Cibraan 13

Yalli kixin sadaqha

1Sacoolinni kaxani yannawoo. 2#Erhedhdhö 18:1-8; 19:1-3Gerha kabbaataanam mibiyashshiitina, amayim lel amaa ginah sorhak malaykut gerha balih kabbaate mari yaniinimhi sabbatah kinni. 3Tamaa xabshedde yane mara, atin sinneh tenlih xabshedde yane mara balih, tamaa bixna yable mara lel tenlih bixna yable mara balih ten xunsusa. 4Waasibo ummanille xishma geytoo, Yalli uma-xibarlit kee yazniye mara yafrado kinamhi sabbatah, waasibot carat xalaaleh yandhabbarhoo. 5#Gabbaacime Sercat 31:6,8; Yehooshuca 1:5 “Caduruh ku mixaba, ku mathlime” yerhxeh yanemhi sabbatah, sinni aniina solaadit kaxanooko dhawudhdheenih, litiinimih xedeneenit tika. 6Amaydo, fidbeelih lel tahe narhxo dhicna:

# Zaabur 118:6 “Maddari yi xateena kinni;

Anu mashshiito makiyo;

xiyawti ayim yok abo dhiica?”

7Tamaa Yallih waanitta sinlih waanishshe sin manabottit xunsusa. Ten gerh-gerhhi mawco tubliinih, ten imaan katattaanta. 8Yeesus Masiix kumal, kaafa kee umman gedih lem kinni. 9Mango cayna kin amidhdhiginnixe darseh midoolabimina. Sin afcaado Yallih nicmah kinni tatraro missilam kibah, sadaqhat foloh maki. Amayim lel tamaa aba mara mamfacinnamhi sabbatah kinni. 10Nanu tamaa Yallahi reedodde yacbude mari amakkeeko beetoona xaqqe akko aallinnixon mazbax lino. 11#Leewiiti Sheekhino 16:27Amaa shekh manabotti tamaa zambi sadaqhah baahan sacahi biilo yabbirheh ummanimko quddus kin makaanodde orobah, amaa xazo amaa sifraako irolle xararishak yine. 12Yeesus gantah xiyaw ishi biiloh yayqaddaso ciloh, amaa daafot carafko irolle bixna yuble. 13Amaydo, nanu gantah usuk kabbaate waato curneyaako, amaa sifraako irolle nadawo. 14Nanu talle umman gedih marta daafo malinooki, tamaa tamaato le tiyä wagiyak nane. 15Amaydo, Yallah Yeesus araxah xamdet sadaqha dhuguuguluh akah bahnoo, amayim lel kaa migac cawwatoyshita ni wagubhi fire kinni. 16Mecaani abaanam kee litiinim garoolih xazitaanam mibaddaahishina, amaa gina-le sadaqhaq lel Yalla xedenishsham kinamhi sabbatah kinni.

17Sin manabottit sinak yarhxiinim toobbiinih, akah im-izzizanta, amayim lel usun tamaa tekkemhi addoodim yaxaw le mara balih, sin rooxe dhawrhaanamhi sabbatah kinni. Usun tayim angoroozomuk abaanam, sina tamficem makinamhi sabbatah, usun xedenak akah abaanaakah abanta.

18Nanu cado qalbe linomuh thummut kinomhi sabbatah, ummanim meceetih abno lel farhi linomhi sabbatah, dhaaco noh abanta. 19Anu dheh sinalle gaxo ciloh, dhaaco yoh abtoona mangum sin dhaacimak aniyo.

20-21Tamaa salaam Yalli, umman geedit cahdehi biiloh, ciidot naba loyna kin ni Maddara Yeesus rabaako uguseya, Yeesus Masiix araxah kayyadde basak-arhxinnannim nottadde abak, atin kaa farhi abtoona ciloh, umbuka mecaanih sin yaskataw. Umman gedda kee umman gedih lel nabne kayyah takkoo. Amin.

Abayshimat salaamta

22Yi saculo, ta uyshudhdhurheh sinalle aktubiyuk ane fawti farto, sabreelih kabbattoona sin dhaacimak aniyo. 23Timoteyos ni sacal yimfittixeh yanem irhiga, usuk dheh yemeetemko lel inkidde nekkeh sin nablo kino. 24Inkoh sin manabottit kee yinqiddise marak salaam akko erhexa. Tamaa Ithaaliyaako yemeete mari lel salaamat sinak yarhxin. 25Nicma umman sinlih takkoo!

Currently Selected:

Cibraan 13: SCC

Highlight

Copy

Compare