Yihokora 2
2
Mbapira kwawakaEfesusi
1“Tjange kwamuengeli ghombunga dhomuEfesusi: “Thinda ghana kuyininga, oYu gha kwaterera matungwedhi kwoko nomawadi munyara dhorudyo rwendi, oyu ghana kuyendaghura mumbirikatji dhoyikora kwoko noyiwadi yomangondo. 2Na dimuka yirughana yoye noyitenda yoye noghudhughutjima ghoye. Mbadi wa kudhekerire kwawanu hohamango. No wa yerekire awa ha kuningire eshi hapostoli. Ene kadi wodiwo. Owe ne wa wa wanine eshi, hakambango. 3Wa dhidhimeka. Wa nyandire muDina dyange no mbadi wa kashire. 4Ene na kukoghaghura yoyi wa thigha ruhakitho roye rokukwange. 5Vuruke ne keho eshi, panye wa wera? No ghu piruke ghu tende yirughana yoye yokutanga. Maghana sho niye kukoye, ngo na ni hanyaghure yikora yoye, ngeshi mbadi sho kuthighure. 6Ene yi ne nayo ghudi eshi, wa dhimba yitenda yawakaNikolayite, eyi na dhimba Name.
7“Oyu gha kara nomatwi, gha tegherere eyi ghana kuninga Mupepo kumambunga.
“Koyu mbo gha witha mbona mupa yidya yothitondo thomoyo thomuParadishi waNyambi.
Mbapira kwawakaSimirna
8“Tjangere muengeli ghombunga dhawakaSimirna eshi:
“N̂ando dhi dha tunda kwaMukakutanga no Mukaghuhura. Oyu gha fire noyu gha di ghuyumi karo. 9Na dimuka yitenda yoye no ghukukutu ghoye no ghuhepwe ghoye. Ene ghomutungi. Na dimuka dishamu dyokukwenu edi dya tunda kwawa ha kutoya eshi Hajuda. Eyi ne kadi yodigho. Kadi Hajuda hoshemwa, ene haShatani wa. 10Wa yapa, no kamanana temba koyi mbo nyanda. Mu mone, Shatani mbo ghana mwaghera hamweya mun̂otwa eshi gha mu yereke mwe. Ene mbo muna ka wana thindhivi thomayuwa dikumi. Mu tjimape kate kukufa, ame mbona kupa n̂ata dhomoyo.
11“Oyu gha kara nomatwi gha tegherere eyi ghana kughamba Mupepo kumambunga.
“Oyu mbo gha witha, mbadi mbo gha wana ghukukutu pakufa paruwadi.
Mbapira kwawakaPergamumu
12“No tjange mbapira kwamuengeli ghombunga dhawakaPergamumu eshi:
“Dyo ghana kuninga oyu gha kara nodimende dyoditwe. 13Na dimuka yitenda yoye. No dyango di wa tunga, mo dya kara dipuna dyaShatani. Owe ne wa mamaterire paDina dyange no mbadi wa hamurire matawero ghoye ghokuKwange. Ngambi mumayuwa agha gha karire Antipasi kanonga kange. Oyu ha pagherire papenu mwe mwamatungo ghaShatani. 14Ene na kara notunu noye eshi: Owe wa kara nohanu awa ha kakatera payihonga yaBelighamu, oyu gha hongire Balaka mukupemukitha hana Isragheli eshi, ha dye kumuyambo dhawanyambi hawo‐nawo, no ha tende rungu. 15Po ha di karo hamweya awa ha kakatera kuyihonga yawakaNikolayite, awa na dhimba Me. 16Kupirure nowe, maghana na kwiya wangu kukoye. No kutuma yita kukwawo nodimende dyomukanwa kange.
17“Oyu gha kara nomatwi gha tegherere eyi ghana kughamba Mupepo kumambunga.
“Koyu mbo gha witha mbona mupa yidya yoMana eyi yonda. No mbona mupa diwe dyodikuru nopadiwe di pana pu kutjanga dina dyodipya, edi gha dhira kudimuka ghumweya. Shimengwa yu mbo gha di tambura.
Mbapira kwawakaTiyatira
18“No tjange mbapira kwamuengeli ghombunga dhawaka Tiyatira eshi:
“Dyo ghana kuninga Mwana Nyambi oyu gha kiha meho yira maretha ghomudiro, no mapadhi ghendi gha twedhima yira thikuvo. 19Na dimuka yitenda yoye no ruhakitho roye no yikarera yoye. Na dimuka matawero ghoye no ghudhutjima ghoye. Yirughana yoye yomunyima ne, ya piterera yokutanga. 20Ene na kara no n̂ando ku koye dhokuninga eshi: Wa topererire mukamadi Isabela, oyu gha kutoyire thinda eshi muporofeta. Gha hongire hapikange no kuwakokera kurungu no kuwaditha muyambo wagho‐nagho. 21Ame na mu pire nako dhokukuthighura kurungu rwendi. Aye ne mbadi gha kuthighurire. 22Mone, kumwagha na kumumwaghera mukafungo koyikorwa. Nawa sha kuhondere nendi, hana kwingena mughukukutu ghoghukuru, ngeshi mbadi sha kuthighure kuyitenda yawo. 23No mbona wa pagha shemwa hanendi. Nawakakutawa wahe, mbana dimuka eshi, oyu ne yoYame, ghokuthimbadhara kumathigho nokumitjima. No mbana mupa yomuhe ghopapenu po payitenda yendi.
24“Ene hamweya homuTiyatira, mbadi ha kuthire yihonga yombango yi. No mbadi ha shanine kudimuka ghudhungi ghu wonda mwaShatani. Yodigho mbadi sho ni wa tware mughukukutu ghumweya. 25Mu kwate vene thikuma eyi mudi nayo, kate mbo ni keye. 26Koyu ghokuwitha no kukunga yirughana yange kate kughuhura, mbona mupa marawero ghokumako. 27No mbo ghana wa rawera nomutagha ghothikuvo. No mbo ghana ka wandaghura yira ghudho, thikadi na wanine name ngcamu kwaTate. 28Kuthidimukitho thongcamu, mbona mupa nota ghomurughura.
29“Oyu gha kara nomatwi gha tegherere eyi ghana kughamba Mupepo kumambunga.”
Currently Selected:
Yihokora 2: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
