MATIUS 28

Yesus Kikos ju Idanan

(Mrk 16:1-10; Luk 24:1-12; Yoh 20:1-10)

1Telas arik Sabat#28:1 Arik Sabat: Arik Sabat kimula dari dui Jumaat lei nu dui Sabtu. ya lalu ru ku ipepegelap arik Minggu, Maria mai Magdalena ru numom nij kerdor imuh Maria baiet baineng penep Yesus. 2Tiba-tiba mong gempe bumi ihad kuat. Lalu malikat TUHAN kiceleh ju serga, kigulek batu tenutop penep ajeh ru kigei ku ikemil. 3Renes malikat ajeh becahaya ru ipenakei biyeg begei sagop. 4Aska-aska de bejaga penep ajeh ihad naisengoh bile naineng malikat ajeh lei kerog berog enai lalu naikol naiha-dat.

5Malikat ajeh kiurok nu ubai kerdor ajeh, “Agok sengoh! Eng ngpanei jerkekek Yesus de bisaleb ajeh. 6Kek pek mong ku padeh. Kek ya Kikos ju Idanan begei de ya Kiurok entem. Beiloh neng tempat Imayat bidek. 7Ru hunen etloh deras ru pasalloh nu Ipengikot-pengikot tentang hal adeh: ‘Kek ya Kikos ju Idanan ru hunen Kek Kiet lebeh canuk daripade enai nu lengrik Galilea. Ku pajeh enai doh naiburuk Kek.’ Ingatloh ma de ngurok adeh nu jerkek.” 8Deras-deras ubai kerdor ajeh baiet ju penep ajeh. Ru sengngoh campor keremmik, baijerjar baiha-pasal hal ajeh nu pengikot-pengikot Yesus.

9Aleh-aleh Yesus Kiterbuk nu ubai kerdor ajeh ru Kiurok, “Jerkek ma igah?” Ubai kerdor ajeh baiperek nu Yesus, baicap Ijog, ru baisembah Kek. 10Yesus Kiurok nu ubai, “Agokloh sengoh. Et pasal nu pengikot-pengikot Eng supaye naiet nu lengrik Galilea. Ku pajeh doh naiburuk Eng.”

Laporan Aska-aska

11Mase kekerdor ajeh baipeteros ceknip ubai, memerip urag aska de bejaga penep ajeh nailos nu kote ru naipasal nu raknak-raknak imam agame Yahudi dikdij hal de ya tejadi. 12Raknak-raknak imam agame Yahudi naibebincang ru raknak-raknak mai Yahudi, ru naibeh keputusan naiha-og jeoi duet nu aska-aska de bejaga ajeh. 13Naibesat nu aska-aska ajeh, “Engkek hod engkeurok begei adeh: ‘Pengikot-pengikot Yesus naihol ku semakdek kelem ru naisij mayat Yesus mase jibukbet.’ 14Amen Pilatus kicerngai hal ajeh, jik doh jipujok kek supaye engkek pek bihukom. Engkek agok risau.”

15Jadi, aska-aska ajeh naikot duet ajeh ru naibeh begei de bior. Lei hunen, hal ajeh lekat bipasal ku engkap mai Yahudi.

Ernor Perlei Gah Bor

(Mrk 16:14-18; Luk 24:36-49; Yoh 20:19-23; Kis 1:6-8)

16Sebelas urag pengikot Yesus naiet nu lod ku lengrik Galilea begei de biperintah ya Yesus canukjeh. 17Bile naiburuk Yesus, naisembah Kek. Tapi mong ju engkap enai ajeh de ragu-ragu. 18Yesus Kiperek nu Ipengikot-pengikot lalu Kiurok, “Eng ya biog dikdij kuasa ku serga ru ku bumi. 19Kerana ajeh, etloh nu dikdij bangse ru pejadiloh enai pengikot Eng. Baptisloh enai ku kateh muh Menek, Kenon, ru Kelog Santen. 20Ajarloh enai supaye naitaat nu dikdij de ya Ngor nu engkek. Ingatloh, Eng doh selalo Ngbeserta ru engkek lei nu arik kiamat.”

Currently Selected:

MATIUS 28: AEH

Highlight

Copy

Compare