Hakakolose 4
4
1Namwe mwanumwene, mu rughanithe ghuhunga hapikenu, pathina muragho eshi namwe karo mwa kara noHekudyenu ghomudiwiru.
Mu rapere no munyangwe noghunya‐nyami
2Mu tanare mum ndapero! Mu rawe no mu tumere. 3No mu turaperere namwe karo eshi, Nyambi gha tu yandhwerere mbudhi tu kone kuyuvitha thithithatero thaKristusi, ethi na karera me mun̂otwa. 4Mu raperere eshi name mbo ni kone kuyuvitha mbudhi thiwana thika di ha dhi nipa.
5Mu tende noghunya‐nyami nawanu wa ha dhira kukara mumbunga dhenu. Amwe ne mu rughanithe yi mu kehe nako. 6Mukuninga eshi, eyi muna kughamba mwe, mwa kona ndani kukara noghunongo no kunongonona ghushemwa, no ngepi di ghokuhuthera kwakehe yu ghana kumwipura. 7Tigikusi ghomutawi muyendhange, oyu na haka thikuma. Mbo ghana mu tongwera yoyihe eshi, ngepi di muna kupinduka. Aye ne mukareri ghokukurpera no gha rughana pofotji nange muthirughana thaFumu. 8Ame kutuma na kutuma kukwenu eshi, na mu yuve edi tudi kuno. No kemo dyo sho gha tundithe yitokota yenu. 9Onesimusi ghomutawi yu na kuruperire ghomuyendhange, oyu na haka yofotji ghopapenu, mbo gha neya nendi. Awo mbo hana na mu tongwera eshi, yinye yi yidi kukwetu.
Dirumeritho
10Arisitagusi yu nidi nendi mun̂otwa, ghana tumu dirumeritho kukwenu. Na Markusi karo, ghomwepa Barnabasi, ghana mu rumeritha mwahe. Kukwendi yu mwa wana yirughana pakutanga: no ngeshi mbo gheye kukwenu, mwa kona kumutambura nomoko mawadi. 11Karo na kumutumena Jesusi yu hatoya eshi, Justusi dirumeritho kukwenu. Awa Hajuda hashahatu, pithawo hana kurughana pofotji nange mughutungi waNyambi. Awo ne wo haghamweni wange hashokuru.
12Epafrasi, ghumweya ghopapenu, naye ghana mu rumeritha. Aye gha kara muthirughana thaKristus Jesusi no ghana mu rapereranga kehe pano thikuma eshi, mu tanare mu kure mumidhimu no mu kare ghutawedhi ghokuyara kumahimeno ghaNyambi. 13Oyu ne na kona kumunongwenena eshi gha rughana yinu yoyingi kukwenu no kwawatawi homuLaghodisiya no muHirapolisi.
14Lukasi ghonganga yu na haka thikuma, na Demasi hana mu rumeritha thikuma. 15Mu tware dirumeritho dyange kwawatawi homuLaghodisiya no kwaWakanimifa no kumbunga dhi dha kupakerera kehe pano mumayugho ghawo.
16Apa dha kupwa kumutoyera dhi mbapira, mwa kona kudimuka eshi, ha ka dhi toye karo kughutho ghombunga dhenu dha Wakalaghodisiya noyu mbo gha shwagha muLaghodisiya, naye karo mwa kona kuyimutongwera.
17Mu mu tongwere Argipusi eshi: “Tolomene nomoko mawadi kuthirughana thi wa wana kwaFumu, eshi ghu kone kuyikumithamo.”
18Pano nonyara dhange nothinda na kutjanga. Ghurumere Paghulusi.
Ni vuruke muno mun̂otwa nidi.
Thin̂eke mbo thi kare nenu.
Currently Selected:
Hakakolose 4: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
