MATIUS 27

Yesus Bien nu Pilatus

(Mrk 15:1; Luk 23:1-2; Yoh 18:28-32)

1Ku ipepegelap huper, dikdij raknak-raknak imam agame Yahudi ru raknak-raknak mai Yahudi naibeburuk untok naiha-bebincang begeiharok naiha-perdat Yesus. 2Telas ajeh naior Yesus bibeg lalu naien ru naiog Kek nu penguasa lengrik Yudea imuh Pilatus.

Danan Yudas

(Kis 1:18-19)

3Bile Yudas pengkianat ajeh kipanei Yesus ya bipejatoh nehukom dat, kek kimenyesal. Lalu kek kiperjog 30 kepeg duet perak nu raknak-raknak imam agame Yahudi ru raknak-raknak mai Yahudi. 4Kek kiurok, “Eng ya ngbedosa kerana ngkianat mai de pek besalah lei Kek bihukom dat!”

Tapi naiberlag, “Lantakloh, ajeh hal hek!”

5Yudas kipej duet ajeh nu kateh Deg Jenang lalu kiet ju kenjeh. Telas ajeh kek kigantong idiri.

6Raknak-raknak imam agame Yahudi naikutep duet ajeh ru naiurok, “Duet adeh upah ha mai perekdat. Amen hijoi ha Hukom Taurat, duet ajeh pek buleh hipermuj nu kateh peti pesembahan kerana duet adeh hasel ju jengwal nyawe mai.” 7Jadi, naisetuju naiha-guna duet ajeh ha benglik tik de bigelar Tik Tukang Periok. Tik ajeh biguna sebegei penep mai aseg. 8Ajehloh isebab lei hunen tik ajeh bigelar “Tik Behip.”

9Dikdij de tejadi ajeh kena begei ma de ya biurok ya Nabi Yeremia begei adeh: “Naikot 30 kepeg duet perak, iregak de bisetuju ya mai Israel ha benayar ha regak nyawe Kek. 10Naiguna duet ajeh naibeli tik tukang periok, begei de biperintah ya TUHAN nu Eng.”#Za 11:12-13; Yer 32:6-9

Yesus Bisoal ya Pilatus

(Mrk 15:2-5; Luk 23:3-5; Yoh 18:33-38)

11Yesus Kijinjeg ku ngar Pilatus ru Pilatus kitanya, “Hek adeh raja mai Yahudika?”

Yesus Kiberlag, “Kena begei bengwal hek ajeh.” 12Tapi bile raknak-raknak imam agame Yahudi ru raknak-raknak mai Yahudi naitudoh Yesus, Kek Kikerakdik taleh.

13Kerana ajeh, Pilatus kiurok nu Kek, “Hek ya Hacerngai dikdij tenudoh enai ajeh tentang Hek! Berlagloh bengwal enai ajeh.”

14Tapi Yesus pek Kiberlag ma-ma pen lei penguasa ajeh ihad kihiran.

Yesus Bihukom Dat

(Mrk 15:6-15; Luk 23:13-25; Yoh 18:39–19:16)

15Ku jap Arik Raya Paskah, biasajeh penguasa kiterlas numom sengoi de bijel. Kek kiterlas sengoi de bipileh ya mai jengoi. 16Ku mase ajeh, mong numom de bikenal ya mai kerana ijenghat, imuh Barabas. 17Jadi, bile mai jengoi naibekumpol ku pajeh, Pilatus kitanya nu enai, “Bok de engkehod ngterlas? Barabas atao Yesus de bisebot Kristus?” 18Pilatus kitanya begei ajeh kerana kipanei raknak-raknak imam agame Yahudi naiog Yesus nu ilei kerana naicemburu.

19Tengah Pilatus kigigei kaha-pejatoh hukom, ikenah kiog bengsat nu kek, “Agok turot campor hal mai de pek besalah ajeh kerana arik adeh nek eng ngkep empok de pek bor tentang kek.”

20Raknak-raknak imam agame Yahudi ru raknak-raknak mai Yahudi naihasot mai jengoi supaye naisemanj Pilatus kiterlas Barabas ru kihukom dat ha Yesus. 21Pilatus kitanya nij nu mai jengoi, “Kek belok nanek de engkehod ngterlas?”

Naiberlag, “Barabas!”

22Pilatus kitanya nu enai, “Amen begei ajeh, ma de engkehod ngbeh nu Yesus de bisebot Kristus adeh?”

Dikdij liknai naiberlag, “Saleb Kek!”

23Tapi Pilatus kitanya, “Yama? Jenghat ma de ya Kibeh?”

Tapi naihai ru ihad kuat nij, “Saleb Kek!”

24Bile Pilatus kisedar kek pek buleh kibeh ma-ma nij ru kisedar juga mai jengoi ya mula naimerusoh, kek kikot teu lalu kisuj iteg ku ngar mai jengoi untok kaha-perneng kek pek kibetanggongjawab nu danan Yesus. Kek kiurok, “Eng pek ngbetanggongjawab nu danan Sengoi adeh! Engkekloh de betanggong hal adeh!”

25Dikdij mai jengoi ajeh naiberlag, “Biar jik ru kenon-cenok jik de betanggongjawab nu Idanan!”

26Telas ajeh Pilatus kiterlas Barabas ru kiog Yesus nu iaska supaye birempet ru bisaleb.

Aska-Aska Nainyeh Yesus

(Mrk 15:16-20; Yoh 19:2-3)

27Telas ajeh aska-aska Pilatus naien Yesus nu kediaman rasmi Pilatus, ru dikdij aska ku pajeh naibekumpol ku sekelileg Yesus. 28Naiteg leknog Yesus lalu naiperlog jubah renganj nu Kek. 29Telas ajeh naibeh mahkote ju cag bejerlak ru naiperlog ku Ikui. Naiog nubatag tungkat nu Iteg kentop. Telas ajeh naibelutot ku Ingar ru nainyeh Kek. Naiurok, “Daulat Raja mai Yahudi!” 30Naitoh Kek, naikot tungkat ajeh ru naipet Ikui bekali-kali. 31Telas nainyeh Kek, naiteg jubah ajeh lalu naiperlog balek penakei Ilei Sendiri. Lalu naien Kek nu luar naiha-saleb Kek.

Yesus Bisaleb

(Mrk 15:21-32; Luk 23:26-43; Yoh 19:17-27)

32Mase naihol nu luar kote, aska-aska ajeh naibakek numom keral imuh Simon ju kote Kirene. Naipaksa kek kigulap jehuk kalag Yesus. 33Dikdij liknai nailei nu tempat imuh Golgota, de imaksod Tempat Tarong Kui. 34Ku pajeh aska-aska ajeh naiog nu Yesus teu wain de bicampor ru hempedu. Tapi telas Yesus Kirasa ngeknut ajeh, Kek Kinyek ngekngut.

35Telas aska-aska naisaleb Kek, naibecabot undi untok naibahagi leknog Yesus ratak liknai.#Mzm 22:19 36Telas ajeh naigei ku pajeh naijaga Kek. 37Ku kemil kui Yesus mong papat de bipahat ku jehuk kalag. Ku papat ajeh bicot tenudoh adeh: “Adeh Yesus Raja mai Yahudi.” 38Mong nar mom mai jehat de bisaleb besama ru Yesus, numom ku Ikentop ru numom nij ku Ikengwil.

39Mai jengoi de belalu ku pajeh nairungel kui enai sambel nainyeh Yesus. Naiurok nu Kek, 40“Kem entem Habual Haha-teh Deg Jenang ru Haha-beh nij kateh nik arik, jadi peselamatloh diri LiHek Sendiri! Amen betol Hek Kenon Jenang, celehloh ju jehuk kalag ajeh!”

41Raknak-raknak imam agame Yahudi, guru-guru Hukom Taurat, ru raknak-raknak mai Yahudi juga nainyeh Yesus. Naiurok, 42“Kek Kipeselamat ha mai kilek tapi pek dapat Kipeselamat ha Diri Ilei Sendiri! Kek Kiurok Ilei ajeh Raja Israel. Amen Kiceleh ju jehuk kalag ajeh hunen, baruloh buleh hipecaya nu Kek. 43Ju Ibengwal, Kek Kipecaya nu Jenang ru Kiurok Ilei ajeh Kenon Jenang. Bei hineng, Jenang Kipeselamatka tok ha Kek hunen.”

44Mai siksij de bisaleb ku englag Yesus pen baihina ha Kek begei ajeh juga.

Danan Yesus

(Mrk 15:33-41; Luk 23:44-49; Yoh 19:28-30)

45Ju tengah arik lei nu pukol tige dui, iarik kisengur ku seluroh lengrik. 46Ku pukol tige dui, Yesus Kicereg ya suara de kuat, “Eli, Eli, lama sabakhtani?”#Mzm 22:2 de imaksod, “Jenang Eng, Jenang Eng, yama Jenwes Eng?”

47Memerip urag sengoi de mong ku pajeh naicerngai ha cengreg Yesus ajeh lalu naiurok, “Kek Kicereg Nabi Elia!” 48Numom ju enai ajeh deras-deras kijar kikot spanj lalu kicerlog nu kateh teu wain de ya keer. Telas ajeh kicucok spanj ajeh ku mol jehuk lalu kiulur nu empag Yesus supaye Kingut.

49Tapi mai kilek ku pajeh naiurok, “Poj nok, bei hineng entah Nabi Elia kihol kaha-peselamat Kek!”

50Telas ajeh Yesus Kicereg kuat nij. Lalu Kek pen Kitawes.

51Ku mase ajeh, tirei ku kateh Deg Jenang#27:51 Tirei ku kateh Deg Jenang: Adeh kirujok nu tirei de kiaseg Bilek Suci ru Bilek de Ihad Suci ku kateh Deg Jenang. kitateg ju ikemil lei nu ikerop lei kijadi nar henglei. Tik kiyahyoh, lod-lod batu tebelah, 52penep-penep tebuka, ru jeoi mai de taat nu Jenang naikos balek nij ju danan. 53Enai naihol ju penep telas Yesus Kikos ju Idanan, ru naimuj nu kote Yerusalem ru naiperneng diri liknai nu mai jengoi.

54Raknak aska Rom ru iaska-aska de tengah naijaga Yesus naisengoh bile naineng tik kiyahyoh ru dikdij pekare de ya tejadi. Naiurok, “Kek adeh mimang betol-betol Kenon Jenang!”

55Ku pajeh juga mong jeoi kekerdor de naineng ju kennyak. Enailoh de naijoi Yesus ju lengrik Galilea ru nailayan Kek. 56Ku engkap kekerdor ajeh mong Maria mai Magdalena, ru mong Maria amek Yakobus ru Yusuf, ru mong juga amek kekenon Zebedeus.

Yesus Bicop

(Mrk 15:42-47; Luk 23:50-56; Yoh 19:38-42)

57Bile iarik ya kaha-dui, hol numom mai kaya imuh Yusuf. Kek mai Arimatea ru kek pengikot Yesus. 58Kek kiet nu Pilatus ru kisemanj mayat Yesus. Pilatus kior mayat Yesus biog nu kek. 59Yusuf kikot mayat Yesus lalu kibalot ya abat benalot mai dat de pai. 60Kek kidek mayat Yesus ku kateh penep pai de bikurek ku lod batu. Penep ajeh hak Yusuf. Telas ajeh kek kigulek batu entoi kaha-tutop pintu penep ajeh. Lalu kiet ju kenjeh. 61Ku mase Yusuf kibeh dikdij ajeh nek, Maria mai Magdalena ru numom nij kerdor imuh Maria baigigei ku ngar penep Yesus ajeh ru baineng ma de bibeh ya Yusuf ajeh.

Penep Yesus Bijaga

62Ku ipegelap huper, ku arik Sabat, raknak-raknak imam agame Yahudi ru mai Farisi naiet naiterbuk nu Pilatus. 63Naiurok, “Tuan, jik lekat jiingat tentang hal adeh: Mase Sengoi de nekbelenglod ajeh lekat Kisui, Kek pernah Kiurok, ‘Nik arik telas Ngdat, Eng doh Ngkos nij.’ 64Kerana ajeh, orloh Ipenep bijaga lei nik arik. Amen begei ajeh, Ipengikot-pengikot pek dapat naisij Imayat ajeh ru naipasal nu mai kilek Kek ya Kikos ju Idanan. Lengnon ipenyudah ju Ipengikot-pengikot ajeh doh lebeh terok nij daripade ilei de canuk.”

65Pilatus kiurok nu enai, “Enloh memerip urag aska ru behloh ma de engkerasa perlu.”

66Lalu naiet nu penep ajeh ru naitanda batu tenutop penep ajeh supaye pek bibuka. Lalu naior memerip urag aska naijaga penep ajeh.

Currently Selected:

MATIUS 27: AEH

Highlight

Copy

Compare