1 Petrusi 2
2
Diko dyaNyambi dyapwa kushokeka pakashemandhugho mwene
1Mu thighe ne keho yinu yoyiheya yoyimango, mbango dhodhihe difurumeko, nya, no ghuhothi. 2Thika di ha shananga hatumbututu wa hana shamuruka dyarero manhwe, kemo sho mu kone namwe kurura manhwe ghomumupepo mwene eshi, mbo mu kone kukukorera papagho no mbo mu wane ruvigha. 3Amwe ne mwa dimuka kare eshi, Fumu ne munongo.
4Mwiye kuKwendi, diwe dyomoyo, edi ha nyatha hanu. Ene Nyambi gha di torwera kudyango dyodikuto. 5Mwiye yira mwamawe ghomoyo, ha mu tende ndhugho dhokupongoka. Omu sha kare hapristeri hokupongoka no kuyamba miyambo dhokupongoka, paJesus Kristusi edhi gha menya‐menyenaNyambi. 6Yodigho ya ninga muYitjanga eshi:
“Mu mone,
Ame ne diwe dyodishonga na kupaka muSiyoni
edi na torwera mudyango dyodikuto.
Oyu ghokutawa muMwendi,
mbadi mbo gha fa honyi.”
7Amwe mwa tawa ne, mwa yerana kufuma dhi. Ene kwawa ha dhira kutawa, gha tamba kukwawo man̂ando ghano eshi:
“Diwe di ha mwagha hakakumba,
shemwa dyo dina kara mudishonga.”
8No karo eshi:
“Dyodiwe di ghana kupunduka munu
no dyodimuwe di dya kukuwitha.”
Awo ne kupundadhoka hana kupundadhoka, yoyishi ha thururu kun̂ando. Eyi ne dyo gha yi wa himenine Nyambi.
9Yoyishi, amwe karo mwadiko di dyapwa kutorora, mbunga dhoghupristeri dhodhifumu, diko edi gha kupongwera Nyambi kukwendi, diko dyaNyambi thinda, diko edi dya yuvithire yitenda Yendi yomakomweneno, yoyu gha mu tundithire mumakokore nothishe thendi thothitetu. 10Pakutanga, mbadi mwa karire mwe eshi mwadiko. Ene pan̂anyi‐n̂anyi, mwakadiko dyaNyambi mwe.
Mu roghithe kehe pano yikara yenu
11Mwahakwa, muno mukaye mwagenda no mwanumaghana. Yodigho na kumutongwera ghumutjokedha eshi, ngo mu yakunuke kuyirumbera yoyiheya. Eyi ne ya pagha vene moyo wamunu. 12Mu kare roruheya thiwana mukatji kawahayidena, no ku hana kughamba kukwenu eshi amwe ne mwapaghi, awo ne mbo ha kone kumona thitamenedhi thoyipara yenu, no kufumaneka Nyambi mudiyuwa dyondhango.
13Yoyishi, kemo gha yi hima Fumu. Amwe mwa kona kukutapa kwawamayami, ngambi kwamuraghuri shokuru oyu gha kara nongcamu pan̂anyi‐n̂anyi, 14ngambi kwawamarena awa ha wana ngcamu dhokukona kutetera yu ghana kutenda ghuyi, ene kwamukakutenda ghuhunga ne hana kumukugha. 15Agha ne mahimeno ghaNyambi eshi, amwe ne mu kone kutenda ghuhunga. Mahurero ne mbo ghana kara koyu ghana kughamba ghuthuta.
16Amwe ne muhoro mudi. Ene mwa tenda horo mudifurumeko pakutenda ghuyi. Horo dhenu ne mu dhirughanithe mukukarera Nyambi.
17Amwe ne mwa kona kufumaneka hanu wahe no mu hake hatawi hayendhenu. Mu yape Nyambi. No mu kutekere muraghuri.
Kristusi ne thitamenedhi thawakakunyanda
(Ef 6:5–8; Kol 3:22–25)
18Mwapika, mukutape no kukumbirupitha kwawahekudyenu, ngambi ku ha kara nothin̂eke noghunongo, ngambi ha kenya. 19Mukathin̂eke, oyu gha dhidhimeka tjitju dhoyinyanda eyi ya dhira kumutamba. Yoyishi makurupero ghendi ne mwaNyambi gha kara. 20Ngeshi ha mu humbitha mwe oku muna reghi, fuma munye mbo mu wana oku muna yikakatera yoyo? Ene mukukara ghudhughutjima muyinyanda yenu, oku ghuhunga muna kutenda, mwa wana n̂eke dhaNyambi. 21Shemwa payinu yino namwe mwapwa kwitha ko. Yoyishi naye Kristusi gha mu nyanderire no gha mu pire thitamenedhi karo eshi, mu kone kukutha ndhira dhendi.
22“Aye ne mbadi gha tendire murandu
no mbadiko n̂ando dhombango.”
23Apa ha mu shamunine,
Aye ne mbadi gha huthire dishamu,
apa gha nyandire,
Aye ne mbadi gha kunyanganyine,
ene gha thighire yoyiheya
koYu gha pangura ghuhunga.
24Aye thinda gha shimbire mirandu dhetu muyirama yendi kuthikurushe. Opo, po twa fera kumirandu no twa tumuka paghuhunga. Payitombo yendi po mwa pwire kwirukitha mwe.
25Amwe ne mwa yongarire yira ndjwi. Apa no ne muna huka kwaMudithi wenu no mukungi ghomoyo dhenu.
Currently Selected:
1 Petrusi 2: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
