Yihokora 4
4
Yihokoka yokudipuna dyaNyambi
1Munyima dhoyinu yino, ko kumona kwange dikorogho dyothiyahi mudiwiru.
No diywi dyokutanga edi na yuvire dyokuninga yira torombita, dya ghambire kukwange eshi: “Dhine kuno. N̂anyi ni kuneghedhe eyi sho yi hokoke munyima.” 2Kapupi kokukara kwange mwaMupepo, ni mone ko ne dipuna ditja mudiwiru. Padipuna ne pana hungumana ghumweya. 3Noyu ghana hungumana po, rupara rwendi rwa rwedhimine yira kawe kokupitura yasipisi nosaridiyusi. Mumbadi dhodipuna mwadhingumwetwedhire muto ghomvura ghokurwedhima yira kawe kosimaraga. 4Mumbadi dhodipuna ne mwa dhingumwetwedhire mapuna makumi mawadi nomane. Pamapuna ne pa hungumanine hamayami makumi mawadi nohane. Ha kuyengire noyivata yoyikenu, no ha karire noman̂ata ghomangondo pamitwi dhawo. 5Mudipuna mwa shwaghire mwethero no mudikitero. Kughutho wadyo kwa tumbukire minyenge kwoko nodhiwadi. Edhi ne dhoMipepo kwoko nodhiwadi dhaNyambi. 6Kughutho ghodipuna kwa karire dikuruviya dyokurwedhima yira kristari.
Mukatji kodipuna no mumbadi dhodipuna, mwa karire yoyiyumi yine. Yomeho ghokughutho no munyima. 7Thothiyumi thokutanga ne yira nyime, thoghuwadine yira ndana, thoghuhatu ne rupara yira munu. Thoghune yira dikwi dyokutuka. 8Po yi yoyiyumi yishane, kehe thi tha karire nomando kwoko noghofotji. Ya kuvudhungurire no ya yarire nomeho mwimi. No mbadi ya porerire mutenya no ghuthiku pakuninga eshi:
“Kupongoka, kupongoka, kupongoka
Fumu Nyambi ghomukangcamu,
oyu gha karire noyu gha kara
noyu mbo gheya.”
9Yishaghuyumi yine yi, kwimba yina kwimba membo ghomakughero no ghomashogherero noghomatumero, koYu gha hungumana padipuna no gha para kuroruheya. 10Hamayami makumi mawadi nohane, hana kutongamena kughutho ghoYu gha hungamana padipuna no hana kumukanderera Oyu gha para kuroruheya. Hana kushupaghura man̂ata ghawo kughutho ghodipuna no kuninga eshi:
11“Wa fumana we Fumu kutambura difumanekero
no dikuto no ngcamu.
Yoyishi yowe wa varekire
yoyihe no pamahimeno ghoye ya kara po yoyihe,
eyi ya pwire kuvareka.”
Currently Selected:
Yihokora 4: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
