1 Petrusi 3
3
Yikara yopakatji kamurume namukamadi
(Ef 5:22–32; Kol 3:18–19)
1-2Mwakamadi, mu kare ghutawedhi kwawatutughuru wenu. Ngeshi pohadi papenu awa ha kara nawatutughuru wa ha dhira kutawa n̂ando dhaNyambi, nawarume ha mone eshi, ngepi di mwa yapa Nyambi mwe, no ngepi di muna kukara thitamenedhi thothiwa. Awo nawo mbana kara hakaKristusi payikara yawakamadi wawo. Namwe mbadi mbo mu nyanda karo kughamba n̂ando.
3Ghuwa vene wa kara peghuru keho, yira ndjendja, mangondo no yivata yokukuyenga. 4Eyi ne mbadi kemo, Yikuyenga yenu ya kona kukara mwimi dhamunu: Ayo ya kona kukara yihunga no muthipore thoMupepo. Yinu yino ne ya kara mudyo thikuma kwaNyambi. 5Pakare‐kare, kemo ha kuyengangire karo hakamadi awa ha kuruperire mwaNyambi. Keho awo, ha karire ghutawedhi kwawanu wawo. 6Sara ne yothitamenedhi kwaAbrahamu no gha mu fumanekire. Ngeshi ha mu tendi ghuhunga no mbadi wa kuyapa mushedho, amwe ne mwa kara mwan̂amba dhendi.
7Mwatutughuru, mwa kona kupara pofotji thiwana nawakamadi wenu. Mu neghedhe dikuto kukwawo. Yoyishi, awo ne hanu hohakashu awa mbo mu kayora nawo mumoyo yitapa yothin̂eke. Munyima, po mbo mu kona kuraperera no mbadiko thi mbo thi mu shinga.
Ngepi di sho gha kone kukara kehe yu
8Paghuhura: Mu kare mwahe nomutjima ghofotji, yighayara yofotji, mu kare noruhakitho rokuyara, nothin̂eke no mukukumbirupitha. 9Mwa kuhutheranga maghuyi ghenu, ngambi dishamu nodishamu. Karo ne mukuhuthangere nofiyaghudhi. Yoyishi, yo gha mwithera mbo mu kone kuwana makandadhekero ghaNyambi. 10Yapwa kutjanga eshi:
“Ngeshi yu gha haka moyo
no kurumbera moyo ghorure noyipara yoyiwa,
gha shinge ndani rudimi rwendi kuyighamba yoyiyi
no miromo dhendi dhi thighe yishewe.
11Tunde kughuyi no tende ghuhunga,
shane thiraro no ghuthitambe!
12Fumu ne gha kenga kwawanongo
no gha tegherera kumaghamweno ghawo,
ene wa hana kutenda ghuyi, gha weman̂anyena.”
Eyi ne, ya roha mukunyandera yoyiwa
13Yidye gha kumunyandeka oku muna kutoghoropa kuyinu yoyihunga? 14Ngambi yamwe mwathinda, ngeshi ha munyanda yoyishi yoyihunga muna kutenda, ene mwa kona kuyimona yira yiwa, mwa yapa kwawanu ngambi kwahe yu no mwa kudhekera kokuhe thinu. 15Mumitjima dhenu ghu kare mo ghupongoki no fuma dhokwaKristusi ghoFumu. Mu kwinduke roruhe kumahuthero gha kehe yu ghana kumwipura matjwathanithero ghomoyo wenu. 16Ene muyitende mumakukongwero, nomumakutekero ghokwaNyambi. Mu koneke eshi yihima yenu ne yiroghe ndani, eshi awa, kemo hana kumushwahura muyikara yenu yoyiwa yomwaKristusi, hafe honyi, yoyishi ha mu nyandeka. 17Ngeshi ngo ghomahimimeno ghaNyambi eshi, mukone kunyanda, yoyishi ghuhunga muna kutenda. Eyi ne hasha mukunyanda kemo, kupiterera mukutenda ghuyi. 18Naye Kristusi karo gha nyandire parofotji kumaharwero, mukakupira murandu, kwawayiharuri, mukutwara mwe kwaNyambi. Aye ha mu paghire yira munu, ene paMupepo gha karire muyumi. 19Kemo dyo gha yendire kwawadhimu homun̂otwa, no ko gha ka yuvithire mawithero ghendi. 20Awa ne wodiwo wa ha karire ghuthururu kwaNyambi, awa gha kudhekerire apa gha tapire kwaNoghe nako dhokutenda dyato. Awo ne hapu awa ha karire mudyato, hanu kwoko nohahatu vene muthitara, 21awa ha parire kumeyu, eyi ne kunegha yina kukunegha padiyoghero, apa muna pu kughamwena namwe karo pan̂anyi‐n̂anyi. Diyoghero ne mbadi dya kushura didhiro dyopayirama vene, ene dya kumbera kwaNyambi ghukushuki ghoyighayara no dina di dya mu ghamwena pamuvumbukero waJesus Kristusi. 22Pan̂anyi‐n̂anyi, Aye ne kurudyo rwaNyambi gha di kumupa marawero ghokwawaengeli no ghawakamakuto nawakamangcamu no gha dhinine mudiwiru.
Currently Selected:
1 Petrusi 3: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
