Hakakolose 2
2
Mashingero ghokumapemukero
1Ame na haka eshi mwe, mu kone kudimuka edi na tokomena thikuma kukwenu, nawatawi hoMulaghodisiya. No kwawamweya wahe awa na dhira karo kumona panganyi. 2Thitambo thnage, nawo hapwe kutjokedha. Wahe ha kare nomutjima ghofotji eshi, ha yikwate thiwana nodighano. Kemo sho ha kone kudimuka thithithatero thaNyambi. Thithithatero thi ne yoKristusi. 3No muMwendi mo wonda ghutungi ghoghunya‐nyami ghoghuhe noyidimuka.
4Ame kudhundeka na kudhundeka yi eshi, noyofotji temba yu sho gha mu pemukithe noman̂ando ghombango. 5Nga ha ni piripo me, ene nenu nidi mumupepo. Gho na shambemberera pakumona yikara yenu yoyiwa nomatawero ghenu agha gha tanara mwaKristusi.
Mu pare mughundambo naKristusi
6Yoyishi thika di mwa tumbura Kristus Jesusi eshi yoFumu, mwa kona kupara mughundambo Nendi. 7Mumwendi mwa wana midhi no paPendi ha mu shokekera ho mwa tanara mumatawero thika di ha mu honga. Ho mwa yara nomatumero.
8Mu koneke eshi, noyofotji temba yu gha kona kumuyakunutha kuKwendi noyihongaghura yomapemukero. Yoyiheya yi, ya tunda muyithimwetwedha yawanu pamatangero ghokaye kano. Ene kadi paKristusi. 9Mumwendi mo wa kara ghuyara waNyambi ghoghuhe, 10no makurupero Nendi nenu. Po mwa rikanyena kuKwendi.
11Pamakupakerero ghenu Nendi, po mwa pwera kuken̂a. Ene mbadi maken̂eno gha ha paka po hanu. Ene nomaken̂eno ghaKristusi. Agha gha kara mukushutuka mudiharwero dyoghunu. 12Eyi ne padiyoghero ya hokokire, apa ha mu vumbekire pofotji Nendi. Yoyishi mwa tawire mungcamu dhaNyambi, Oyu gha mu tumunine mwawafu. 13Amwe ne mwa fire muyiharura yenu nomughunu wenu ghoghupumuru. Nyambi ne gha mu tumunine pofotji naKristusi. Pakututhigherera maghuyi ghetu ghomahe. 14Aye ne gha dhimithire thineghidhitho thomirandu dhetu. Gha dhi tumburapo no gha dhi pamarera kuthikurushe. 15Aye gha kungurire hakangcamu noyitwa no ha wa hokorire kumbandhamboghera, pakukara mun̂otwa dhomumawithero ghopaKristusi.
Gha mu pemukitha ghumweya nokamanana temba
16Yodigho mwe, mbadiko ghumweya yu gha kona kumurawera eshi, nye sho mu dye no kunwa, ngambi mu tende mafeste ghomushamurukero ngambi mu teramo ghokaghonda endi Sabata. 17Yoyiheya yi ne mumvure ghu mbo wiya! Thinda Kristusi vene. 18Mbadiko ghumweya yu gha kona kumuyedhaghura kuthihemo thokumandapero ghendi, ghokwawaengeli no mukukumbirupitha kwendi, noyu gha kupa eshi aye ne gha mona muyipumba yendi yishwi yoyihe. Munu ghokemo, ghana kununeka thinda mughunyanyami wendi. 19Oyu ghokemo gha shwena kutanarera mwamukamiti eshi, Kristusi. MwaKristusi mo ya tunda yipo yoyiheya eyi yaghamwena maghoyawero no yi ya yenditha maruthipa pofotji, thika di gha yitendire Nyambi.
Amwe ne pofotji naKristusi mwa fire
20Amwe mwa fire pofotji naKristusi, kuninga yina kuninga eshi yoyifa yokutanga yopakaye kano. Nye muna kuparera shime yira mwakakaye kano? Nye muna kutawera kumiragho dhodhihe: 21“Yira, apa ne wa kwatako!” “Oku ne wa kundeka ko kanwa koye!” “Oku ne perere poye eshi ghu kundameko!”? 22Yoyiheya yapwire kutenda kumahimeno, kuyirughanitha no ya kona kupwa, ayo ne yihongaghura yawanu. 23Yihonga yi ya kara noghunya‐nyami ghombango nothishongero thi ha tenda hathinda, nomakumbirupithero nomakuhuthero ghoyirama. Ene yoyiheya mbadiko mudyo kumadhi‐dhimekero ghomayedhawero ghomaharwero.
Currently Selected:
Hakakolose 2: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
