1 Petrusi 1
1
Mbapira Dhokutanga dhaPetrusi
1Edhi mbapira, dhaPetrusi ghomupostoli waJesus Kristusi.
Kwawa hapwa kutorora kwaNyambi, awa ha di hanumaghana mukaye no ha tapathana ha katunge muPontusi, muGalasiye, muKapadosiye, muAsiya no MuBitiniya. 2Thika di gha yi pakire po Nyambi Wihe pakutanga, Aye gha mu tororire no gha mu pongwerire paMupepo eshi, mu kare ghutawedhi kuKwendi no kumukushukitha nomanyinga ghaJesus Kristusi.
N̂eke no thiraro yivure mumwenu.
Makurupero ghomayumi no matawero ghoshemwa
3KwaNyambi ghoWiha Hekudyetu Jesus Kristusi, ko dya tunda difumanekero dyodihe. Pathin̂eke thendi thothikuru, gha tu pire moyo ghoghupya pamuvumbukero waJesus Kristusi mwawafu. Apa no ne nomakurupero ghomayumi tudi nagho, 4payiyora yokudhira kupwa no yoghukushuki no yokudhira kwan̂a, eyi ha mu pungwera namwe karo mudiwiru. 5No yoyi mwa tawa, yo gha mu pungwera naye Nyambi nongcamu dhendi thiwana fiyaghudhi, edhi ha mu roghithera muyihokoka yomudiyuwa dyoghuhura. 6Mu shamberere mwe kuyinu yino, ngambi kenge di ghana haka Nyambi kumuyereka munako dhodhimbiru nomayerekero ghomengi. 7Matawero ghenu gha kara mudyo thikuma kupiterera mangondo, ghokukona kudhongonoka. Ngambi makushwero ghomangondo nagho nomudiro ha gha monanga pakutanga. No ghushemwa ghomatawero ghenu, nagho karo kukona kughuyereka eshi, ghu kare nomakughero nofuma nodikuto kumwiyero waJesus Kristusi. 8-9Aye ne mwa mu haka, ngambi kenge di mwa dhira kumumona. Pakutawa muMwendi, ngambi oku mbadi muna kumumona pashan̂anyi‐n̂anyi, kare mwa yerana kuruvigha rothitambo thomatawero ghenu. Eyi no, kuyaritha muna kuyiyaritha mo noyishamberera yoyiwa yishikumburura.
Makomweneno kare ha gha yuvitha haporofeta
10Fiyaghudhi dhino, kare dhapwa kurondonona kwawapumbi, awa ha yuvithire thiwana, thin̂eke ethi ha mu turekera. 11Mupepo waKristusi oghu wa karire mumwawo, wa yuvitha kare eshi, Kristusi ne mbo ghana nyanda no mbo hana mu fumaneka. Nawo ha yerekire kushana nako no yikara yi wa himine Mupepo eshi, ngepi di mbo yikara. 12Kukwawo ne yahokokire eshi eyi ha pumbire ne, mbadi yihima yawo hathinda. Ene yakukwenu. Pan̂anyi‐n̂anyi, awa ha mu yuvithire mbudhi dhodhiwa, ha dhi mu dimukithire paMupepo ghoKupongoka, oyu gha tundire mudiwiru. Yinu yino, nawaengeli nawo karo ha shana kuyikwata mumaghano ghawo.
Makoghawero ghokupara mughupongoki
13Yodigho maghano ghenu, gha kothoroke no gha kare thiwana. No mu tanarithe makurupero ghenu thikuma pathin̂eke ethi mbo mu yerana kumwiyero waJesus Kristusi. 14Ngeshi yamwe mwana hohaturumuthi, mbadi mwa kona kudhemenenitha yipara yenu muyirumbera, eyi mwa karire nayo pakutanga, oku amwe shime mbadi mwa dimuka Nyambi. 15Mbadi kemo, thika di gha pongoka Yu gha mwitha, kemo sho mu kone namwe kupongoka mumoyo wenu ghoghuhe. 16Yapwa kutjanga eshi: “Mu pongoke, yoyishi Ame ne na pongoka.”
Manyinga ghaKristusi ghomakomweno ghohoro
17Kenge di muna kumutoya mwe eshi Wihenu, oyu ghana kutetera ndhango yomuhe mukupira makutjakero, mu pare ne keho mufuma kuKwendi munako edhi muna kukara ghugenda pano pakaye. 18Mwa dimuka namwe eshi, mbadi mwa pwire kukomonona noyinu yokukona kupwa. Yira yikuvo ngambi mangondo, agha mwa yora nyara‐nyara no gha pira makomweneno ghohoro. 19Karo amwe, ha mu shutura nomanyinga ghokupira murandu eshi, ghaKristusi, Ndjwighana shiwana murandu no thitombo temba. 20Aye ne gha kara po kare kughutho ghokuvareka kaye. Ene pamurandu wenu, po gheyera munako dhino dhohuhura. 21PaPendi po mwa tawera mwe mwaNyambi, Oyu gha mu tumunine mukufa no gha mu pire fuma. Yo gha tanarera matawero ghenu no makurupero ghenu paNyambi.
Mushamurukero ghoghuwadi pan̂ando dhaNyambi dhomoyo no dhokuroruheya
22Kenge di muna kushuka mwe mughutawedhi kughushemwa, Mukuhake yira hayendha. No mwa kona ndani kukuhaka nomitjima dhenu dhodhihe muruhakitho rorukuru. 23Amwe ne ha mu shamuruka karo paruwadi. Keho, kadi mumbuto dhokupwa. Ene mumbuto dhokudhira kupwa: adho ne dhon̂ando dhaNyami dhomoyo no dhokuroruheya. 24Yitjanga ne ya ninga eshi:
“Munu, gha kara thika muhonyi,
no ghuwa wendi ghoghuhe,
thika mutemo ghomumuthitu,
muhonyi, kukukutera
no mutemo ghuna kukukumuka ko,
25ene n̂ando dhaFumu,
dhina kukara kuroruheya.”
No n̂ando dhino, dhombudhi dhodhiwa edhi ha mu yuvitha.
Currently Selected:
1 Petrusi 1: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
