1 Petrusi 4
4
Oyu gha nyandire, ha mu rikanyithire kumaharwero
1Yoyishi Kristusi gha nyandire yirama vene, namwe karo mu kone kutanara muyighayara yenu, eshi oyu gha nyandire muyirama, ha mu rikanyithire kumaharwero. 2Paghuhura ghomoyo wendi ghopakaye, mbadi wa pwire kuraghura shime payirumbera yopathinaghunu, ene pamahimeno ghaNyambi. 3Pakutanga oku shime mwa karera mughuhayidena moyo dhenu dha karire rure mukudhiraghura yirumbera yenu yoghuhayidena yira: dishawana, didovo, ghutereri, dikarapashi no kukara mumambunga ghawa tereri, amwe pakukarera hanyambi hombango. 4Ene apa ha yi monine, hahayidena eshi dishawana dyenu shime ha di katwandundu, po ha mu shamwenine. 5Awo mbo hana yi kuroghithera no Yu gha kara po kukutetera ndhango hayumi nawafu. 6Po ha yuvitherire mbudhi dhodhiwa kwawafu, awa ha pwire kutetera ndhango, muyikara yawo yopathinaghunu, thika di ha tetera kehe yu. Awo dha wa yuvithire, eshi, ha pare mumupepo thika di gha para Nyambi ghuyumi.
Mukurughanene pofotji noyitapa yenu
7Ghuhura ghoyinu yoyiheya ne ghuna kokera. Yodigho, mwa kona kukuraghura no kukukongora mwathinda, eshi, mu kone kuraperera. 8Thikuma po ne mukuhake nomutjima ghokuyara pofotji, yoyishi ruhakitho ne rwondeka maharwero ghomengi. 9Mukuyumbura‐yumburange. Oku mbadi muna kukahopa. 10Ngeshi mwe mwa karire noghuyara n̂eke dhaNyambi, gha kona kehe yu gha wana thitapa thon̂eke kukarera ghumweya. 11Ngeshi ghumweya gha wana thitapa thokuyaghura, aye ne naNyambi ghana kughamba. Endi oku mumbunga ghana kuyikarera yi, gha kona kuyikarera nongcamu dhaNyambi. Kemo sho mu kone kufumana muyoyihe paJesus Kristusi. Kukwendi difumanekero kuroruhe nororuheya! Amen.
Yinyanda yothika Kristusi
12Mwahakwa, mwa yapa kumayerekero ghodirara edi mwa wana. Ethi ne mbadi thinu thothipya kukwenu. 13Mu shamberere vene muyinyanda yaKristusi, eyi mwa yerana. Yoyishi, po mbo mu yara namwe karo noyishamberera yoyikuru pamwiyero wendi mughufumu. 14Mwakaruvigha mwe muna kupwa kunyatha muDina dyaKristusi. Eyi ne kunegha yina kunegha eshi, Mupepo ghoghufumu, wendi, ghoMupepo waNyambi oghu ghudi papenu. 15Ngeshi ha nyanda yofotji ghopapenu, mbadi ya kona kukara eshi aye ne mupaghi, endi mwidhi ngambi thiharuri endi muheti. 16Ene ngeshi ha nyanda ghumweya aye ne: mukriste, mbadi gha kona kufa honyi kuyinu yi. Kuninga eshi eyi gha karera nodina di, gha kona kufumaneka Nyambi.
17Nako dhokutetera ndhango ne dhina kokera. Adho ne kutangerera dhina kutangerera mundhugho dhaNyambi. No ngeshi ngo ha tu tetere natwe, agha ne ngo mbo ghana kara matangero. Ngepi ne keho mbo gha kara mahurero, ghawa ha dhira kutegherera kumbudhi dhaNyambi? 18“Ngeshi mutawi, mbo ghana pu kughamwena pakapupi. Ngepi ne keho mbo yikara kwamudhimbi Nyambi no kwathiharuri?”
19Yodigho, awa hana kunyanda kumahimeno ghaNyambi, moyo dhawo dha kurupera paMuvareki ghomakurupero. No kutwara kughutho yitenda yawo yoyihunga.
Currently Selected:
1 Petrusi 4: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
