Yacqoob 1

Salaamta

1 # Maatiyos 13:55; Markos 6:3; Fartottit hi Abittot 15:13; Galaatiya 1:19 Yalla kee Maddara kin Yeesus Masiix garuzzo kin Yacqoobko, irolle faax-terhxeh tane lamman kee taman kishotya fanah: Salaamta.

Sinni imaan yacikkiniinim

2Yi saculo, mango caynah cakana sin taseedefe gedda, inkoh xeden balih ubula. 3Amayim lel, sin imaan cakanadde saya gedda, curtayyo sinah baaham taarhigiinimhi sabbatah kinni. 4Atin walaa inkim akko anqusinnixe yikmile mara kee gufe mara takkoona ciloh, amaa curtayyi kaamil yakkoo.

5Sinadde kas kaa farhshiishati yinniyemko, cadalekkah umman tiyah xindaalih yaxaye Yalla dhaacimoo. Akah lel tamxawo kinni. 6Tamaa dhaacimati laakin lammaa-garbitekkah imaanlih dhaacimoo, amayim lel lammaa-garbitati tamaa xaaxatti tuula kee tawlalle wana badti goomadhdhe balih kinamhi sabbatah kinni. 7Amaa gina-le xiyawti Maddaraako walaa inkim kabbaato ilaalo kaalle mitane. 8Usuk lamma-garbale, umbukaahimih agririnnixe tiya kinni.

9Baaxenta kin sacal isheh xaf-yerhxeh yanemih cafadoo. 10#Isayas 40:6-7 Gaddaale kinti lel cashshot combooba balih rabo kinamhi sabbatah sam-yerhxeh yanemih cafadoo. 11Ayrotta xiyaa xararishsha lacnaalih tawceyaako amaa cashsho kafishsha; tee combooba urgufumta, tee cirhi lel yalaye. Amayim balih, amaa gaddaali ishi araxalle dagum-dagumuh yalaw kinni.

12Tamaa cakanadde curtayyo abitati barakä-le tiya kinni, amayim lel cakanaako yawce gedda, tamaa Yalli kaa kixin marah wacde akah saye aniinat bor geyo kinni. 13Akkinnanti cakanadde saya gedda: “Yalli cakanadde yi sayshe” arhxe wayo. Amayim lel Yalli umaanih yamcakkano mirhiica, usuk lel isheh walaa inketta miyacikkinemhi sabbatah kinni. 14Ummanti ishi farhih hirgiimayaako yamlalayeh kinni cakanadde sayam. 15Sarrah tamaa farhi soonoyitta gedda zambe dhalta, zambi lel meceetih carsima gedda rabi baaha.

16Yinkixxine yi saculo, mamlalayna. 17Inkoh mece muttuxuwa kee naqhuse hin muttuxuwa aganaako, ambedeedelinnixe hido yanqeyeeyere silal balih akkinnixe carshi ifohi Abbaako kinni obtam. 18Nanu usuk isheh yukhluqheh yanemhi afti firehi caynaako nakko ciloh, ishi farhih rummaahit waanittah ni yuyshubuke.

Waanitta yaabbiinim kee abaanam

19Yinkixxine yi saculo, tayim irhiga: ummanti dheh yaabbe tiya, waanille afitinnixe tiya, dheh kurrayinnixe tiya yakkoo. 20Amayim lel, xiyawti kura Yallih atxaqqaq mibahshishshamhi sabbatah kinni. 21Amaydo, umbuka cayne kee mango umaani sinneeko mirix-ishsheenih, sin rooxe gargerto dhicta, sin addadde timzirriyeh tane waanitta amnonobba hinnim kabbata.

22Tamaa waanittaatim aba mara tika kibah, sinne doolabteenih yaabbe mara bisa makkinanta. 23Amaa waanitta yaabbeh abinnixeti yinniyemko, tamaati magannaxitille macal kee magoh ishi nifidde kulux-yarhxe tiya balih kinni. 24Usuk ishedde kulux-yarhxeh yadiyemhi sabbatah, amaa geddaakoh aagina luuk yinem biyashshiita. 25Laakin tamaa gadma hin sercat, finjat sercat kinyadde, kulux-yarhxeh, kayyalle yasbiteti, tamaa yaabbem biyashshiitekkah abittodde ashishati, abamadde barakä-le tiya yakko kinni.

26Akkinnanti diin-wanna kinam ishek yekkelemko, ishi anrab lel algume wayemko, ishi afcaado doolaba, ta xiyawtih diin lel foyya kinni. 27Abba kin Yallih nifille tsitstsaye leh masxitinnixe diin tatiya kinni: gidcatite xeewo kee gubon gufaanam kee ta caalamti masxeeko sinni nabse yabbirhiinim.

Currently Selected:

Yacqoob 1: SCC

Highlight

Copy

Compare