Efesos 3
3
Mece warehi sirri yimidhdhige
1Tayimhi sabbatah, anu Bawlos, Masiix kin Yeesus maxbuushsha kiyom Aki-marak sin idhdhadde kinni. 2Sinah arhxuk Yallih nicmahi masxadaadara yakkiinim yoh tomxoyeh tanem toobbiinih tannawna kitin yarhxiinim liyo. 3Tamaa ookomeh urhurhik sinalle akah uktubeh iniyookah, Yalli amaa mashthir waxyeh yi yiyshidhdhige. 4#Kolossay 1:26-27Tayim taqhriin gedda lel, anu Masiix mashthirko liyo irhga macalsittoona dhictan. 5Amayim lel tamaa kado Ufayi araxah yinqiddise kaa fartottit kee nobowah akah yumbulluweekah, tamaa aki ijojhi xiyaw dhayloh maamadhdhaginna. 6Ta sirri lel, Aki-mari Yahuudlih worosa, inki nabsehi karim, mece warehi araxah lel Masiix kin Yeesusudde amaa wacde yangale mara kinoonim kinni.
7Anu lel kaa xaylahi abittoh yoh tomxoye Yallih nicmah muttuxuwahi araxah ta mece warehi khaddaam ekke. 8Umbuka yinqiddise maraako cindha yottah, tamaa ammirmirinnixe Masiix gadda Aki-maralle warroysho, ta nicma yottah kinni tomxoyem. 9Tamaa ummanna yukhluqhe Yalladde dherh waqhte sucuteh yine mashthir hi xagara aymotta kinam umman tiyah caddoyishaanam yoh tomxoye. 10Amayim lel tamaa mango xibar le Yallih xikma, kaniisat araxah tamaa carshi makaanonulle tane reezon kee mas-uuliin yayshadhdhago ciloh kinni. 11Tayim lel tamaa umman geedit Yallih xagara balih usuk ni Maddara kin Masiix kin Yeesus araxah abaysheh yane. 12Nanu Yeesus kee kayyadde lino imaanah, fidbeelih thummut-nekkeyaako Yallalle namaato kino. 13Amaydo, tamaa anu sinah arhxuk geya cazaab, sin nabneh kinnik, niya ciddaanamko sin essera.
Dhaaco Efesosti xiyawah
14Tayimhi sabbatah, Abbat nifille gululluubuwa, 15umman xawaz carshe kee baarholle yaneya migac geyam kaako kinni. 16Tamaa kaa nabnehi gadda balih lel, ishi Ufayi araxah sinni addadde xaylah akah tatririiniikah sinak aboo. 17Masiix lel imaanah sin afcaadodde sigo dhaaco abak aniyo. Atin lel rimid dhirhiiteenih kaxanodde tamtakkaloona, 18umbuka yinqiddise maraalih tekkiinih lel, kaa kaxanih fidaane kee dhedhdhan, xafta kee samta ayidhdha kinam meceetih tafhamoona, 19kee tamaa xiyaw irhgaako aganalle kin Masiix kaxano taarhagoona, umbuka Yallih migeh tammaagoona ciloh lel dhaaco abak aniyo.
20Amaydo, tamaa nottadde yashtuqhule xayla balih, inkoh nanu essernam hido naxeesebemko ziyaada yeymengeh abo dhiica kayyah, 21umbuka ijolle umman gedda kee umman gedih kaniisa kee Masiix kin Yeesus araxah, nabne Yallah takkoo. Amin.
Currently Selected:
Efesos 3: SCC
Highlight
Copy
Compare
Share
Want to have your highlights saved across all your devices? Sign up or sign in
©2024 Wycliffe Ethiopia
