KEJADIAN 49
49
Berkat Yakub ha Ikekenon
1Telas ajeh Yakub kicereg ikekenon keral ru kiurok, “Bekumpolloh ku beg eng. Ngha-pasal nu engkek ma de engketempeh nu ngar doh.
2Bekumpolloh engkek kekenon Yakub,
cerngailoh Israel apak engkek.
3Ruben, hekloh kenon sulog eng,
kengwat eng, ru pelek petame ju tenage eng.
Hek de paleng bihormat ru paleng bekuasa
ku engkap dikdij kekenon eng.
4Tapi hek begei teu de begelore
ru hek doh pek hajadi de petame nij
kerana hek ya habesama ru gundek eng
ru ya hapecemar tempat buknet apak hek.
5Simeon ru Lewi sama kui,
senjate ubai baiguna ha bahneh jehat.
6Eng doh pek ngjoi ku penakat ubai
ru doh pek ngjoi ku kateh kumpulan ubai
kerana baiperdat mai kateh bengal ubai
ru ubai tas urat jog lembu ibek baiha-pedajal.
7Celakaloh bengal ubai
kerana ihad terok.
Celakaloh beriknos ubai
kerana ihad kejam.
Eng doh ngcerlah kenon-cenok ubai
ku engkap kenon-cenok Yakub.
Eng doh ngpecerei enai
ku seluroh Israel.
8Yehuda, tenek-menang hek doh naipateh ha hek.
Hek doh hapealah musoh hek.
Kekenon apak hek doh naisujod ku ngar hek.
9Bei, hek begei singha nyengnyam de kiperdat imangse
lalu kijog nij nu isarang.
Kek kibepajot ru kidakdak begei singha.
Pek mong bok-bok pen de berani beusek hek.
10Yehuda doh selalo kicap tungkat kerajaan
ru ikenon-cenok doh naimemerintah
lei helnol Ilei de berhak nu tungkat kerajaan ajeh.
Dikdij bangse doh naitaat nu Kek.
11Ku mase Kimemerintah, doh mong ihad jeoi hasel anggor,
lei Kibeg keldei ku keneng anggor de paleng bor
ru pek Kirisau.
Doh mong ihad jeoi hasel anggor
lei Kek Kisah Ipenakei ya teu wain
de ceher begei behip.
12Imat doh ceher kerana Kingut teu wain
ru Ilemunj doh biyeg kerana Kingut susu.
13Zebulon doh kigei ku beg laot.
Kapal-kapal doh naibelaboh ku ipantei.
Sempadan kawasan Zebulon doh lei nu Sidon.
14Isakhar begei keldei de kuat
kikekkop kaha-berihat ku semakdek kantong beban.
15Bile kek kineng tempat nerihat ajeh bor
ru tik ajeh ihad ibernor,
kek kitundok kaha-gulap beban
ru tepaksa kibekerjak sebegei hambe.
16Dan doh kipeadel ha dikdij ibangse
sebegei nanek suku ju dikdij suku Israel.
17Dan doh kijadi begei tijik ku beg nong,
begei tijik de bisa ku beg lurong
de kipatok tumet jog kuda lei imai de tekbot kijer.
18Yahweh, eng ngpoj Jenpeselamat eng.
19Gad doh biserag ya mai perumpak
tapi kek doh kirumpak liknai balek nij.
20Tik Asyer doh kiperhol caknak de jeoi
ru kek doh kisedia caknak de ihat bor de layak bicak ya raja.
21Naftali begei rusa de telas
de kiperyos ikekenon de kemmek.
22Yusuf begei keldei de nyengnyam,
keldei liar beg kacoh teu
de kijerjar ku beg lod.
23Pemanah-pemanah naiserag kek ru ihad kuat,
naibeseh kek ya panah ru naipesiksa kek.
24Tapi kengrit Yusuf lekat kuat
ru ipanah lekat kukoh
kerana teg Jenang Yakub de Bekuasa kibeserta ru kek.
Jenang ajeh gembale ru pelindog Israel.
25Jenang ajeh Jenang apak hek de Kitulog hek.
Jenang de Ihad Bekuasa doh Kiberkat kenon-cenok hek
ya manik ju langit,
ya teu ju kerop tik,
ru ya jeoi kenon-cenok ru binatag daknek.
26Berkat de ngog nu hek lebeh entoi daripade berkat lod-lod manah
atao hasel de bor ju cenan-cenan de kekal.
Semoge dikdij berkat ajeh bicerleh
ku kemil kui Yusuf,
ku kemil labut pemimpen itenek-menang.
27Benjamin begei cok lig de nekjengrop.
Ku ipegelap kek kijerop imangse,
ku ikenglem kek kiceh ma de kikep.”
28Ajehloh dikdij 12 suku Israel ru ajehloh engrok de bibual ya apak enai mase kek kiberkat ikekenon keral. Kek kiberkat enai kena ru liknai memaseg.
Yakub Kidat ru Bicop
29-30Telas ajeh Yakub kibesat nu ikekenon keral, “Pek liu nij, eng doh ngdat begei jenang rak hik. Coploh eng ku tempat enai bicop, ku kateh hug ku Makhpela ku englag timur Mamre ku tik Kanaan. Abraham ya kibeli hug ru selai ajeh ju Efron mai Het kaha-pejadi penep. 31Ku pajehloh Abraham ru ikenah Sara, ru Ishak ru ikenah Ribka bicop. Ku pajeh juga eng ngcop Lea. 32Selai ru hug de mong ku pajeh ya bibeli ju mai Het. Coploh eng ku pajeh.”
33Telas Yakub kiog ibengsat nu ikekenon keral begei ajeh, kek pen kidak ku itempat buknet lalu kidat.
Currently Selected:
KEJADIAN 49: AEH
Highlight
Copy
Compare
Share
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
