Hakakolose 3
3
Amwe ne pofotji naKristusi mwa vumbukire
1Ngeshi pofotji mwa vumbukire naKristusi, mu shane yinu yomudiwiru, oku gha kara Kristusi no gha hungumana kurudyo rwaNyambi. 2Mu ghayare yinu yomudiwiru, kadi yopamuve. 3Yoyishi mwa fire, no moyo wenu wapwa kundeka pofotji naKristusi mwaNyambi. 4Apa mbo gha hokoka Kristusi ghomoyo wenu, namwe mbo muna hokoka pofotji Nendi mughufumu.
Yipara yopakare noyoyipya
5Yodigho, mwa kona kupagha yinu yopamuve eyi yidi mumwenu, yira rungu, kupira ghukushuki, didovo dyodimango, yirumbera yoyimango, noghunu yira hanyambi hombango. 6Payinu yi yokenge yo, po gheya mahumbithero kwawanu wa ha kara ha thururu kuKwendi. 7Pakare‐kare, namwe mwa tendire yinu yiapa mwa parire mumwayo. 8Ene mwa kona kuthigha yinu yoyiheya yi pashadyarero yira: ghughandhi, thidhimbo nomatuka. Dishanga dyodishawana ne dya kara mutunwa twenu, 9no mwa kwangera. Amwe ne mwa thigha yikaritha yawatukuru, 10ho muna kupara pan̂anyi‐n̂anyi mumoyo wamunu ghomupya. Oyu gha kutendurura shime kuthishwi thaMuvareki wendi no kate kughudimuka ghoghuyara waNyambi. 11Eyi ne kadi yihima yaWahirika naWajuda. Yomaken̂eno endi yoghupumuru, makutjakero ghomandimi, kupira mi, ghupika endi muhoro. Muyinu yoyiheya yi ne, mo gha kara Kristusi.
12Amwe, mwatorori waNyambi yu gha mu haka thikuma. Yodigho mwa kona kupara thiwana pofotji. Mu kuyuve, mu kumbirupithe, mu kare noghunongo noghudhughutjima. 13Mu kare ghudhidhimeka no mu kuthigherere, ngeshi ghumweya oku gha nepitha muyendhendi. Thika di gha mu thigherera Fumu, namwe kemo dyo sho mu tende karo mukuthigherera hayendhenu. 14Muyinu yoyiheya yi, thothikuru po ne eshi, mwa kona kukuhaka pofotji. Edi dyodinungo di mwa ku kwata pofotji mumakupakerero ghokuyara. 15Thiraro thi gha tapire Kristusi, tha kona kunegha yiparitha yenu. Nyambi gha mwitha kare eshi, mu kare yipo yoyirama yofotji mukupara pofotji muthiraro. Mu tumerange roruhe. 16Mbudhi dhaKristusi dha kona kuyarerera mughutungi wadho mumwenu. Mukuhonge no mukuhangathane noghunyanyami ghoghuhe. Mumitjima dhenu, mwa kona kwimba matumero mumipisalemi, membo ghomakughero no membo ghokupongoka kwaNyambi kudifumanekere dyendi. 17No yoyiheya yi muna kughamba no kutenda, muyighambe no muyitende muDina dyaHekudyetu Jesusi no mu tumere Nyambi Wihe paPendi.
Yikara yopofotji
18Mwakamadi, mu kare ghutawedhi kwawatutughuru wenu, thika di ya rikanya kwawanu wa ha tawa mwaFumu.
19Mwarume namwe, mwa kona kuhaka hakamadi wena no mwa wa rwera difupa.
20Amwe mwana, mu kare noghutumanethi kwawawihenu muyinu yoyihe. Yoyishi, dyo gha yihimena kwawanuke wa ha tawa muMwendi.
21Mwawiha, mwa shana kehe pano murandu kwawana eshi wangu hapire mukakuwakorera.
22Mwapika, mu kare noghutawedhi kwawa mwa rughanena pakaye kano. Mwa rughana eshi ha kughe yirughana yenu no mu wane fuma kwawanu ho kenge yo. Ene mu rughane nomutjima ghoghuwa, kudfumanekero dyaFumu. 23Yoyiheya yi muna kutenda, mu yitende nomutjima ghoghuhe thika di gha yihima Fumu. Mbadi kwawanu. 24Yoyi mwa dimuka eshi, amwe ne mbo muna wana ndjambi dhenu kwaFumu edhi gha mu turekera. Kristusi ne yoFumu yu muna kurughanena. 25Ene yu ghana kutenda ghuyi, mbo ghana pu kuhumbitha popaghuyi wendi ghu gha tenda. Fumu ne mbadiko yu gha pongora.
Currently Selected:
Hakakolose 3: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
