Yihokora 18
18
Mahanyaghukero ghaBabiloni. Yindhivi yomukaye
1Munyima dhoyinu yino, kokumona kwange muengeli ghana kushuruka mudiwiru nongcamu dhodhikuru nothishe thendi, tha munekerire muve ghoghuhe. 2Ha kugherera kwendi nokakugho kokakuru ghuninga eshi: “Ghana ghu, ghana ghu Babiloni shokuru. Oyu gha karire matungo ghaShatani. Makonganeno ghomipepo dhodhimango dhodhihe, makonganeno ghoyinyunyi yoyimango yoyihe. 3Yoyishi marudhi ghomahe gha nwine vinyu ghoghukore wendi. Nawafumu hopamuve ha tendire rungu nendi. Hakamighuro ha tungire pangcamu dhodihamba dyendi.”
4Ko kuyuva kwange karo diywi dimweya dina kushwagha mudiwiru eshi:
“Mu tunde ko kukwendi mwakadiko dyange,
maghana sho mu kupakerere nomaharwero ghendi
nokunyanda kwendi.
5Yoyi maharwero ghendi,
gha kuma kate kudiwiru.
NaNyambi gha dimuka ghuyi wendi.
6Mu mu huthere thika di gha mu hutherire namwe.
Mu yitende paruwadi pamurandu ghoyitenda yendi.
Gho mu mu pundere paruwadi mukopi yu gha mu
punderire namwe.
7Munyima dhokengeyo,
mu mu rikanyithere tjitju dhendi noyitokota yendi.
Yoyi ghaninga mumutjima wendi eshi:
‘Ame na hungumana yira fumu ghombuyama,
kadi no mudidhi.
Noyitokota, mbadi mbo ni yi mona.’
8Yodigho yinyandeka yendi,
mbo yi neya diyuwa dimweya eshi:
Kufa kotokotoko nondhara, no mbo ghana pu
kutumekera nomudiro.
Yoyishi mukangcamu Fumu Nyambi oyu ghana
kumutetera ndhango.”
9Nawafumu hopamuve awa ha tendire rungu nendi no kuvighara nendi, mbana mu direra no kumutokotera, apa mba mona kumwithi ghopadituna dyendi. 10No oku shime mba karera kokayenda, mbana yapa tjitju dhendi, ho mba ghambe eshi: “Mawe, mawe ghombara dhishokuru Babiloni. Ghombara dhokutanara, muthitunde thofotji yineya yipangura yoye.”
11Nawaghurithi hopamuve, mbana mu direra no kumutokotera. Yoyi hana piri oyu sho gha ghure karo mighuro dhawo. 12Mighuro dhawo ne, dhomangondo, no yikuvo, no tuwe, no makwarara, no makehe ghomarereya no ghokukihuruka, no yitondo yoyihe yothiwe thothiwa, no yishokora yoyihe yothindhovu, no yirughanitha yoyihe yoyitondo no yongoporo no yoyigenya yomande. 13No mukura, no munde no kathira no ghungongorwa, no vinyu, no maghadhi ghondhwe, no mundundungwa no tumbi no yiyama yoyikuru no ndjwi no mighuro dhombi no matemba nawapika no midhimu dhawanu. 14Mbuyo dhodhihe dhi wa rumberire dha kutunda. Noyoyiheya yi ya kutwedhimenine no kukusheghenyena ya kuyongara. No mbo kufere eshi kuyiwana karo. 15Nawaghurithi hoyinu yino, awa ha karire hatungi papendi, mba nemana kokayenda pakuyapa yinyanda yendi. Oku hana kumudirera no kumutokotera, 16ghuninga eshi: “Mawe, mawe, mbara dhishokuru edhi dha pwire kuyenga nomahina ghomakenu noghomakihu noghokurwedhima, nomangondo nomakwarara noyipako, yoyishi muviri dhofotji ghuna hanyaghuka ghutungi ghoghuhe”. 17Hakakuhinga wahe nawahe wa ha karire muyikepa nawarughani no wahe wa ha rughanine mudikuruviya, hemanine kokayenda. 18Ko kukugherera kwawo apa ha monine mwithi ghopadituna dyendi no ha ningire eshi: “Mbara munye dhodhikuru yira mbara dhi?” 19Ha kutunu kwawo rukungu pamitwi dhawo. Ha dhi direra no kudhitokotera witha eshi: “Mawe, mawe, kumbara dhishokuru, omu ha tungerire wahe wa ha karire muyikepa kughutungi wadho. Yoyishi dhina pu kuharan̂anya muviri dhofotji.”
20Ghu kanderere ghomawiru papendi, no pawapostoli, no pawaporofeta wendi hokupongoka. Nyambi ghana rikanyitha yipangura yokukwadho mumwenu.
21No muengeli yofotji ghongcamu, gha dhamunine diwe dyodikuru dyokuninga yira kakundhu, no kudivukumena mudikuruviya ghuninga eshi: “Kemo mbo gha kandja Nyambi Babiloni, ghombara dhishokuru no mbadi mba mu wana karo. 22No diywi dyawayishiki hotugoma, nawatumbimbi nawakamishigho nawakamapori, mbadi mba yiyuva karo mumoye. Karo mbadiko muyuwi ghokehe thiyuwa, oyu mba wana karo mumoye. Mandanda ghotukundhu mbadi mba gha yuva shime mumoye. 23Thishe thomunyenge mbadi mbo thi sheghenya karo mumoye. Diywi dyambandeki no dyamwandekeri, mbadi mba di yuva mumoye. Yoyishi, haghurithi ghoye, wo ha pitererire pamuve. No paghurodhi ghoye, po gha karerire marudhi ghomahe thivunganyi.”
24Manyinga ghawaporofeta nawapongoki nawahe wa ha pwire kupagha pamuve, ha gha wanine mumwendi.
Currently Selected:
Yihokora 18: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
