकली।” 16तां जको बदला उपर ब़ेहला हुता, ओणे आपणी ङातरी चलाली ते धरती ची रहड़ बाढती गेली।

17बल्ति हेक नेरा स्वर्ग़दूत मन्दरा महु निकड़ला, जको स्वर्ग़ा मां छै, ते ओचे कनु वी तेज धारी ची ङातरी हुती।

18बल्ति हेक नेरा स्वर्ग़दूत, जानु जाखते उपर अधिकार हुता, वेदी महु निकड़ला, ते जाये कनु तेज धारी ची ङातरी हुती, ओनु ऊंची अवाजी लारे केहले, “आपणी तेज धारी ची ङातरी लारे धरती चे अंगूरा चे ग़ुच्छे बाढती गे, कांकि यिचे अंगूर पकती चुकले।”

19ते ओ स्वर्ग़दूता ने धरती उपर आपणी ङातरी चलाली, ते धरती चे अंगूरा नु बाढती कर वानु नरीकारा चे खतरनाक गुस्से चे बङे कुण्डे मां नाखती ङिले। 20#प्र.वा 19:15अंगूरा नु शहरा चे ब़ाहरु ओ कुण्डे मां निचोड़ती गेले, ते ओ कुण्डे महु इतने लुहीं निकड़ले कि जितनी घोड़ा ची लगाम रिहे वांची बराबरी तक पुज़ती गेले ते लगभग तीन साऔ किलोमीटर तक बेहती गेले।

Currently Selected:

प्रकाशितवाक्य 14: ODR

Highlight

Copy

Compare