1 Yohannis 4

Ufaye imirmira

1Yi kaxantoolito, umman ufaye maamanina, laakin Yallaako kinam kee makinam ufaye imirmira. Amayim lel mango zirabti nobowa caalamalle ifaareenih yaniinimhi sabbatah kinni. 2Taginah lel Yallahi Ufaye taarhigin: umman ufayi Yeesus Masiix nabse yekkeh yemeetem aaliminnaniya, Yallaako kinni. 3Laakin umman ufayi Yeesusuh aaliminnexeya, Yallaako maki. Tati lel masiix-didde kin [ufaye] kinni. Too yamaato kinam toobbiinih tinin, kado lel mece geddah caalamalle yane. 4Cindha cindhaamo, atin Yallaako kitin, tena lel timlikiinih tanin. Sinadde Yanetii caalamadde yane tiyaako nabamhi sabbatah kinni. 5Usun caalamko kinon, amaydo caalamti waanih waanishan, caalam lel ten taabbe. 6Nanu Yallaako kino, Yalla yaarhigeti ni yaabbe, Yallaako akkinnexeti laakin ni miyaabbe. Tayimko lel rummaahit ufaye kee doolab ufaye naarhige.

Yalli kaxano kinni

7Yi kaxantoolito, sitta nakxanoo, kaxani Yallaako kinamhi sabbatah, akxininnanti lel Yallaako yoobokeh yane, Yalla lel yaarhige. 8Yalli kaxano kinamhi sabbatah, akxinewaati, Yalla maarhago. 9Taginah Yallih kaxani noh yimidhdhige: Yalli inki ishi Barha caalamalle fareh yanem, kayyah marno ciloh kinni. 10Tadde kinni kaxani yanem: nanu Yalla nikxineh nanem maki, laakin usuk ni yikxine. Ishi Barha lel ni zambit hi beezzah fare. 11Yi kaxantoolito, Yalli tayidhdha ni yikxinek sarrah, nanu sitta nakxano nolle tane. 12Yalla yubleti inkinnah miyane. Sitta nikxinemko Yalli nottadde siga. Kaa kaxani lel nottadde yikmileh yane.

13Taginah nanu kayyadde usuk lel nottadde sigam naarhige: usuk noh yoxoyeh yane ishi Ufayehi sabbatah kinni. 14Nanu lel Abba Barha caalamti Gargeereena yakko fareh yanem, nubleh nanem lel nashhide. 15Yeesus Yallih Barha kinamah aaliminnanti, Yalli kayyadde usuk lel Yalladde siga. 16Nanu lel Yalli nottah le kaxano neerhegeh neemeneh nane. Yalli kaxano kinni. Kaxanodde sugati, Yalladde siga, Yalli lel kayyadde siga. 17Taginah kaxani nottaalih yikmileh yanem, firdi max fidbe naallo ciloh kinni. Ta caalamalle nanu gantah usuk akah kinniika balih kino. 18Kaxanodde gilix miyane, gilix qitscatlih kinamhi sabbatah, laakin yikmile kaxani gilix irolle cida. Gilixati, kaxanodde yikmileh miyane. 19Usuk erherhih ni yikxinemhi sabbatah nanu kixinino. 20Akkinnanti “Anu Yalla kixiniyo” yerhxemko, ishi sacal lel yincibemko, usuk zirable kinni. Yubleh yane ishi sacal akxine wayemhi sabbatah, Yalla yubleh miyaneya yakxano mirhiica. 21Nanu kaako lino amri tatiya kinni: Yalla yakxineti ishi sacal yakkeedo yakxanoo.

Currently Selected:

1 Yohannis 4: SCC

Highlight

Copy

Compare