Yihokora 3
3
Mbapira kwawakaSardisi
1“Tjangere muengeli ghombunga dhomuSardisi eshi:
“Dyo ghana kuninga oYu gha kara noMipepo kwoko nodhiwadi dhaNyambi, nomatungwedhi kwoko nomawadi. Na dimuka yirughana yoye, no wa kara nodina eshi kupara ghuna kupara, nane wafa. 2Pinduke no ghutanarithe awa hana thighara ko, awa ha nemana padipimbo dyokufa. Yoyishi na wana yirughana yoye eshi mbadi yina rikanya kughutho waNyambi. 3Vuruke eshi ngepi di wa yi tambura no ngepi di wa yuva. Ghu yi kunge no ghupiruke. Ngeshi mbadi sho piruke, na kukumbandukera yira mwidhi. No mbadi sho dimuke eshi nako munye sho ni kumbandukere. 4Ene wa kara nawamweya karo homuSardisi, awa ha dhira kurombyathanitha yivata yawo. Awo mbana yendaghura pofotji Nange muyivata yoikenu. Yoyishi ha fumana. 5Oyu ghokuwitha mbo ghana pu kuyenga noyivata yoyikenu. No mbadi mbo ni dhingununa dina dyendi murukwaro romoyo. Mbona nongonona dina dyendi kwaTate no kwawaengeli wendi.
6“Oyu gha kara nomatwi gha tegherere eyi ghana kughamba Mupepo kumambunga.
Mbapira kwawakaFiladelfiya
7“Tjange kwamuengeli ghombunga dhawakaFiladelfiya eshi:
“Kemo ghana kughamba Mupongoki, Mukaghushemwa. Oyu gha kara notjapi dhaDavita. Oyu ghokuyandhurura no mbadiko yu gha kona kuyandhera, oyu ghokuyandhera no mbadiko yu gha kona kuyandhurura. 8Na dimuka yirughana yoye. Ngo mone eshi, na thighi dikorogho dyothiyahi kukoye no mbadiko yu gha kona kudiyandhera. Ngambi kenge wa kara nongcamu dhodhipu, ene wa kunga n̂ando dhange no mbadi wangera Dina dyange. 9Mone! Ame mbona tumu hanu kukoye awa ha tamba kwaShatani. Hakambango wa. Awo hana kukutoya hathinda eshi Hajuda, ene kadi wodiwo. Na kutenda yinu yi eshi, mbeye no mba kotamene kumapadhi ghoye. Pa sha vuruke eshi na kuhaka. 10Yoyishi wa kunga n̂ando dhange ghukon̂otwedha. Name karo mbona kukungu kumayerekero agha mbo gheya mukaye kokahe kwawa ha tunga mo. 11Kenge, tamba niye. Kwate eyi ghudi nayo, papire yu sho gha kukurure n̂ata dhoye. 12Oyu ghokuwitha, mbona mu tendi dighundhi dyomutembeli waNyambi. No mbadi mbo gha dhuruka po. Mbona tjanga po Dina dyaNyambi wange. Dhombara dhaNyambi wange dhoJerusalema ghomupya. Edhi dhina kutunda kuwiru kwaNyambi wange, noDina dyange dyodipya.
13“Oyu gha kara nomatwi gha tegherere eyi ghana kughamba Mupepo kumambunga.
Mbapira kwawakaLaghodisiya
14“Ghu tjange kwamuengeli ghombunga dhawakaLaghodisiya eshi:
“Dyo ghana kughamba Yu ha toya eshi Amen, ghomakurupero no kanonga ghomukaghushemwa. Mukakutanga payivareka yaNyambi. 15Na dimuka yirughana yoye eshi: Owe ne kadi ghomutenda no kadi ghomughenyu. Ngo ghomutenda ngambi ghomughenyu ngo hasha. 16Apa no ne yoyishi wa rembuka no kadi ghomutenda no ghughenyu temba. Yo sho ni kuthipe mukanwa kange. 17Yoyi ghuna ninganga eshi: No mutungi na tungerera. Mbadiko ethi na kunyanda. Ene mbadi wa dimuka eshi, owe ne ghomukakunyanda. No wa yawa thin̂eke, ghomuhepwe, ghomukunga no wa kara nowira. 18Na kukufundhwera eshi ghure kukwange mangondo. Agha gha twedhima kumudiro, ghu kare ghomutungi no kuvateke yitere yoyikenu. No honyi dhowira ghoye mbadi dha kona kuhokoka. Wethe meho ghoye nomaghadhi ghu kone kumona. 19Wahe wa na haka na kuwahumbitha nomamwashwero. Mu dhidhimeke no mupiruka. 20Mone, Ame ne nemana pathero. No Yame na kukun̂ura. Ngeshi gha yuve ghumweya diywi dyange no kuyandhurura thero, na kwingena kukwendi. Ho ni kuyarekere nendi, naye ho gha dye Nange. 21Koyu ghokuwitha mbona mu tawedha kukuhungumana pofotji Nange padipuna. No thika di na witha Me, ho na hungumana pofotji naTate padipuna.
22“Mukamatwi gha tegherere eyi ghana kughamba Mupepo kumambunga.”
Currently Selected:
Yihokora 3: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
