2 Hakatesalonika 3
3
Mu tu raperere
1Shime karo mwayendhetu, mu tu raperere eshi n̂ando dhaFumu dhitapathane wangu no dhiwithe kokuhe thika di yidi ko kukwenu. 2Mu tu raperere karo eshi, tu komonoke kwawapemuki nawamango. Yoyishi waheya ne kadi hatawi.
3Fumu ne matjimapero. Aye mbo ghana mu tanaritha no kumukunga kwaMuyi. 4Atwe ne twa mukurupera paFumu mumwenu eshi, mu tende no mbo muna tendi eyi twa mu turekera.
5Fumu gha ture yighayara yenu, paruhakitho rwaNyambi no madhidhimekero ghomwaKristusi!
Ghutoghoro ghomuyirughana
6Mwayendhetu, kurawera tuna kumurawera muDina dyaHekudyetu Jesus Kristusi eshi. Mu tunde kwakehe yu ghomuva no mwa mu kupakera kuyirughana yi mwa tamburire kukwetu.
7Amwe mwa yidimuka mwathinda eshi, thitamenedhi munye thi twa mu pire ethi sho mu kuthe. Atwe ne mbadi twa karire noghuva kukwenu. 8Ngambi mbadi twa parire kwayaghumweya. Karo twe twa rughanine ghuthiku nomutenya no twa hupire thikuma kayuwa, mu kudhira kumotokotitha. 9Mwa ninga eshi, mbadi di sho tu mu tende twe nongcamu dhokumukunga. Ene tuna himi kukara thitamenedhi thenu, ethi sho mu kone kukutha. 10Apa twa karire shime nenu, twa mu thundawedhire ghuninga eshi, ngeshi ghumweya ha shwena kurughana, mbadi gha kona karo kudya.
11Eyi tuna kuyiningera yi, yoyishi mwadi hava mumwenu. Awa hana kudhira kurughana hathinda, no kukukumbeka kuyinu yawamweya. 12Hanu hokenge yo, twa warawera no kuwashinga pangcamu dhaHekudyetu Jesus Kristusi eshi, ha kone kutokomena thirughana thawo, ha wane mo muparo.
13Yokukwenu mwayendhetu, mwa twama mukutenda ghuhunga. 14No ngeshi ghumweya ha kanana marawero ghetu, thika di yidi mumbapira dhetu dhi tuna mupa, mu mu tunditheko no mu mu yedhe kate ghafe honyi. 15Mwa mu tenda yira munyathi. Ene mu mu hungeke yira muyendha.
Makandadhekero
16Gha mupe Fumu, ghodivetu‐vetu dyothiraro thororuhe muyoyihe thiraro! Fumu gha kare nenu!
17Pano nthinda na kutjanga nonyara dhange. Edi no ne dirumeritho dyange me Paghulusi. Kemo dyo na dimukithanga mu kehe mbapira dhange. Edhi ne dhonyara dhange.
18Thin̂eke thaHekudyetu Jesus Kristusi, thi kare nenu mwahe.
Currently Selected:
2 Hakatesalonika 3: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
