1 Petrusi 5
5
Hakuru Hongirishe ha kunge
1Ame no mukuru ghombunga dhawakriste, mukatji kenu no kanonga koyinyanda yaKristusi noyu mbo gha yerana karo kughufumu ghu mbo ghuhokoka. Yo na kutjokedhera me hakuru homukatji kenu. 2Mu kunge thiwana mbunga dhaNyambi, edhi ha mu pa. Mu wa koneke kadi nomuthineko. Ene noghuhima thika di gha yi wa kurupera Nyambi. Mbadi mukuwaruwerera, ne mumahimeno ghoye ghoshemwa muyikarera. 3Karo mwa kara ghunumwene kwawa gha mu pa Nyambi, eshi mu wa koneke. Ene mu kare thitamenedhi thombunga. 4No munyima, apa mbo gheya Mudithi Shokuru, mbo muna tambura thikoroni thoghunumwene ethi mbo thi dhira kudjiva.
Mukumbirupithe
5Namwe mwanuke, mwa kona kukumbirupitha kwawakuru. Mwaheya mwa kona kukufupipitha no mukughamwene. Yoyishi: “Nyambi gheman̂anyena hakadihuna. Keho ne hakakukumbirupitha, gha wapa n̂eke.”
6Yodigho mukumbirupithe keho mwathinda, kwishi dhodyoko dyongcamu dhaNyambi. Kemo mbo gha kona kumununeka mudiyuwa edi gha paka po. 7Mu tape yitokota yenu yoyiheya kukwendi. Yoyishi Aye ne yo gha mu kunga.
Mu shwene shadipinyi, Nyambi ne mbo ghana mupa ngcamu
8Mu kukongore no mu rawe! Amwe mwanyathi, shadipinyi kuyendaghura ghana kuyendaghura yira nyime ghokuvuma, oyu ghana kushana kumina munu. 9Mu tanarere pamatawero no mu munyathe. No mwa vurama eshi: hatawi hayendhenu ha wanine nawo maghukukutu pofotji yira ghenu. 10Nyambi yu gha tapa n̂eke dhodhihe no gha mwitha mwaKristus Jesusi, mukuyerana kuthishe thendi thororuheya, ngambi kenge di muna kunyanda kapupi kamanana, mbo ghana mu pindutha thinda no kumutjokedha no kumutanaritha. 11Kukwendi dha kara ngcamu kate kuroruheya! Amen.
Mayuvithero no dirumeritho
12Silvanusi ghomuyendhange yu na kurupera thikuma, yo ghana ni tumena mbapira dhino dhokukwenu. Ame ne na tjangire mukumutjokedha no kumutjwathanitha, yinu yoghushemwa ghon̂eke dhaNyambi. Mu tanare mumwadho.
13Mbunga dhomuBabiloni edhi dhapwa kutotora yira yamwe, naMarkusi ghomwanange hana mu tumena dirumeritho.
14Mukurumerithe nomacumitero ghoruhakitho rothikriste.
Thiraro mwaheya amwe mwa kara mwaKristusi.
Currently Selected:
1 Petrusi 5: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
