2 Petrusi 3
3
Mwiyero waFumu no diyuwa dyondhango dhoghuhura
1Mwahakwa, edhi no ne dhombapira dhoghuwadi na kumutjangera. Mumambapira mawadi gha, na yerekire karo kumuvurukitha kuyighayara mwene, pakumukotora, 2kuman̂ando agha ha ghambire haporofeta hokupongoka pakare‐kare no muragho waFumu ghoMushuturi oyu mwa wanena papendi hapostoli.
3Pakutangerera mu dimuke eshi, mumayuwa ghoghuhura mbo pana kara hakamusherero awa ha kurawera hathinda payipara yawo noyirumbera yawo. Awo mbo hana sherera 4ghuninga eshi: “Nye ne keho yina hokoka pamatoyedhero ghomwiyero wendi karo? Hakerekandongo wetu ne kare hafa. Ene shime ya karera thika di ya karire pamatangero ghomavarekero ghokaye.” 5Payinu yi, awo ha vurama nyara‐nyara eshi, pa karire diwiru nomuve pan̂ando dhaNyambi kumayakunuthero ghomeyu agha gha karire po. 6No karo pamurandu ghomeyu ghodivavure po kahanyaghukerire kaye. 7Ene diwiru no kaye, pashadyarero ne ya kara po no ha yipungwera kudirara. Karo mudiyuwa di, ha tetera ndhango hanu awa ha dhira kutawa mwaNyambi no kuwahanyaghura po.
8Thinu thofotji ne, mbadi mwa kona kuthivurama, mwahakwa: Yoyishi kwaFumu, diyuwa dyofotji ne yira myaka diyovi, myaka diyovi ne yira diyuwa dyofotji. 9Fumu, mbadi gha kara maranga mukurikanyitha matoyedhero ghendi. Thika di hana kuyighayaranga hanu hamweya. Mbadi kemo, Aye ne mudhughutjima kukwenu. Yoyishi, Aye gha hima eshi mbadiko ghopapenu yu mbo gha yongara. Karo gha haka eshi ngo ha kona kupiruka wahe.
10Ene diyuwa dyaFumu, mbo di neya muvindjwera yira mwidi. No mudiyuwa di mbo dina dhongonoka diwiru nomudikitero ghoghukuru. Mashani ghodiwiru, mbo ghana runguna no mbo gha nan̂a. Muve no yoyihe yi ya kara po, mbo yina dhongonoka. 11Ene apa mbo yipwa yinu yoyiheya yi, mwa kona kuyapa Nyambi thikuma, no kukutapa kukwendi mumoyo wenu ghoghuhe. 12Mu pare mughutaterera eshi, diyuwa dyaNyambi ne dina kumu, no mu kwinduke kudiyuwa edi mbo dyan̂a diwiru kumaretha no pakuhoghoroka mashani ghodiwiru. 13Ene twe diwiru dyodipya tuna kutaterera nomuve ghoghupya eyi gha tu toyedhera Nyambi, omu mbo ghu kara ghuhungami.
14Yodigho, mwahakwa, oku shime ha mu taterera yinu yi, mwa kona kutoghoropa eshi mu pire murandu nokamyandhumayandhu temba kughutho waNyambi, no mu pare pofotji Nendi muthiraro. 15Mu ghayare ghudhughutjima ghu gha kara nagho netu Hekudyetu, kunako dhomaghamweno. Kemo dyo gha mu tjangerire karo muyendhetu Paghulusi noghunya‐nyami oghu ha mu pire. 16Yinu yi, gha yi yuvitha karo mumambapira ghendi ghomahe, agha gha tjanga. Mumambapira ghendi moyidi yinu yoyikukutu mukuyitjwathana. Awo ne hanu awa ha dhira kupathuruka nawa ha pira matanarero, kwawa hana kutapa mapathwerero ghomayi, thika di ha yitendanga karo muYitjanga, kate kumayowero ghawo hathinda.
17Mwayendhange homwahakwa, eyi no ne kare mwa yidimuka. Yodigho mu koneke eshi, maghana sho mu were mumapemukero ghawanu awa ha pira didhi dyoshemwa. No kemo, mbadi ha kona kumukungura ghutanara wenu. 18Mu koneke eshi, n̂eke noghudimuka Fumu no Mushuturi wetu Jesus Kristusi, yivure mumwenu.
Kukwendi ghufumu pashadyarero kate kuroruheya! Amen.
Currently Selected:
2 Petrusi 3: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
