1 पतरस 2
2
जीता पत्थर ते पवित्र प्रजा
1ऐवास्ते हर-तरहा चा बैरभाव ते छल ते कप्पट ते डाह ते बदनामी नु दूर करती कर, 2नवें जमले आले ब़ाला आलीकर, शोद्ध आत्मिक ङूधा ची इच्छा राखा, ताकि ओचे जरिये तम्चा उद्धार ते बढ़ोतरी हो। 3कांकि हमा तम्ही प्रभु ची दया चा स्वाद चाखती ही गेला।
4ओचे गोढु आती कर, जानु बन्दा ने तां निक्कमे ठहराले, पर नरीकारा चे गोढु चुणला आला, ते बेशकीमती जीता जाग़ता पत्थर छै। 5तम्ही वी आप जीते पत्थरा आलीकर आत्मिक घर बणते जावा पले, जाये कनु याजका चा पवित्र समाज बणती कर, इसड़े आत्मिक बलिदान चढ़ावा, जको ईशु मसीह चे जरिये नरीकारा नु ग्रहण हो। 6पवित्रशास्त्र मां लिखले पले,
“ङेखा, मैं सिय्योन शहरा मां हेक कूणे चा पत्थर मेहले पला,
जको बेशकीमती छै ते चुणला आला छै।
ऐचे उपर जको विश्वास करी ओनु कङी वी शर्मसार नी हुवणे पड़ी।”
7तम्चे वास्ते जको विश्वास करा, ओ पत्थर बेशकीमती छै। पर जको विश्वास ना करी, वांचे वास्ते पवित्रशास्त्र हा किहे,
“कारीगरा ने जिसे पत्थरा नु बेकार समझती कर काढ़ती नाखले हुते,
ओही कूणे चा पत्थर बणती गेला,
8हेक इसड़ा पत्थर जाये कनु वे ठोकर खई,
हेक इसड़ी चट्टान जाये उपर वे फिसलती कर ढेती पड़ी।”
वे वचना मां विश्वास ना करने चाहवी, ऐवास्ते वे ठोकर खाती कर ढेती पड़ी। हाओ वांचे भाग़ा मां लिखले पले।
9 #
तीतु 2:14
पर तम्ही तां हेक चुणला आला वंश, ते राज़ पदधारी, याजका चा हेक समाज, ते पवित्र लौक, ते हेक इसड़ा झोण्ड जको नरीकारा चा आपणा छै, ताकि तम्ही नरीकारा चे महान कामा ची घोषणा कर सग़ा जेह्णे तम्हानु अन्धारे महु काढ़ती कर अदभोत सोज़ले मां हकारले। ओचे गोण उजागर करा। जिंवे पवित्रशास्त्र मां लिखले पले,
10“तम्ही पेहले तां कहीं वी कोनी हुते,
पर हमा नरीकारा चा वंश छिवा।
तम्चे उपर दया कोनी हुली हुती,
पर हमा तम्चे उपर नरीकारा ची दया हुली।”
नरीकारा चे दास
11हे प्यारे, मैं तम्हा कनु बिनती करे पला, कि तम्ही संसारा मां प्रदेसीया चे रूपा मां छिवा, जको तम्ची आत्मा लारे योद्ध करतीया रिही वा शरीरा चा इच्छा कनु तम्ही बचले रिहा। 12नेरीया जातिया मां तम्चा चाल-चलन भला हो, ऐवास्ते कि जिसीया जिसीया बाता मां वे तम्हानु बदनाम करी, वे तम्चे भले कामा नु ङेखती कर, प्रभु चे आणे चे ङिओ वे नरीकारा ची महिमा करो।
अधिकारी चे आज्ञा नु मना
13प्रभु चे वास्ते बन्दा चे ठहराले आले हर हेक अधिकारीया चे वशा मां रिहा, राजा चे, कांकि ओ सब चे उपर प्रधान छै, 14ते हाकिमा चे, वानु ओणे कुकर्मीया नु ङण्ड ङेणे चे वास्ते ते आच्छे काम करने आला ची तारिफ करने चे वास्ते भेज़ले। 15कांकि नरीकारा ची इच्छा हाओ छै कि तम्ही आपणे भले कामा ची वजह कनु मूर्ख लौका चे मुँहा नु बन्द करती नाखा। 16आपणे आप नु तम्ही आजाद जाणा, पर आपणी ये आजादी नु बुराई चे वास्ते ओट ना बणावा, पर आपणे आप नु नरीकारा चे दास समझती कर चला। 17सारा चा कद्दर करा, विश्वासी भावां चे लारे प्रेम राखा, नरीकारा चा आदरभाव करते रिहा, राजे चा कद्दर करा।
मसीह चे ङुखा ची मिसाल
18जको दास छी, ना सेर्फ कद्दर चे लारे आपणे मालिका चे वशा मां रिहा, ना सेर्फ वांचे जको आच्छे छी, ते ङुजा चे वास्ते फिक्र करी, बल्कि वांचे वी जको कठोर छी। 19कांकि अगर कुई नरीकारा चे प्रति सचेत रेहते हुले अन्याय चे ङोख भोग़ते हुले क्लेश सहन करे, तां ऊं प्रशंसा चे काम छै। 20पर अगर गन्दे कामा चे वजह तम्हानु कोटले मारले जाये, ते तम्ही ओनु सहन करा तां ते ऐचे मां बढ़ाई ची का बात छै? अगर तम्हानु तम्चे आच्छे कामा चे वास्ते सताले जाये तां नरीकारा चे सामणे बढ़ाई चे लायक छै। 21नरीकारा ने तम्हानु ऐवास्ते हकारले, कांकि मसीह ने वी तम्चे वास्ते ङोख भोग़ले, ते इसड़े करती कर तम्चे वास्ते हेक मिसाल छोड़ली, कि तम्ही वी ओचे चैन्ह उपर चला। कांकि यूं लिखले पले,
22“ना तां ओणे कुई पाप करला,
ते ना ही ओचे मुँहा कनु कुई छल कप्पट ची बात निकड़ली।”
23ओ गाली सुणती कर कानु गाली ना काढ़ता, ते ङोख भोग़ती कर कानु वी धमकी ना ङिता, पर आपणे आप नु न्यां करने आले नरीकारा चे हाथा मां सोंपती ङिले। 24ओ खौद्द ही अम्चे पापा नु आपणे शरीरा चे उपर चती कर क्रूसा उपर चढ़ती गेला, जाये कनु अम्ही पापा चे वास्ते मरती कर धार्मिकता चे वांचे वास्ते जीवन बिताऊं, ओचे ही मार खाणे ची वजह कनु तम्ही चंगे हुले। 25कांकि तम्ही पेहले भटकलीया आलीया भेङा आलीकर हुते, पर हमा तम्ही आपणे आजड़ी ते आत्मा ची रखवाली करने आले सनु पुठे फिरती आले।
Currently Selected:
1 पतरस 2: ODR
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0
