Efesos 4

Inkiino Masiix nabsedde

1Amaydo, anu Maddari sabbatah maxbuushsha kiyoyak, tamaa akah sinah deecimen deecoh idhdha tekkiinih gedhdhoona sin dhaacima. 2#Kolossay 3:12-13Tayim lel umbuka amnonobbi wayto kee mece-mariinoolih, curtayyoolih kaxanodde sittiya dhiica mara takkiinih abanta. 3Tamaa Ufayi inkiino lel salaam madhdhuwah tibbirhiinih dhawudhdhoona xawalanta. 4Tamaa sin deecoh tiyä kin inki cagalle akah sinah deecimeeniikah, inki nabse kee inki Ufaye kinni tanem. 5Inki Maddara, inki imaan, inki anthammaq, 6amayim balih, umman tiyahi buka, umman tiyahi araxah, umman tiyadde, umman tiyahi Abba kin inki Yalli yane. 7Tamaa Masiix muttuxuwahi qiyaas balih laakin nicma nottaako umman tiyah tomxoye. 8Amaydo tahe yarhxe:

# Zaabur 68:18 “Usuk aganalle kore gedda, mango maxaabuush isheelih beye,

xiyawah lel mango muttuxuwa yoxoye.”

9“Aganalle kore” yarhxiinim, guba baarholle gantah oobeh yinemhi macnaako bextih ayim yakko dhiica? 10Tamaa guballe oobeh yineti ummannim yaskamalo ciloh, carshi bukalle koreti kayya kinni. 11Usuk garoh fartottit, nobowa, mece warroyishsham, kaniisat zan abtam, garoh lel mudarrisiin muttuxuwa akah yoxoye. 12Amayim lel, tamaa yinqiddise mari yikkitiinyaako sinni khidma abeenih Masiix nabse carishoona ciloh kinni. 13Nanu lel inkoh imaanah tiya nekkeh, Yallih Barha neerhegeh hamme-le labha nekkeyaako, Masiix migehi qiyaas gufnandah kinni. 14Amayim lel, xiyaw siixo kee cijaajinnat araxah doolabimneh, geyinnan mazhabhi xaaxattah, irro balih tuula tawlal goomadhdheh duffuume malino. 15Amayim akkekkah, tamaa kaxanodde rumma waanishneh, ummanimih, kayyadde, tamaa amo kin Masiixidde carsimno nolle tane. 16#Kolossay 2:19Kayyadde, amaa nabsi inkoh, tamaa akah tomxoye umman mayrhabbashah sittiyadde akah yendhebeebesheh yaneekah, umman karima araxah takhdume gedda, kaxanoh yanabeh ishe carisha.

Cusub aniina

17Amaydo, atin kamboh tamaa Aki-mara balih amficinnixe sinni niyah tadawna sinalle mitanem, sinah warishah Maddarah lel ashhidiyuk ane. 18Usun tamaa tirir ten afcaadohi sabbatah kee tenadde tane sorhahi sabbatah ten fahmi dattoweh, Yallih aniinaako yicrhiinih yanin. 19Usun yidinzizinyaako, bacaalagino kee umbukaahimhi hirfeelih cibdaan abaanamah sinne yoxoynih yanin. 20Atin laakin Masiix zacabah ta gina lem maki labcaddeenim. 21Rummah kaa zacabah toobbiinih tekkiinimko, Yeesusudde yane rummahi araxah lel tudrusiinih tekkiinimko, 22#Kolossay 3:8,9tamaa basoh akah marak tinin, uma araxalle xiyaa beyta farhih masxite sinni nabse asac-ishanta. 23Ufayeh lel sinni niya tuscussubiinih, 24#Erhedhdhö 1:26; Kolossay 3:10 Yallih misleh rummaahit xaqqe kee anqaddasah yunkhulluqhe cusub nabse saritanta.

25 # Zakariyya 8:16 Amaydo, nanu inki nabsehi karim kinomhi sabbatah, sinko ummanti zirab xabeyaako, ishi zoobattoolih rumma waanishoo. 26#Zaabur 4:4Kurraanta, laakin zambedde misayna; kuradde anitin ayro sinak antabe waytoo. 27Ibliisih lel caashir akah maaxayna. 28Garceena kuuk yineti kamboh garace wayooki, akkinnan hin tiyaalih xaziilitam yaallo ciloh, ishi gabah mece ciyyo abak, yakhdamoo. 29Sin afufko uma waani awce waytooki, tamaa yaabbe marah nicma taxayeh, amaa waqhtedde akah farhshiisha ginah xiyaa carishsha waani waanishanta. 30Sin muucahi maxah atin akah tumxuttumiinih tanin Yallih Quddus kin Ufaye masxazanina. 31Umbuka cur-tarhxem kee xurtaame kee kura kee andhax kee dhaw, kee waato, umbuka umaaniilih sinneeko asac-ishanta. 32#Kolossay 3:13Yalli Masiix araxah sinalle akah xabeekah, sinne-sinneh mece mara, naxrurta-le mara tekkiinih, sittiyalle xabanta.

Currently Selected:

Efesos 4: SCC

Highlight

Copy

Compare