MARKUS 1

Penasal Yohanes Pembaptis

(Mat 3:1-12; Luk 3:1-18; Yoh 1:19-28)

1-2Adehloh Gah Bor tentang Yesus Kristus Kenon Jenang. Gah Bor ajeh kimula bile Yohanes Pembaptis kihol begei de bicot ya Nabi Yesaya. Ku kateh kitab Nabi Yesaya, Jenang Kiurok nu IKenon,

“Eng doh Ngngeng sengoi ernor Eng

lebeh canuk daripade Hek.

Kek doh kisedia nong ha Hek.#Mal 3:1

3Sengoi ajeh doh kiurok ya suara de kuat ku padag guron,

‘Sedialoh nong ha TUHAN. Pelurosloh nong ha Kek.’ ”#Yes 40:3

4Begei ajehloh Yohanes Pembaptis pen mula kibeajar ku padag guron supaye mai naibetobat ju dosa enai ru bibaptis supaye Jenang Kiampon dosa enai. 5Jeoi sengoi naihol ju dikdij lengrik Yudea ru ju kote Yerusalem naiha-cerngai ha engrok Yohanes Pembaptis. Enai naiaku dosa liknai ru kek kibaptis enai ku Batag arik Jordan.

6Yohanes Pembaptis kilog penakei de bibeh ju sentol unte ru icengkot wog bibeh ju getek. Icaknak cog ru sempog luei. 7Kek kiajar, “Doh hol Numom telas eng de lebeh bekuasa daripade eng. Eng ngngop ngha-teg Icog kasot pen eng pek layak. 8Eng ngbaptis engkek ya teu tapi Kek doh Kibaptis engkek ya Kelog Santen.”

Yesus Bibaptis ya Yohanes Pembaptis

(Mat 3:13-17; Luk 3:21-22)

9Ku mase ajeh, Yesus Kihol ju pekan Nazaret ku lengrik Galilea lalu bibaptis ya Yohanes Pembaptis ku Batag arik Jordan. 10Ku mase Yesus Kihol ju batag arik ajeh, Kek Kineng langit tebuka ru Kelog Santen Kiceleh begei ha cep merpati nu kemil Kek. 11Lalu mong suara Jenang de kiurok, “Hekloh Kenon Eng de Nghok. Hekloh de Hapesenang sengik Eng.”#Mzm 2:7; Yes 42:1

Yesus Bicuba ya Ibles

(Mat 4:1-11; Luk 4:1-13)

12Ku sarik jijeh juga Kelog Santen Kibeh Yesus et nu padag guron. 13Selame 40 arik Kek ku pajeh, Kek bicuba ya Ibles. Ku tempat de Kigei ajeh mong binatag ces ru Kek bitulog ya malikat-malikat.

Yesus Kicereg Empat Urag Nelayan

(Mat 4:12-22; Luk 4:14-15–5:1-11)

14Telas Yohanes Pembaptis bijel, Yesus Kiet nu lengrik Galilea lalu Kiperlei Gah Bor ju Jenang. 15Kek Kiurok, “Imase ya kitiba. Pek liu nij Jenang doh Kimemerintah sebegei Raja. Betobatloh ju dosa liengkek ru pecayaloh nu Gah Bor!”

16Mase Yesus Kicekcip ku beg Tasek Galilea, Kek Kibakek nar mom nelayan. Ubai ajeh Simon ru imenang Andreas. Ubai tengah baijala kak ku tasek ajeh. 17Yesus Kiurok nu ubai, “Joiloh Eng. Jerkek doh jerkejadi mai bejala sengoi ru doh jerkepejadi enai pengikot Eng.” 18Ku sarik jijeh juga ubai tenek-menang ajeh baiwes jala liubai lalu baijoi Yesus.

19Yesus Kipeteros Iceknip. Pek nyak ju kenjeh, Kek Kibakek nar mom de kilek nij. Ubai ajeh kekenon Zebedeus de muh ubai Yakobus ru Yohanes. Ubai tengah baiterbor jala liubai ku kateh perahu. 20Bile Yesus Kibakek ubai ajeh, Kek deras Kicereg ubai. Ubai tenek-menang ajeh baidek apak liubai ru ipekerjak ku kateh perahu lalu baijoi Yesus.

Sengoi de Bisangrog ya Nyanik

(Luk 4:31-37)

21Yesus ru Ipengikot-pengikot nailei ku pekan Kapernaum. Ku arik Sabat, Yesus Kimuj nu deg sembahyang ru mula Kibeajar. 22Dikdij mai de ceringai ha Kek cengang empag enai tentang care Kek Kibeajar kerana Ineajar bekuasa ru pek sama begei ha neajar guru-guru Hukom Taurat.

23Ku mase ajeh, numom sengoi de bisangrog ya nyanik kihai, 24“Hei Yesus Mai Nazaret! Ma Habeh nu jik? Haha-pebinasa ha jikka? Jik jipanei Hek adeh bok. Hek Mai Suci de bingeng ya Jenang!”

25Tapi Yesus Kitengking ha nyanik ajeh, “Kerakdik! Hol ju sengoi adeh!”

26Nyanik ajeh kiyoh ihad kuat berog sengoi ajeh lalu kihol ju sengoi ajeh sambel kiwig. 27Hal ajeh kibeh mai jengoi cengang empag enai lei naibelwal ratak liknai, “Wah, adeh neajar pai ru neajar de bekuasa! Sengoi adeh Kiperintah ha nyanik-nyanik, ru nyanik-nyanik naijoi Iengrok!”

28Gah tentang Yesus deras gucep ku seluroh lengrik Galilea.

Yesus Kiperbor Mai Jengoi

(Mat 8:14-17; Luk 4:38-41)

29Telas naihol ju deg sembahyang ajeh, Yesus, Simon, Andreas, Yakobus, ru Yohanes naiet nu deg Simon ru Andreas. 30Bile Yesus Kilei, Kek bipasal jenak Simon tengah kidakdak ku tempat buknet kerana kinyik bengket. 31Yesus Kiterbuk nu jenak Simon, Kitarek iteg, ru Kiberkos kek. Lalu inyaknik pen kibor ru kek mula kilayan ha enai.

32Bile iarik ya dui, telas mat arik ya kiceleh, dikdij mai de nyik ru mai de bisangrog ya nyanik bien nu Yesus. 33Dikdij mai ku pekan ajeh naibekumpol ku ngar deg Simon ajeh. 34Yesus Kiperbor jeoi mai de nainyik bebegei jenis nyaknik. Kek juga Kiperet nyanik-nyanik. Mase Kek Kiperet nyanik-nyanik ajeh, Kek Kiget naibelwal kerana naipanei Kek ajeh bok.

Yesus Kibeajar ku Lengrik Galilea

(Luk 4:42-44)

35Ku ipemyah huper, bile iarik lekat sengur, Yesus Kikos ru Kihol ju deg ajeh. Lalu Kiet nu nanek tempat de serakngek ku luar pekan ru Kibedoa. 36Simon ru ikekawat naikek ha Kek. 37Bile ya naibakek Kek, enai pen naiurok, “Jen, dikdij mai naikek ha Jen.”

38Tapi Yesus Kiberlag, “Hik mesti hipeteros ceknip hik nu pekan-pekan kilek de rek supaye Ngperlei Gah Bor ku peteh juga. Ha tujuan ajehloh Eng Nghol.”

39Begei ajehloh Yesus Kicip nu seluroh lengrik Galilea Kibeajar ku deg-deg sembahyang ru Kiperet nyanik-nyanik.

Yesus Kiperbor Numom Sengoi de Kinyik Kuste

(Mat 8:1-4; Luk 5:12-16)

40Ku nanek arik mong numom sengoi de kinyik kuste kiterbuk nu Yesus. Sengoi ajeh kibelutot ku ngar Yesus ru kimerayu. Kek kiurok, “Jen, amen Jenhod, Jen dapat Jenperbor eng.”

41Yesus Kiyayak ha kek. Kek Kiulur Iteg lalu Kipep sengoi ajeh ru Kiurok, “Eng Nghod. Aborloh hek!” 42Ku sarik jijeh juga inyaknik kuste ajeh pen walah ru sengoi ajeh pen kibor. 43Lalu Yesus Kior kek et ru Kiget kek begei adeh: 44“Agok pasal nu bok-bok pen tentang hal adeh. Tapi etloh nu imam agame Yahudi ru semanjloh kisahkan nyaknik hek ya bor. Telas ajeh begei de bior ya Nabi Musa, ogloh korban de kipejadi hek pek haram nij sebegei bukti nu mai kilek hek ya habor.”#Im 14:1-32

45Tapi sengoi ajeh kiet ju kenjeh ru mula kiperlei gah ajeh nu belok-belok taleh. Kek teros kicerite gah ajeh lei Yesus pek buleh Kimuj nu pekan bile mai naineng ha Kek. Jadi, Yesus Kigei ku luar pekan ku tempat de serakngek. Tapi mai ju jap-jap tempat naihol naiterbuk nu Kek.

Currently Selected:

MARKUS 1: AEH

Highlight

Copy

Compare