2 Petrusi 2
2
Hahongi hombango no yihonga yawo yombango
1Ene pa karire karo hapumbi hombago mukatji ko diko. Kemo karo dyo mbo pa kara karo hahongi hombango mukatji kenu. Awo mbana reta yihonga yawo yoyiyi yombango. No mbana hamura Fumu oyu gha wa komonona. Kemo mbo ha kuwithera hathinda wangu mukunyanda. 2Thingi thawanu, mbana kuthu ghuyi wawo no payitenda yawo mbana shamuna Ndhira dhoghushemwa. 3Mudidovo dyawo, mo mbo ha mu tundithera yoyihe pambango dhawo. Ene ndhango dhawo dhapwa kutetera kare. No mayowero ghawo ne, mbadiko yu mbo gha gha shinga.
4Nyambi, mbadi gha kupungwerire haengeli wa ha harurire. Aye gha wa thindekerire mumudiro ghororuheya, no gha wa ghangire ha kare mun̂otwa dhomakokore, kughutho ghokuwatetera ndhango. 5Aye mbadi gha kupungwerire karo kaye kopakare‐kare. Ene gha retire divavure pakaye, kwawanu awa ha dhirire kutawa. Shimengwa Noghe pithendi ghomuyuvithi ghoghuhunga, nawanu kwoko nohawadi wa gha parithire ko. 6Munyima gha teterire mambara ghaSodoma naGomora, kundhango dhomaharan̂anyeno, no gha gha tumekire po kate kumututwi. Thitamenedhi thi, gha thi neghedhire Ye koyi mbo yiya kughutho wawanu awa ha dhirire kutawa kwaNyambi. 7Aye ne gha parithire Loti, murume ghomuhunga. Oyu ya tokotithire yikara yoyimango yawanu horungu. 8Apa gha karire kehe diyuwa mukatji kawo murume yu, ghomuhunga, gha monangire yitenda yawo yoyimango, yishawingi, no yinu yi ya tjitjupithire mutjima wendi ghoghuhunga. 9Yodigho, Fumu gha dimuka kughamwena mukareri wendi, mumayerekero, ene mukuhumbitha awa ha dhira kutawa mwaNyambi no mudiyuwa dyomatetero. 10Thikuma ne mbo hana wana mahumbithero, awa ha kutapa kudidovo dyoyirumbera yoyirama, nawa ha shamuna ngcamu dhaFumu.
Hahongi wa, ha kununeka no hakadihuna no mbadi ha fumaneka mangcamu ghodiwiru, karo ha gha shwahura. 11Ngambi haengeli awa ha kara nongcamu thikuma dhokupiterera, mbadi ha wa shamwena kughutho waNyambi. 12Keho ne hanu wa kughamba hana kughamba kuyinu yodishamu, eyi hana kudhira kutjwathana. Awo ha kara yira yishereka yokupira maghano, eyi ha kwata no kuyipagha. Nawo mbana wa pagha karo yira yishereka yi. 13Awa ha dhira kutawa mwaNyambi, mbo hana wana ndjambi dhawo kwawa ha dhira kutawa mwaNyambi. Awo ne ha haka kutenda mayuwa ghomakuru ghomadovo ghoyirama yawo, pamutenyamwiru. Ene pakudya nawo pofotji, awo ne ha kara nodidhiro nohonyi. Yoyishi, ha kara noyikara yoyimango. 14Meho ghawo ne didovo keho. Kumaharwero ghawo, mbadiko thi hana kuwana po. Karo wo, kupemukitha hana kupemukitha hanu awa ha dhira kutanara, no ha kara hamambungu ghomasherenyi no hapwa kukuta thikuto. 15Ha thigha ndhira dhoghuhunga no ha yongara. Awo ha kuthire ndhira dhaBelighamu, ghomwana Beghoni oyu gha himine kuwana manyinga mughudhindo. 16Ene gha pwire kuhumbitha kumurandu wendi ghu. Yoyishi, thidhina thishighamba, tha ghambire yira munu no tha hurithire ghuthuta ghoyitenda yamupumbi ghombango.
17Hanu wa ne, ha pitura yira mavetu‐vetu ghokupwerera no mandavuyi ghokukuyuruka kudingundunga. Awo ne hapwa kuturekera dyango dyodikokore dyodihungu. 18Yoyi ha haka dihuna no ha ghamba yinu yokupira mudyo. Padidovo dyawo no payipara yawo yoyimango, ha hongaghura hanu awa hana kushana kutunda mundhira dhomapemukero. 19Karo wo, ha toyedhera mashutukero kwawanu ho kemo mashutukero, ngambi kenge ha para hathinda mughupika ghomashinyihero. Yoyishi ngeshi wa kara mungcamu dhothinu, nowe karo ghomupika watho. 20Hanu wa ha shwaghire mughuyi ghokaye, pamurandu ghokudimuka Hekudyetu Jesus Kristusi, munyima ko kuwakwata mo karo no kuwawitha, ghuyi wawo ghopaghuhura ne wa piterera ghopakutanga. 21Ghuhunga kukwawo ne ngo mbadi ha dimuka ndhira dhoghuhungami, yira ku ha dhi dimuka no ha shwene karo muragho ghokupongoka oghu ha wa pa. 22Man̂ando ghomathaghano gha ninga kukwawo eshi:
“Mbwa ne kuhukera karo kughuruthi wendi,”
karo eshi:
“Thinguru thi thina pu kuyogha,
thina ka kuposha shime mumatapa.”
Currently Selected:
2 Petrusi 2: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
