1 Yohannis 3

1Yallahi cindham nekkeh decsimnemhi sabbatah, Abba aaginale kaxano noh yoxoyeh yaneya ubula! Kinom kinni lel! Kaa maarhaginnamhi sabbatah, amaydo lel caalam ni mitaarhige. 2Yi kaxantoolito, kado Yallahi cindham kino, ayim nakko kinom lel kazzik maamadhdhago. Usuk yambulluwe gedda, akah kinniikah kaa nablo kinomhi sabbatah, kaa balih nakko kinom naarhige. 3Kayyadde cag aallinnanti, tamaa Usuk thaahir akah kinniika balih ishe yaythihire.

4Zambe lemidde asinnanti, gantah sercat-maliino aba; zambi lel sercat-maliino kinni. 5Usuk zambit kalo ciloh yimidhdhigem lel taarhigin, kayyadde lel zambi miyane. 6Kayyadde siginnanti, zambe maaba; zambe abinnanti, kaa maballinna walaa kaa miyaarhige. 7Cindha cindhaamo, walaa inketti sin doolabe wayoo. Xaqqe abati, usuk xaqqi-wanna akah kinniika balih xaqqi-wanna kinni. 8Zambe lemidde asak yanetii, ibliisko kinni, ibliis erherhko zambe abatiya kinamhi sabbatah kinni. Tayimhi sabab lel Yallahi Barhi yimidhdhigem, ibliis ciyyo dumuso ciloh kinni. 9Yallaako yoobokeh anniinnanti, kaa zari kayyadde sigamhi sabbatah zambedde maasa. Yallaako yoobokeh yanemhi sabbatah lel zambe abo mirhiica. 10Taginah kinni lel Yallahi cindham kee ibliis cindham yamidhdhigiinim. Xaqqe abe waya tiya kee ishi sacal akxinuk anniye waya tiya, Yallaako maki.

Sittiya ikxina

11Ta “sittiya nakxanoo” tarhxe farto kinni tamaa erherhko toobbiinim. 12Ishi sacal yurxude uma tiyaako kin Qaayin balih maki. Ayimhi idhdhadde kaa yurxude? Kaa ciyyo umaani kuuk tine, kaa sacalhim laakin xaqqe kuuk tinemhi sabbatah kinni. 13Saculo, caalam sin tincibemko mibexsiitina. 14Sacul kixinnomhi sabbatah rabaako aniinalle tillabnem naarhige. Akxinuk anniye wayati ditedde siga. 15Ishi sacal ancibinnanti, nabsi-wanna kinni. Nabsi-wanna akkinnanti lel umman geedit aniina kayyadde sigak taneya malem taarhigin.

16Usuk ishi aniina nottah ayyuk tillaabishemhi sabbatah, kaxano lel taginah neerhegeh nane. Nanu lel saculuh aynuk ninni aniina tillaabishno nolle tane. 17Laakin akkinnanti caalamti iraaro yeellemko, kaa sacal lel gidcat lem macalsiita, ishi qalbe lel yarhuwe, aaginah kinni Yallahi kaxani kayyadde sigo dhiicam? 18Cindha cindhaamo, abitto kee rummah kibah afah hido anrabah akxine waynoo.

19Taginah lel nanu rummaako kinom naarhago kino, kaa wajhelle lel ninni qalbe nashshamano kino. 20Amaymih ni qalbi uma firde noh yoxoyemko, Yalli ni qalbeeko naba, ummannim lel yaarhige. 21Yi kaxantoolito, ni qalbi uma firde noh axaye wayemko, Yallih wajhelle fidbe lino. 22Kaa amre dhawurhnah kee kayya ruf-ishsham abnamhi sabbatah, dhaaciminnanim lel kaako kabbatna. 23Tatiya kinni lel kaa amri: usuk amre akah noh yoxoyka balih, kaa Barha kin Yeesus Masiix migacalle naaminem kee sittiya nakxinem. 24Kaa amre dhawrhinnanti lel kayyadde siga, usuk lel kayyadde; taginah lel usuk noh yoxoye Ufayeh usuk nottadde sigam naarhige.

Currently Selected:

1 Yohannis 3: SCC

Highlight

Copy

Compare