2 Hakatesalonika 2
2
Munu yu ghapira muragho
1Ene pano mwayendhange, yomwiyero waHekudyetu Jesus Kristusi, no makupakerero ghetu nendi. Ethi ne thothinu thothikuru ethi na kumukanderera: 2Mwa yongara wangu, ngambi ha mu hongaghura hanu, apa mbo mu yuvitha diyuwa dyaFumu endi mbadi mbo di kara po ngambi mba ghambe kukwenu mundimi dhoghupumbi ngambi muyiyaghura endi mumbapira edhi mbo dhi tunda kukwetu. 3Mbadiko munu yu gha kona kumupemukitha pamuhingo ghumweya karo. Yoyishi, diyuwa dyaFumu, mbadi mbo diya kughutho ghomayowero ghawa ha nyenga Nyambi, nawanu wa hapira muragho ha wa turekera kufa kokuyi. 4Aye mbo ghana nyatha yoyihe yoGhunyambi, ngambi yoghupongoki yi ha fumaneka, aye mbo hana mu yeyura kupiterera wahe. Mbo ghana kakutura mutembeli waNyambi no kukutoya eshi yene Nyambi.
5Mbadi muna kuvuruka eshi rwingi na yi mu tongwerire apa na karire nenu ndi? 6No muna dimuka eshi, thinye thina kumushweneka, kate mbo dhiye nako dhendi apa mbo gha hokoka. 7Ngcamu dhoghudhindo edhi dhapira muragho, kare dha tanga kurughana mughudhindo. Ene yu gha shwena mukakupira muragho, yo sho gha kone kushwagha mundhira pakutanga. 8Munyima po mbo gha hokoka muyi thinda kughutho. Ene apa mbo gheya Fumu Jesusi, mbo ghana mu hanyaghura po, no mun̂u ghomukanwa kendi nothin̂eke, thopamuhokokero mbo thina pu kuhanyaghura. 9Mwiyero wamuyi, mbo ghuneya nongcamu dhaShatani, gha kuna neghe mangcamu ghendi noyidimukitho yombango noyitetukitho yayo‐nayo. 10No ghawaghombekire noghukenya awa ha yongara. Pamurandu ghokudhira kutawa ghushemwa wo, no mbadi ha tawire kumaghamweno ghawo. 11Po ghawa pererire karo Nyambi ngcamu dhomayongarero eshi, mbo ha tawe kumbango. 12No kemo dyo mbo hapwa kutetera ndhango awa ha dhira kutawa ghushemwa. Yoyishi awo ne ha torora ghuyi.
Matumero kwaNyambi
13Mwayendhetu, tu kone kumutumera Nyambi roruhe mumwenu. Fumu ne gha mu haka. NaNyambi gha mu torora eshi, mu kare nomaghamweno kutunda kumatangero. Amwe ne mwapwa kughamwena. Yoyishi, Mupepo wa mu pongwera kukwendi no yoyi mwa tawa kughushemwa. 14Pambudhi edhi tuna kumuyuvitha, po gha mu torwera eshi, mu yerane namwe kughufumu waHekudyetu Jesus Kristusi.
15Mu tanarere ne mwayendhetu, no mu kwate yihonga yi twa mupa. Ngambi yomuyiyaghura yetu, ngambi yomumbapira.
16Gha mu tanarithe Nyambi, muyoyihe yoyihunga muman̂ando no muyitenda, paHekudyetu Jesus Kristusi, ghoWihetu. 17Aye gha tu neghedhire ruhakitho no gha tupire mahengawero ghendi, ghororuheya nomakurupero ghomawa pathin̂eke thendi.
Currently Selected:
2 Hakatesalonika 2: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
