Yihokora 20
20
Shatani yu ha ghangire myaka diyovi. Hakakutawa hana kuraghura pofotji naKristusi
1Ko kumona kwange muengeli ghana kushuruka mudiwiru notjapi dhawakamwishi, nodyenge dishokuru munyara dhendi. 2Ha koko kwendi dikongoro thikuru‐yoka, shadipinyi ngambi Shatani. Gha mu ghangire eshi gha kare mo myaka diyovi. 3Ha mu vukumena mughudhungi no kumutjapera. Gha mu pakire thidimukitho eshi, maghana sho gha pemukithe marudhi, kate kupwa myaka diyovi munyima po mbo ha mu shutura kamanana.
4Ame ha ni mono mapuna, nawa ha hungumanine po ha wa pire ghupanguri. Ha ni mono karo midhimu dhawa ha tetire mitwi paghunongononi ghokwaJesusi no paman̂ando ghaNyambi, nawa ha dhirire kukanderera kuthitjwandjo, nawa hapirire thidimukitho thatho pamitwi dhawo no pamakandeke ghawo. Awo ne ha parire no ha pangurire yira hafumu, pofotji naKristusi myaka mayovi. 5Nawafumu hamwe, mbadi ha parire shime kate dha rikanyine myaka diyovi. Oghu ne ghomuvumbukero thokutanga. 6Mukaruvigha no mupongoki oyu gha yerana kumuvumbukero ghokutanga. Kukwawo ne mbadiko ngcamu dhokufa ko ruwadi. Awo mbana kara hapristeri waNyambi no waKristusi. No mbana pangura nendi yira hafumu myaka diyovi.
Shatani hana kumushutura no mbana mu witha kuroruheya
7No apa mbo dhi yara myaka diyovi, mbana mu shutura Shatani mun̂otwa dhendi. 8Ene mbo ghana yendi kukupemukitha marudhi ghomumitara dhine dhomuve Gogo naMagogo. No kuwakongwedha gha tende yita. Thitara thawo ne yira ruheke romudikuruviya. 9Awo ha surukire ha kudhinge mu ghuyaghayu ghokaye, gho ha dhingumwetwedhire nanda dhawapongoki no mbara dhodhihakwa. Mudiro waNyambi wa rokwire mudiwiru no wawathanyunine. 10NaShatani yu ghawa pemukithire, gha pwire kuvukumena mudirara dyomudiro, omu tha karire thishereka namuporofeta ghombango no mbana yuvu tjitju kuroruhe nororuheya.
Ndhango dhoghuhura
11Ha ni mono kwange dipuna dishokuru dyodikenu, noYu gha hungumanine po, ya yakunukire kurupara rwendi diwiru no muve no mbadi ha wanine dyango. 12Ko kumona kwange hafu, hakuru nawanuke ha nemana kughutho waNyambi, mambapira oku ghana yandhuruka. Mbapira dhimweya, dhombapira dhomoyo, nawafu hana kuwapanura ko yi ha wa tjangera mo, po payitenda yawo. 13Dikuruviya dya tapire kufa kwawa ha karire mo. Kufa no ditunga dyawakamwishi ya tapire kufa kwawa ha karire mo. Nawo ha pwire kutetera ndhango, keheyu popayitenda yendi. 14Kufa no ditunga dyawafu ya pwire kumwaghera mudirara dyomudiro. Oku ne ko kufa koghuwadi. 15No ngeshi kuwana ghumweya eshi mbadi ghapwa kutjanga mumbapira dhomoyo, oyu ne ghana kupwa kuvukumena mudirara dyomudiro.
Currently Selected:
Yihokora 20: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
