Yihokora 19
19
Mahanyaghukero ghaBabiloni. Yishamberera nodimbo dyomawithero
1Munyima dhoyinu yi, kokuyuva kwange thinu yira diywi dyomavuma ghomakuru ghomudiwiru ghana kuninga eshi: “Alleluya, ruvigha no fuma no dikuto no ngcamu ne kwaFumu Nyambi wetu. 2Yoyishi ghupanguri wendi ne wa ghushewma no ghuhunga. Aye ghana pangura rungu, oru rwa futithire muve. Manyinga ghawapikendi, gha ghahuthire papendi.” 3Paruwadi ha ningi karo eshi: “Alleluya! Mwithi ghuna kudhina papendi kate kuroruheya.” 4Nawanyami makumi mane nohane no yikamoyo, ha wire pamuve. Gho ha kandererire Nyambi oyu gha hungumana padipuna ghuninga eshi: “Kemo. Alleluya.”
5Ko kushwagha diywi mudipuna eshi: “Mu kughe Nyambi wetu mwahe mwapikendi namwe mwa mu yapa, hanuke nawakuru.” 6Ha ni yuvu diywi dyokuninga yira mbunga dhishokuru, no yira mupughumo ghomeyu ghomengi nomudikitero ghongcamu ghuna kuninga eshi: “Alleluya, yoyishi Fumu Nyambi ghomukangcamu ghana mbadukera ghufumu. 7Mu tu mu shamberere no tuyumbaghuke no tu mupe difumanekero. Yoyishi wenga waNdjwighana ne ghu neya. Nambuyama wendi ghana kuroghitha. 8Aye hana mupa yoyihe yokukuyenga. Makehe ghomakenu ghokurwedhima. Yoyi makehe gha ghomakenu ne yoyitenda yoyihunga yawapongoki.”
9Ko kuninga kwendi kukwange eshi: “Tjange eshi, hakaruvigha awa hanu pu kuragha kudiyumbu dyoNdjwighana.” Ha ningi karo kukwange eshi: “Agha ne ghoman̂ando ghoghushemwa ghaNyambi.”
10Ame ne kokukuvama kumapadhi eshi ni mukanderere. Aye gha ningire kukwange eshi: “Perere poye! Ame ne yame mupika muyendhoye no wawayendhoye, awa ha kara noghunongononi waJesusi. Kanderere Nyambi.”
Yoyi ghunongononi waJesusi ne mupepo ghoyipumba.
Pakuwitha Kristusi thishereka no muporofeta ghomando
11Ha ni mono kwange diwiru dina yandhuruka, kokukara po mbi ghomukenu. Noyu gha hungumanine po, ha mu tire eshi Matjimapero no Ghushemwa. Ghana kupangura no kutuma yita mughuhunga. 12Meho ghendi gha pitura yira maretha ghomudiro. Pamutwi wendi pa kara noman̂ata ghomengi. Ho gha kara noDina di ha tjanga eshi, mbadiko yu gha di dimuka, shimengwa Thinda. 13Gha pwire kuyenga nothivata ethi ha dhorire mumanyinga. Dina dyendi ne “Nando dhaNyambi.” 14Tushumba tomudiwiru twa mu kuthire nombi dhodhikenu. Twa pwire kuyenga noyivata yoyikenu. 15Mukanwa kendi, mwa shwaghire dimende dyoditwe, dyokukeshaghuritha marudhi. Ho mbo ghawa pangure nomutagha ghothikuvo no kudyata kakundhu kovinyu koghukore no ghukenya waNyambi ghomukangcamu. 16Pathishupata thendi no pambunda dhendi, pemana Dina eshi: “Fumu wawafumu noHekudya wawahekudya.”
17Ko kumona kwange muengeli yofotji gha nemana mudiyuwa. Ha kugherera nodiywi dyodikuru gha ninge kuyinyunyi yoyihe, eyi ya teremba mukatji kodiwiru eshi: “Mwiye kuno! Mu kukongwedhe kumakuyarekero ghaNyambi shokuru. 18Eshi na mu dye nyama dhawafumu no dhawakamakuto kupiterera diyovi, no nyama dhawakangcamu no dhombi no dhawa ha dhina po no dhawahe, hakamukeya no dhawapika, hakuru nawanuke.”
19Ame ha ni mono thishereka nawafumu hopamuve notushumba twawo. Hana kukongwedha eshi ha tende yita noyu gha dhinine pambi notushumba twendi. 20Thishereka ne tha pwire kutwara mun̂otwa, namuporofeta ghombango, oyu gha tendire yiperemeka mudyango dyatho, eyi ya pemukithire wa ha karire nothidimukitho thothishereka no kukanderera kuthitjwandjo thatho. Hawadi ha pwire kuvukumena ghuyumi mudirara dyomudiro. 21Hamweya ha pwire kupagha nodimende di dya shwaghire mukanwa koyu dhinine pambi. No yinyunyi yoyihe yekutire kunyama dhawo.
Currently Selected:
Yihokora 19: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
