1 Yohannis 5

Caalamko yamlikiinim

1Yeesus, Masiix kinam aamininnanti, Yallaako yoobokeh yane. Abba akxininnanti lel kaako yoobokeh yane tiya gantah yakxine. 2Taginah Yalla nakxineh kaa amre abna gedda, Yallih cindham kixininom naarhige. 3Tay kinnih Yallih kaxani: kaa amre dhawurhnam. Kaa amri lel micilisha. 4Yallaako yoobokeh anniinnanti, caalamko yamlikemhi sabbatah; amaa caalamko yamlike nasri lel tatiya kinni: ni imaan. 5Yeesus Yallih Barha kinamah yaamine tiyaako bextih, miyatto kinni caalamko yamliketi?

Yallih Barhih sabbatah yashhidiinim

6Laye kee biiloh Yemeeteti tatiya kinni: Yeesus Masiix. Amaa layeh bisa maki, laakin amaa layeh kee amaa biiloh [yemeete]. Quddus kin Ufayi amaa rumma kinamhi sabbatah, amaa Ufayi lel yashhide tiya kinni. 7Tashhidem adox kinon: 8Amaa Ufaye, laye kee biilo, ta adox lel inketta kinon#5:8 Wuli kalxiitim gabah tunkuttubeya (manuscript) ta xibareh yunkuttubeh yane: 7 Carshelle tashhidem adox kinon, Amaa Abba, Waanitta kee Quddus kin Ufaye. Ta adox lel inketta kinon. 8 Udduuniyalle tashhidem adox kinon: Amaa Ufaye, laye kee biilo, ta adox lel inketta kinon.. 9Xiyaw shahaada kabbatnemko, Yallih shahaada amayimko naba. Yalli ishi Barhih zacabah yoxoye shahaada tatiyä kinni. 10Yallih Barhah yaamineti, shahaada ishedde le. Yallah aamine wayati, Yalli ishi Barhi zacabah yishhideh yane shahaadah yeemeneh miyanemhi sabbatah, kayyak zirable abeh yane. 11Shahaada lel tatiyä kinni: Yalli umman geedit aniina noh yoxoye. Ta aniina lel kaa Barhadde tane. 12Ta Barha leti ta aniina le; Yallih Barha aalle wayati, ta aniina male.

Taarhagoona ciloh

13Yallih Barhih migacalle yaamine marak, umman geedit aniina litiinim taarhagoona ciloh tayim sinalle uktube. 14Kaa wajhelle lino fidbi lel tatiya kinni: kaa farhih akkinnan xaaja dhaaciminnemko ni yaabbe. 15Dhaacimitinnanimih ni yaabbem neerhegemko lel, kaako dhaacimneh nanem linom naarhige.

16Akkinnanti, kaa sacal raba fan santishinnexe zambe abak yublemko, usuk akah esseroo, usuk lel raba fan santishinnexe zambe abatiyah Yalli aniina akah yaxaw kinni. Raba fan santisha zambi yane; tayimhi zacabah dhaacimoo maarhxe. 17Umbuka uma abitto zambe kinni, raba fan santishinnexe zambi lel yane.

18Yallaako yoobokeh yanetii, zambe maabam naarhige. Laakin Yallaako yoobokeh yane tiya, usuk kaa dhawrha, umati lel kaa dhafo mirhiica.

19Nanu Yallaako kinom naarhige, umbuka caalam lel umatiih [xaylahi] galedde carhah-gaxteh tane.

20Yallih Barhi yemeeteh yanem, rumma kin tiya naarhago ciloh fahme noh yoxoyeh yanem naarhige. Nanu lel rumma kin tiyadde, kaa Barha Yeesus Masiixidde nane. Tati amaa rummaahit Yalla kee umman geedit aniina kinni. 21Cindha cindhaamo, asnaamko sinne ixfiza.

Currently Selected:

1 Yohannis 5: SCC

Highlight

Copy

Compare