KEJADIAN 48

Yakub Kiberkat Manasye ru Efraim

1Memerip iluniu ju kenjeh, Yusuf bipasal iapak kinyik terok. Kerana ajeh, kek besama ru nar mom ikenon keral Manasye ru Efraim naisueg Yakub. 2Bile Yakub kicerngai Yusuf ya kihol, kek kikerekwat kaha-kos lalu kigigei ku itempat buknet.

3Yakub kiurok nu Yusuf, “Mase eng ku tik Kanaan, Jenang de Ihad Bekuasa ya Kiperneng Ilei nu eng ku Lus ru Kek ya Kiberkat eng. 4Kek Kiurok nu eng, ‘Eng doh Ngog kenon-cenok de jeoi nu hek supaye kenon-cenok hek naijadi jeoi bangse. Eng doh Ngog tik Kanaan adeh nu kenon-cenok hek sebegei hak enai lei ditehjeh.’ ”

5Yakub kiurok nij, “Nganggap rimnar kenon hek Efraim ru Manasye de biperyos ku lengrik Mesir sebelom nghol nu madeh begei kenon lieng sendiri. Eng nganggap ubai sama begei Ruben ru Simeon. 6Amen hakep kekenon keral nij, enai ajeh doh pek nganggap sebegei kekenon enj tapi cecenok enj. Ku mase naiterima tik ku Kanaan, enai ajeh doh naiterima engleg ju tik de biwares ya Efraim ru Manasye. 7Entemjeh, mase ku kateh jeknog hik ju Mesopotamia, amek hek Rahel kidat ku tik Kanaan, pek nyak ju Efrata ru eng ihad ngsedeh. Eng ngcop kek ku pajeh ku beg nong nu Efrata.” (Hunen Efrata bigelar Betlehem.)

8Bile Yakub kibakek rimnar kenon keral Yusuf ajeh, kek kitanya, “Ubai adeh bok?”

9Yusuf kiberlag, “Adehloh kekenon eng de biog ya Jenang nu eng ku padeh.”

Yakub kiurok, “Perekloh ubai nu eng supaye ngberkat ubai.”

10Ku mase ajeh, rimnar mat Yakub ya sabor kerana ya kiengrak. Jadi, kek pek dapat kinengneng bik. Yusuf kien ubai nu iapak lalu Yakub kinyui ru kikawal ubai.

11Lalu Yakub kiurok nu Yusuf, “Eng pek ngsangka buleh ngburuk ru hek nij, tapi hunen Jenang ya Kiog eng peluang ngburuk nar mom kenon hek juga.”

12Telas ajeh Yusuf kitarek ubai ju ngar Yakub ru kisujod ku ngar iapak. 13-14Lalu Yusuf kidek nar mom ikenon beg ngar iapak. Efraim kidek ku englag kengwil Yakub ru Manasye kidek ku englag kentop. Tapi Yakub kisilang ikengrit ru iteg de kentop kidek ku kemil kui Efraim hamapen ilei ajeh kenon iloj, ru iteg de kengwil kidek ku kemil kui Manasye hamapen ilei ajeh kenon sulog.

15Telas ajeh Yakub kiberkat Yusuf ru kiurok,

“Semoge Jenang de bisembah ya jenang rak eng Abraham ru Ishak

Kiberkat nar mom kenon hek adeh.

Jenang ajeh de Kipimpen sinui eng lei hunen.

16Semoge malikat de ya kiterlas eng ju dikdij bahaye

kiberkat nar mom kenon hek adeh.

Semoge muh eng ru muh jenang rak eng Abraham ru Ishak

lekat biingat kerana ubai

ru semoge ubai mong kenon-cenok de ihad jeoi

ku bumi adeh.”

17Bile Yusuf kineng iapak kidek iteg kentop ku kemil kui Efraim, kek kirasa hal ajeh pek bor. Jadi, kek kicap teg kentop iapak ru kidek ku kemil kui Manasye. 18Kek kiurok nu iapak, “Agok beh begei ajeh, pak. Adeh kenon sulog eng, dekloh teg kentop jen ku kemil ikui.”

19Tapi iapak kinyek ru kiurok, “Ngpanei, bei. Manasye juga doh kijadi bangse de entoi. Tapi imenang doh lebeh bekuasa daripade kek ru kenon-cenok imenang doh naijadi bangse-bangse de entoi.”

20Jadi, Yakub kiberkat ubai ajeh nij ku arik ajeh ru kiurok,

“Mai Israel doh naisebot muh jerkek bile naiberkat sengoi. Doh naiurok,

‘Semoge Jenang Kibeh engkek begei Efraim ru Manasye.’ ”

Begei ajehloh Yakub kipecanuk Efraim ju Manasye.

21Telas ajeh Yakub kiurok nu Yusuf, “Paneiloh, pek liu nij eng doh ngdat tapi Jenang doh Kibeserta ru hek ru Kien hek jog nu tik jenang rak hek. 22Ngog nu hek nanek bahagian tik nij, lebeh daripade tenek-menang hek. Ngog Sikhem nu hek. Sikhem ajeh tempat subor de ya ngkot ju mai Amori ngguna pedang ru panah eng.”

Currently Selected:

KEJADIAN 48: AEH

Highlight

Copy

Compare