प्रकाशितवाक्य 15

आखरी विनाश चे स्वर्ग़दूत

1बल्ति मैं स्वर्ग़ा मां बङा ते अचम्भे चा चैन्ह ङेखला, यानिकि सात स्वर्ग़दूत जाये कनु सात भांसलीया आफता हुतीया, कांकि वांचे हुती जाणे उपर नरीकारा चे गुस्से चा अन्त छै।

2बल्ति मैं हेक शीशे जिसड़ा समुन्दर ङेखला, ओ यूं हुता जिंवे ओचे मां जाखते मिड़ले आले हो, ते ओ ङरावणे ढौरा उपर, ते वे मूर्ति उपर, ते ओचे नांवा चे अंक उपर जीतले हुते, वानु मैं शीशे चे समुन्दरा चे गोढु नरीकारा ची वीणा नु चली भि ले ङेखले। 3वे नरीकारा चे दास मूसा चे गीत ते मैमणे चे गीत गावी भिलते,

ते किही भिलते कि “हे सर्वशक्‍तिमान प्रभु नरीकार, दुधी कामे बङी छी,

ते अचम्भे ची छी, ओ युग-युग चा राजा, दुधी चाल सच्‍ची ते ठीक छै।

4हे प्रभु दुधे कनु कूण नी ङरी? ते दुधे नांवा ची महिमा कूण नी करी?

कांकि सेर्फ तु ही पवित्र छी, ते सारीया जातिया आती कर दुधे सामणे ङण्डवत करे, कांकि दुधे न्यां चे काम उजागर हुती गेले।”

5ते ऐचे बाद मैं ङेखले कि, स्वर्ग़ा मां वायदे चे तम्बूआ चा मन्दर खोड़ला गेला। 6ते वे सात स्वर्ग़दूत जाये कनु सात आफता हुतीया, ते वाणे साफ शोद्ध चमकते हुले ओढ़णी घाले आले ते वे छात्ती उपर सोने चे पट्टे ब़ांहले आले मन्दरा महु ब़ाहरु निकड़ले। 7ते वा चऊं जीते जींया महु हेके ने सात स्वर्ग़दूता नु जको सदा-मदा जीते रेहणे आले नरीकारा चे गुस्से लारे भरीले आले सात सोने चे मुंगर ङिले। 8ते नरीकारा ची महिमा, ते ओची सामर्थ चे जरिये मन्दर धूंऐ लारे भरीती गेला, ते जब-तक वा सात स्वर्ग़दूता चा सात विपतीया खत्तम कोनी हुलीया, तब तक कुई मन्दरा मां कोनी जा सग़ले।

Currently Selected:

प्रकाशितवाक्य 15: ODR

Highlight

Copy

Compare