1 Hakatesalonika 5
5
Mwiyero waFumu
1Mwandenge, kunako no yivaka no pa mbo yihokoka, mbadi twa nyanda shime eshi, tu yimutjangere mwayendhange. 2Mwa yidimuka eshi diyuwa dyaFumu, mbo di neya muthivindjwera, yira mwidhi mughuthiku. 3Apa mboha ghamba hanu eshi: “Yoyiheya ne nyiki no thiwana yidi.” Popo mbo kuna wa mbandukera kunyanda, yira mukamadi yu ghana kunyatitha. No mbadiko yu, mbo gha yokoka mo. 4Ene mwe, mwayendhange, mbadi muna kupara eshi mudhire kudimuka eshi, diyuwa di, mbo dina mu mbandukera yira mwidhi. 5Amwe ne mwana munyenge no mwana diyuwa, atwe ne kadi twana ghuthiku no makokore temba. 6Mbadi twa kona kurara yira hawo‐nawo. Tu kothoroke no tu kukongore. 7Oyu ghana kurara ne mukaghuthiku. Nawa hana kuterera, nawo hakaghuthiku. 8Ene twe twakamutenyamwiru, tu kone kukukongora eshi, tu shupate pamuyidi thidimukitho thomatawero noruhakitho, nomakurupero ghopamakomweneno, thikare yira shumbero. 9Nyambi mbadi gha tu ghayarera mahumbithero. Ene eshi, tupwe kukomonona paHekudyetu Jesus Kristusi. 10Aye ghafire pamurandu wetu eshi, mbo tu kone kupara nendi pamwiyero wendi karo, ngambi ku shime twayumi, ngambi ku twafa.
11Mukutjokedhe ne, no mukutanarithe noman̂ando ghano, thika di mwa tenda namwe karo pakutanga.
Yihimena yoghuhura
12Mwayendhetu, tuna kumukumbera eshi: Mu vuruke hanu wa ha rughanine thikuma mumwenu. No ha mu yendithire mukumuneghedha yihima yaFumu. 13Mu wa fumaneke muruhakitho rwenu rorukuru, pamurandu ghoyirughana yawo. Mu pare muthiraro pofotji.
14Mwayendhetu, atwe, mumitjima dhenu tuna kuyidhundeka eshi: Mu neghedhe thiwana awa ya dhira kurogha yikara yawo. Mu tjokedhe hakamataweroghana, mu ghamwene hakashu no mu kare ghudhughutjima nawahe. 15Mu koneke eshi, mbadiko yu gha kona kukuhuthera ghupata noghupata. Mu tokomene thikuma eyi ha haka hayendhenu nawanu hamweya.
16Mu shamberere roruheya. 17Mu raperere rwingi. 18Mu kare muyinu yoyiheya ghutumera. Yoyishi, yo gha tu taterera Nyambi kukwenu mwaKristus Jesusi.
19Mbadi mwa kona kwiman̂anyena Mupepo ghoKupongoka. 20Mbadi mwa kona kunyatha yighamba yawapumbi. 21Ene, mu kengurure yoyihe no mu kwate po yoyiwa. 22Mu tunde kuyinu yoyimango yoyihe.
23Nyambi ghodivetu‐vetu dyothiraro thothihe. Gha mupe ghuyara Wendi ghoghuhe ghokukwendi no gha mu kunge muyoyihe yokumupepo, kumudhimu no kuyirama. Eshi, mwa kupire ghuyi apa mbo gheya Hekudyetu Jesus Kristusi! 24Oyu gha mwitha, mbo ghana yitendi yoyishi ha mu kurupera.
25Mwayendhetu, mu tu raperere natwe karo.
26Mu rumerithe hatawi hayendhetu wahe nomacumitero ghoghuyendha ghoghukriste. 27MuDina dyaFumu, ame kutumangedha na kumutumangedha eshi, mu toyere hatawi wahe mbapira dhino kughutho wawo.
28N̂eke dhaHekudyetu Jesus Kristusi dhi kare nenu.
Currently Selected:
1 Hakatesalonika 5: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
