KEJADIAN 50

1Yusuf kiperdak ilei ku kemil iapak sambel kijap ru kinyui renes iapak. 2Telas ajeh Yusuf kior mai beawet mayat naiawet mayat Yakub. Jadi, naibeh ma de bior. 3Naikot mase selame 40 arik kerana ajehloh itempoh mase de bikot untok naiawet mayat. Mai Mesir naibekabong ha Yakub selame 70 arik.

4Bile ya telas mase bekabong, Yusuf kiurok nu pegawei-pegawei raja, “Amen buleh engketulog eng, perleiloh bengsat adeh nu raja. 5‘Mase apak eng merek kaha-dat, kek kior eng ngbejanji supaye ngcop kek ku kateh penep de ya bisedia ku tik Kanaan. Jadi, ogloh eng nget ngha-cop apak eng. Telas ajeh eng doh nglos nij.’ ”

6Lalu raja kingeng bengsat nu Yusuf, “Etloh cop apak hek begei de ya hajanji nu kek.”

7Telas ajeh Yusuf pen kiet nu Kanaan kaha-cop iapak. Dikdij pegawei raja, raknak-raknak ku istane, ru dikdij mai entoi ku lengrik Mesir naiet besama ru Yusuf. 8Iperingak, itenek-menang ru peringak iapak juga naiet. Had kekenon sanget ru binatag daknek naiwes ku tik Gosyen. 9Sengoi bekerite kuda ru sengoi bekuda mong juga naijoi lei kumpulan enai kijadi ihad ijengoi.

10Bile nailei ku tempat mai naipoh gandom ku Atad, ku englag Batag arik Jordan, enai ihad naisedeh ru naipanjap. Yusuf kibeh upacare bekabong selame tujoh arik. 11Bile mai de gigei ku Kanaan naineng ha pekabongan ku Atad, enai belwal ratak liknai, “Ihad besendeh upacare pekabongan mai Mesir!” Ajehloh isebab tempat ajeh bigelar Abel-Mizraim.#50:11 Abel-Mizraim: Muh adeh imaksod, upacare pekabongan mai Mesir.

12Begei ajehloh kekenon keral Yakub naibeh ma de bibesat ya Yakub nu enai. 13Naien mayat Yakub nu Kanaan ru naicop ku kateh hug ku Makhpela, ku englag timur Mamre. Hug ru selai ajeh kibeli ya Abraham ju Efron mai Het kaha-pejadi tik penep. 14Telas Yusuf kicop iapak, kek kijog nu lengrik Mesir besama ru itenek-menang ru dikdij sengoi de jijoi ru kek nu cennom iapak.

Yusuf Kipeyaken Itetenek

15Bile tetenek Yusuf naisedar apak enai ya dat, naibelwal ratak liknai, “Begeiharok amen Yusuf lekat kibedendam ru kaha-balas ha jenghat hik entem?” 16Kerana ajeh, naingeng bengsat adeh nu Yusuf: “Sebelom apak hik kidat, 17kek kior jik pasal hal adeh nu hek, ‘Amponloh senalah ru dosa de ya bibeh ya tetenek hek nu hek entem.’ Jadi, adehloh sengmanj jik: Amponloh senalah jik hambe-hambe Jenang de bisembah ya apak hek.” Yusuf kijap mase kicerngai begei ajeh.

18Lalu itetenek naihol ru naisujod ku ngar Yusuf. Naiurok, “Jik adeh hambe jen.”

19Tapi Yusuf kiberlag nu enai, “Agok sengoh. Eng pek dapat nghukom engkek kerana eng apeka Jenang. 20Entem engkek ya engkebepakat engkeha-beh jehat nu eng tapi Jenang ya Kiubah jenghat ajeh nu bernor supaye jeoi sengoi pek naidat ya cengwag. Hal ajeh ya tebukti hunen. 21Jadi, agok sengoh. Eng doh teros ngjaga engkek ru kekenon engkek.” Begei ajehloh Yusuf kipeyaken itetenek ya engrok de bor.

Yusuf Kidat

22Yusuf ru dikdij peringak iapak teros naigei ku lengrik Mesir. Yusuf kisui lei iumur 110 tahut. 23Yusuf sempat kineng kekenon ru cecenok Efraim. Yusuf juga sempat kijaga kekenon Makhir begei kekenon ilei. Makhir ajeh kenon Manasye ru cenok Yusuf.

24Mong nanek arik, Yusuf kiurok nu itenek-menang, “Pek liu nij, eng doh ngdat, tapi Jenang doh mesti Kijaga engkek ru Kipimpen engkek hol ju lengrik adeh nu tik de ya Kijanji nu Abraham, Ishak, ru Yakub.” 25Lalu Yusuf kior itenek-menang naibesumpah, “Besumpahloh nu eng begei adeh: Bile Jenang Kipimpen engkek nu tik ajeh, hodloh engkeen jeag-jeag eng ju kendeh.”

26Telas ajeh Yusuf kidat mase iumur 110 tahut. Lalu imayat biawet ru bidek ku kateh peti mayat ku lengrik Mesir.

Currently Selected:

KEJADIAN 50: AEH

Highlight

Copy

Compare