याकूब 5

स्वार्थी धनवान ङण्ड भोग़े

1हे धनवानु सुणती तां गिहा, जको क्लेश तम्चे उपर आणे आला छै, ओचे वास्ते रोवा ते जोरा आलीकर रौल मचाती कर रोवा। 2#मत्ती 6:19तम्चा धन बिगड़ती गेला ते तम्चे ओढ़णा नु कीड़े खाती गेले। 3तम्चे सोने चान्दी मां जर्र लाग़ती गेली। ते वा जर्र तम्चे विरोध मां ग़वाही ङिही, ते तम्चे मांसा नु जाखते आलीकर खाती जई। ऐ युगा चा आखरी समय छै ते तम्ही आपणे वास्ते धन भेला करती गेला। 4ते ङेखा, तम्चे खेता मां जिसा मजदूरा ने काम करले, तम्ही वानु धोक्‍का ङिती कर वांची मजदूरी हमा तक कोनी ङिली। ते वाहो मजदूरी चीखे ते रौल मचावे पली। ते खेता मां काम करने आले मजदूरा चा चीखा ते धाड़-धाड़ सर्वशक्‍तिमान प्रभु चे काना तक पुज़ती गेली।

5तम्ही धरती उपर भोग़ विलास मां लाग़ले रेहले ते बल्ति बङा ही सोख भोग़ला, ते तम्ही आपणे आप नु मोटे ताजा करती गेले हेक ङिओ बढीजणे चे वास्ते। 6तम्ही धर्मी बन्दा नु जको तम्चे विरोध कोनी हुले वानु दोषी ठहराती कर मारती नाखले।

तसल्‍ली राखा

7हे माये भऊ, प्रभु चे बल्ति आणे तक तसल्‍ली राखा, ओ जमींदार नु तां ङेखा जको आपणी भोंये ची कीमती रहड़ी चा इन्तजार करता रिहे। ऐवास्ते शुरु ची बारशी कनु लाती कर ओ आखरी बारशी तक लगातार तसल्‍ली लारे इन्तजार करता रिहे। 8तम्ही वी तसल्‍ली राखा, ते आपणे मना नु मजबूत करा, कांकि नरीकारा चे आणे ची घड़ी गोढु छै। 9हे माये भऊ, हेके ङुजे उपर दोष ना लावा ताकि तम्चे उपर वी दोष नी लाग़ी। ङेखा, न्यां करने आला हाकिम दरवाजे उपर भिला ला।

10हे माये भऊ, जिसा भविष्यवक्‍ता ने प्रभु चे नांवा लारे बाता करलीया, वानु ङोख भोग़णे ते तसल्‍ली राखणे चा हेक नमुना समझा। 11ङेखा, अम्ही तसल्‍ली राखणे आला नु धन्‍न किहुं। तम्ही अय्यूब ची तसल्‍ली चे बारे मां सुणले, ते प्रभु ची ओर कनु जको ओचा परिणाम हुला ओनु वी जाणती गेले, जाये कनु प्रभु ची ब़ोहत घणी करुणा ते दया उजागर हुवे।

सोचती समझती कर ब़ोला

12 # मत्ती 5:34–37 पर हे माये भऊ, सब महु सिरे ची बात हा छै कि कसम ना खाजा, ना स्वर्ग़ा ची, ना धरती ची, ते ना ही कुई नेरी चीजे ची, पर तम्ची बातचीत “हां” ची “हां,” ते “ना” ची “ना” हो कि तम्ही ङण्ड चे लायक ना बणा।

प्राथना ची शक्‍ति

13अगर तम्चे मां कुई ङुखी हो तां ओनु प्राथना करनी चाही छै। अगर कुई खौश छै तां ओनु स्तुति भज़न गांणे चाही छै। 14#मरकु 6:13अगर तम्चे बीच मां कुई रोग़ी बन्दे हो, तां कलीसिया चे अग़ुवा नु हकरवाणे चाही छै कि वे आती कर ओचे वास्ते प्राथना करो, ते ओचे उपर प्रभु चे नांवा लारे तेल लाओ। 15ते विश्‍वास लारे करली गेली प्राथना चे जरिये रोग़ी ठीक हुती जई। ते प्रभु ओनु खड़े करती ङिही। अगर ओणे पाप वी करले तां प्रभु ओचे पापा नु माफ करती ङिही।

16ऐवास्ते तम्ही आपस मां हेके ङुजे चे सामणे आपणे–आपणे पापा नु मनती गिहा, ते हेके ङुजे चे वास्ते प्राथना करा, कि जाये कनु तम्ही ठीक हुती जावा। धर्मी बन्दे ची प्राथना चे लारे ब़ोहत कोच्छ हो सग़े। 17एलिय्याह वी तां अम्चे आलीकर ङोख सोख भोग़ी इन्सान हुते, ते ओणे गिड़गिड़ाती कर प्राथना करली कि मिंही ना बरसो। ते साढे तीन साला तक धरती उपर मिंही कोनी बरसला। 18ते बल्ति ओणे प्राथना करली, ते आसमाना कनु बारश हुली, ते भोंये उपर रहड़ी तियार हुलीया।

हेक आत्मा ची रक्षा

19हे माये भऊ, अगर तम्चे महु कुई सच्‍चाई चे मार्ग़ कनु भटकती जाये, ते कुई बन्दे ओनु पुठे नरीकारा सनु फेरती आओ, 20#1 पत 4:8तां ओ ईं जाणती गिहो कि जको कुई भटकले आले पापीया नु पुठे फेरती आणी, ओ हेक आत्मा नु हमेशा ची मौत कनु बचावी ते ओचे कई पाप माफ करले जाये।

Currently Selected:

याकूब 5: ODR

Highlight

Copy

Compare