1 पतरस 1
1
नमस्कार
1हा चिठ्ठी पतरस ची ओर कनु, जको ईशु मसीह चा प्रेरित छै, नरीकारा चे वां प्रदेसीया चे नांवे, जको पुन्तुस, गलातिया, कप्पदूकिया, एशिया ते बिथुनिया चे इलाके मां खिंडती-पुंडती रिही।
2ते नरीकार ब़ा चे भविष्य ज्ञान चे अनुसार, पवित्र आत्मा चे पवित्र करने चे जरिये आज्ञा मनणे ते ईशु मसीह चे लुहींया चे छिड़कले जाणे चे वास्ते चुणले गेले।
तम्हानु अनुग्रह ते शान्ति ब़ोहत मिलती रिहो।
जीती उम्मीद
3अम्चे प्रभु ईशु मसीह चा नरीकारा ते ब़ा चा धन्यवाद हो, जेह्णे ईशु मसीह नु मरले आला महु जीते हुवणे चे जरिये, आपणी बङी दया लारे अम्हानु जीती उम्मीद चे वास्ते नवां जनम ङिला। 4यानि हमा तम्चे वास्ते स्वर्ग़ा मां वा विरासत मेहली गेली, जाये तम्ही वारिस छिवा। जको ना तां कङी खत्तम हुवणे आली, ते निर्मल, ते ना ही कङी गलणे आली छै। 5तम्ची रखवाली नरीकारा ची शक्ति लारे, विश्वास चे लारे ओ उद्धार वास्ते, जको आणे आले समय मां उजागर हुवणे आली छै, करली जई। 6ते ये वजह कनु तम्ही खौश हुवा, हालांकि जरुरी छै कि हमा कोच्छ ङिहां तक हर-तरहा ची परीक्षा कनु तम्हानु ङोख झेलणे पड़े। 7ईं ऐवास्ते हुले कि तम्चा परखला आला विश्वास जको जाखते मां नाशवान सोने कनु वी घणा कीमती छै, जिसे बेले ईशु मसीह उजागर हुवी, नरीकारा कनु तम्हानु प्रशंसा, महिमा ते कद्दर मिलो।
8अगर तम्ही ओनु ङेखले कोनी, बल्ति वी तम्ही ओचे लारे प्रेम राखा। अगर तम्ही ओनु हमा ङेख ना सग़ा, पर बल्ति वी ओचा विश्वास करा ते हर हेक इसड़ी खुशी लारे भरीले आले छिवा, जको गिणती चे ब़ाहरु ते महिमा लारे भरीला आला छै। 9तम्ही आपणे विश्वासा चा प्रतिफल यानिकि आपणी आत्मा चा उद्धार ग्रहण करा पले।
10ऐ उद्धार चे बारे मां वा भविष्यवक्ता ने बङी मेहनती लारे जांच-पड़ताल करली, जेह्णे ओ अनुग्रह चे बारे मां जको तम्चे उपर हुवणे आला हुता, भविष्यवाणी करली हुती। 11वाणे ये बाते ची पड़ताल करली कि मसीह चा आत्मा जको वांचे मां हुता, ते पेहले कनु ही मसीह चे ङुखा ची ते वांचे बाद हुवणे आली महिमा ची ग़वाही ङिता, ये बाता ये दुनिया उपर किसे बेले हुवे ते बल्ति ये दुनिया चे का हुवी?
12वांचे उपर ईं वी उजागर करले गेले, कि वे आपणी कोनी बल्कि तम्ची सेवा करने चे वास्ते ये बाता किही पलते ले, जाया समाचार तम्हानु हमा वांचे जरिये मिड़ला जेह्णे पवित्र आत्मा चे जरिये जको स्वर्ग़ा कनु भेज़ला गेला तम्हानु सुसमाचार सुणाला, जा बाता नु जाणने चे वास्ते तां स्वर्ग़दूत वी तरसते रिही।
पवित्र जीवन जीणे चे वास्ते हकारले
13ऐवास्ते पुरी ब़ुध्दि लारे चौकस रिहा ते आपणे उपर काबु राखा। ओ अनुग्रह ची पुरी उम्मीद राखा जको ईशु मसीह चे उजागर हुवणे उपर तम्हानु ङिली जाणे आली छै। 14आज्ञाकारी ब़ाला आलीकर आपणी ना समझ चे समय ची पुराणी अभिलाषा चे नमूने ना बणा। 15बल्कि जिंवे तम्हानु हकारने आला नरीकार पवित्र छै, यूंही तम्ही वी आपणे हर कामा मां पवित्र बणा। 16शास्त्र वी यूंही किहे, “पवित्र बणा, कांकि मैं पवित्र छै।”
17ते जिसे बेले तम्ही, “हे ब़ा,” केहती कर प्राथना करा, जको बिना पक्षपात हर हेके चे कामा चे अनुसार न्यां करी, ऐवास्ते ये दुनिया मां प्रदेसी हुवणे चा समय नरीकारा चा आदर करते हुले जीवन बितावा। 18कांकि तम्ही जाणा, कि तम्चा निक्कमा चाल-चलन जको ङाङा-ब़ा कनु चड़ला आवे ओचे कनु तम्चा छुटकारा चान्दी सोने यानिकि नाशवान चीजा चे जरिये कोनी हुला, 19पर बेकसूर ते बिना कलंक मैमणे यानिकि मसीह चे बेशकीमती लुहींया चे जरिये हुला। 20ऐ संसारा ची शुरुआत कनु ही पेहले ओनु चुणती गेलते ले, पर तम्चे वास्ते ओनु यां आखरी ङिहां मां ओणे उजागर करले। 21जको ओचे जरिये ओ नरीकारा उपर विश्वास करा, जेह्णे ओनु मरले आला महु जीते करले, ते महिमा ङिली, कि तम्चा विश्वास ते उम्मीद नरीकारा उपर हो।
22हमा ङेखा, जिसे बेले तम्ही सच्चाई चा पालन करते हुले, सच्चे भाईचारे चे प्रीति नु उजागर करने चे वास्ते आपणी आत्मा नु पवित्र करते गेले ते पवित्र मना लारे हेके ङुजे लारे प्रेम राखा। 23कांकि तम्ही नाशवान कोनी, पर अवनाशी बीजा लारे, नरीकारा चे जीते ते सदा रुकणे आले वचना लारे नवां जनम गेहला। 24कांकि शास्त्र मां लिखले पले,
“हर हेक बन्दे खड़ा चे आलीकर छै,
ते ओची सारी शोभा खड़ा चे फूलां चे आलीकर छै,
खड़ सूखती जाये,
ते फूल झड़ती जाये।
25पर प्रभु चा वचन हमेशा बणला रिही।”
हा ओही सुसमाचार चा वचन छै जको तम्हानु सुणाला गेला हुता।
Currently Selected:
1 पतरस 1: ODR
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0
