2 Hakatesalonika 1
1
Mbapira Dhoghuwadi Kwawakatesalonika
1Edhi dhina kutunda kwaPaghulusi, Silvanusi naTimoteghusi.
Kumbunga dhaWakatesalonika, edhi dha kundama kwaNyambi Wihetu naHekudyetu Jesus Kristusi.
2N̂eke nothiraro yaNyambi Wihetu, naHekudyetu Jesus Kristusi yi kare nenu!
Ndhango nomwiyero waKristusi
3Mwayendhetu, atwe tu kone kumutumera Nyambi kehe pano kukwenu. Karo eyi ne ghuhunga. Yoyishi matawero ghenu, kuvura ghana kuvura. Noruhakitho rokwawayendhenu ruvure roruhe. 4Yo tuna kughambere ghukutanaghura papenu mumambunga ghomahe ghaNyambi. Gho tuna kuthimwetwedha yomatjimapero no yomatawero ghenu, no yomarupetho ghenu no muyinyanda yoyihe eyi mudi nayo.
5Yoyiheya yi ne thineghedhitho thoghuhunga, thondhango dhaNyambi. Eshi Aye ne gha mu nuneka mughutungi wendi, oghu muna kunyandera karo pan̂anyi‐n̂anyi. 6Nyambi ne shemwa muhunga: Aye mbo ghana humbitha awa hana kumunyandeka. 7No kuyinyanda yenu yokukwetu, Aye ne mbo ghana yihuritha apa mbo gheya Fumu Jesusi nongcamu dhawaengeli wendi, 8awa mba hokoka mudiretha dyomudiro pakuskuruka mudiwiru. Munyima, Aye mbo ghana humbitha awa ha dhira kudimuka Nyambi, nawaha pira ghutawedhi kumbudhi dhaHekudyetu Jesusi. 9Mayongarero ghawo ghororuheya, mbo ghana kara mahumbithero ghawo kehe pano kughutho waNyambi no kungcamu dhendi dhoghufumu. 10Eyi ne mbo yina hokoka mudiyuwa dyomwiyero wendi. Apa mba fumaneka awa ha taterera kukwendi, mbo mu kutekere wahe awa ha tawa. Namwe po mbo mu kara, yoyishi namwe mwa tawa ghunongononi wetu.
11Yo tuna mu rapereranga eshi, Nyambi gha mu tende mu kare mumoyo ghu gha mwithera. No gha kone kuyaritha ruhakitho rwenu pangcamu dhendi rokuyinu yoyiwa, no kuyirughana yomatawero ghenu. 12Pamuhingo ghokemo, po mbo difumanena Dina dyaHekudyetu Jesusi. Namwe karo mbo muna fumanena paPendi, mumakupakerero ghothin̂eke thaNyambi no thaHekudyetu Jesus Kristusi.
Currently Selected:
2 Hakatesalonika 1: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986