1 Hakatesalonika 4
4
Yipara yoghushemwa yokwaNyambi
1Pano karo tuna kara noyinu yokumwipura mwayendhetu. Amwe mwa kuhongire kukwetu edi gha hima Nyambi no ngepi sho mu kone kupara. Namwe karo mwa yitendanga. Ene muDina dyaFumu Jesusi tuna kumukanderera eshi mu yende shime kengeyo kughutho. 2Amwe mwa dimuka muragho, ghu twa mu yuvitha pangcamu dhaHekudyetu Jesusi. 3Eyi ne yo gha hima Nyambi eshi, mu kone kupara mughupongoki. Mu tunde kurungu. 4Kehe yu ghopapenu gha kone kudimuka eshi gha kone kupara namunu wendi mughupongoki no kukukutekera. 5Mbadi dya kona kumuyedhaghura didovo noyirumbera yoyimango mumitjima dhenu, yira hahayidena awa ha dhira kudimuka Nyambi. 6Muyinu yokenge yo, noyofotji temba gha kona kutenda mandunda endi kwangera muyendhendi. Yoyishi Fumu gha humbitha kuyinu yoyiheya yi. Kemo dyo twa yimutongwerire karo pakutanga, no twa yimuneghedhire thiwana.
7Yoyishi Nyambi mbadi gha twitha kughuyi. Ene kughupongoki. 8Yodigho oyu ghokunyatha mahimeno gha, mbadi ghana nyatha munu, ene Nyambi ghana nyatha, oyu gha mu tumenine Mupepo ghoKupongoka.
9Mbadi twa nyanda eshi tu mu tjangere yokukuhaka, Yoyishi, mwapwa kuhonga kwaNyambi thinda eshi, mukuhake. 10Eyi ne yo mwa tendanga namwe karo mwahe kwawayendhetu, hoMumasedoniya yomuhe. Yo tuna kumukanderera mwayendhetu eshi: mu runduruke shime kughutho. 11Mu pare mughuturumuthi ghofuma dhenu. No mu kunge yinu yenu mughushemwa no murughane nomoko ghenu mwathinda. Thika di yakara po. 12Kemo sho mu wane fuma muyipara yenu. Nodikuto kumbunga no mwa kurupera yawamweya.
Muvumbukero ghomwawafu
13Mwayendhange, mbadi tuna haka eshi mwa dimuka oyi yahokokanga kwawafu. Namwe karo mbadi mbo mu tokota yira wa hapira makurupero. 14Atwe twa tawa shemwa eshi, Jesusi ne ghafire no gha vumbukire karo. Kemo dyo tuna kutawa karo eshi, Nyambi mbo ghana tumuna hafu wa ha tawa muMwendi pofotji naJesusi. 15Kumanithera tuna kumumanithera yi gha ghambire Fumu. Atwe tudi ghuyumi, mbadi mbo tu piterera hafu pamwiyero waFumu. 16Apa mbo gheya marawero nodiywi dyamuengeli shokuru nodipori dyaNyambi, po mbo gha shuruka thinda Fumu mudiwiru. Awa ha fire naKristusi, wo mbo ha vumbuka pakutanga. 17Munyima atwe tudi ghuyumi, po mbo ha tu twara pofotji nawo mumavuyi mudiwiru, tu kakuhangane naFumu no mbo tu katunge roruheya naFumu.
18Mukuhengaghure pofotji noman̂ando ghano.
Currently Selected:
1 Hakatesalonika 4: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
