JOSHUA 10
10
Amor Mi Pawl An Neh
1Joshua in Jerikho khua a siatbal thluh ih an siangpahrang khal a thah vekin Ai khua khal a siatbal thluh ih an siangpahrang khal a that a si ti kha Jerusalem#Jerusalem khua hi culaiah Jebus mi pawl ih khawpi a si. siangpahrang Adonizedek in a thei. Cule Gibeon mi pawl in Israel mi pawl thawn remnak an tuah ih an lakah an um ti khal a thei fawn. 2Gibeon khua cu a dang khawpi tlukin a tum ih Ai khua hnakin a tum sawnmi a si. An ralkap khal ralṭhami an si ruangah Jerusalem mi pawl cu an thin a phang ngaingai. 3Curuangah Adonizedek in Hebron siangpahrang Hoham, Jarmuth siangpahrang Piram, Lakhish siangpahrang Jafia le Eglon siangpahrang Debir pawl hnenah thu a cah: 4“Gibeon mi pawl in Joshua le Israel mi thawn rem awknak thukam an tuah hrangah ra uhla Gibeon mi pawl do in ra bawm uh,” tiah a ti. 5A cah bangtuk in Amor miphun siangpahrang panga: Jerusalem, Hebron, Jarmuth, Lakhish, le Eglon khua ih siangpahrang pawl cu an ralkap zate thawn an tongkhawm aw ih Gibeon khua cu an kulh ih an do.
6Cutikah Gibeon mi pawl in Israel mi pawl riahnak Gilgal ih a um mi Joshua hnenah, “Bawipa, dung in tun hlah aw. Zamrangte in ra awla in ra bawm aw. Tlangpar ramih a ummi Amor siangpahrang pawl an kom aw ih in do a si. In ra run hramhram aw,” tiah bomnak an dil.
7Curuangah Joshua le a ralkap pawl cu, a ralkap ṭhabik pawl thawn, Gilgal ihsin an hung feh. 8Cule Bawipa in Joshua hnenah, “Na thin phang hlah. Nehnak ka lo pe zo a si. Zohman a lo do theitu an um lo ding,” a ti. 9Joshua cu Gilgal ihsin Gibeon tiang zanvar a hung feh ih rinlopi-ah an ral pawl cu a nam. 10Israel ralkap pawl an hmuh tikah ral pawl cu an thin phang ṭheh ko in Bawipa Pathian in a tuah. Cutikah Israel ralkap pawl in Gibeon khua ahcun ral pawl cu an that ciamco. Cule Beth Horon tlangkawn ihsin an vun dawi ih Azekah le Makkedah khua tiang an vun that phah vivo. 11Cuih tlunah Israel ralkap ṭih ih Beth Horon tlangkawn ihsin Azekah khua tiang an tlan laiah van ihsin Bawipa in bokbawn tiatia rial a tlakter ih tampi an thi. Rial ih tlak thatmi pawl cu Israel ralkap ih ralnam thawn thahmi hnakin an tam sawn.
12Pathian bomnak in Israel mi in Amor mi pawl an neh ni ahcun Israel mi pawl theihhngan ah Joshua in Bawipa ih hnenah hiti in a au:
“Maw Ninu, Gibeon khua tlunah
ding law;
Maw Thlapa, Aijalon Horkuam
tlunah cawl law,” tiah a ti.
13A ti vekin Israel mi pawl in an ral pawl an neh thluh hlan lo ni cu a ding ih thlapi cu a cawl ngaingai. Hi thu cu Jashar Cabu sungah an ngan a si. Ni cu feh nawn loin van laifangah ni khat pumhlum a cawl. 14A cuih sun bangtuk, Pathian in Israel mi a ṭan ih Bawipa in milai ih thu a ngai caan, leilung hramthawh ihsin a um dah keel lo. Bawipa cu Israel lam ṭangin ral a do a si.
15Cule Joshua le a ralkap pawl cu an riahnak Gilgal ah an tlung.
Joshua In Amor Siangpahrang Panga A Kai
16Siangpahrang panga pawl cu an tlan suak ih Makkedah lungpuk ah an relh. 17Cutawkih an relh kha an theih tikah Joshua an sim. 18Joshua in, “A cuih lungpuk kaa-ah cun lungto tumpipi va peng uhla a kiltu va ret uh. 19Sikhalsehla nanmah cu cutawkah um hlah uh; ral pawl cu dawi uhla an dunglam in that vivo uh; zohman an khawpi sung thleng hlah hai seh. Bawipa nan Pathian in nan kut sungah a lo pe zo a si,” tiah a ti. 20Joshua le a ralkap pawl in ral pawl cu an that vivo ih an neh thluh. An thah lomi hnihkhat cu an khawpi ralhruang sung an thleng thei ih cupawl cu an that hai lo. 21Cule a ralkap pawl cu Joshua hnenah an riahnak Makkedah ahcun himdamte in an thleng thluh.
Cuih hnuah Israel mi parah zohman in zianghman an ṭong ngam nawn lo.
22Cule Joshua in, “Lungpuk kaa cu ong thlang uhla siangpahrang panga pawl cu ka hnenah rak hruai uh,” tiah a ti. 23A ti vekin an tuah. Jerusalem khua siangpahrang, Hebron khua siangpahrang, Jarmuth khua siangpahrang, Lakhish khua siangpahrang le Eglon khua siangpahrang pawl cu an rak hruai. 24A cuih siangpahrang pawl Joshua hnenih an ra thlen tikah Joshua in Israel mi hmuahhmuah a ko ih amah thawn ral a dotlangtu a kuthnuai bawi pawl cu, “Hinah ra uhla hi siangpahrang pawl ih hngawng hi nan ke in ra pal uh,” tiah a ti. A ti vek in siangpahrang pawl ih hngawng cu an pal. 25Cutikah Joshua in an hnenah, “ṭih hlah uhla nan tha khal nau hlah seh. Cak uhla nan ral ṭha uh, ziangahtile nan ral pawl parah Bawipa in hi bangtuk in a tuah ṭheh ding a si,” tiah a ti. 26Cuih hnuah siangpahrang pawl cu Joshua in a that ih an ruak cu thingkung kung nga ah a thlai. Cuticun zanlam tiang an thlai. 27Ni a tlak tikah Joshua ih thupek bangtuk in an ruak an lak ih a hlanih an relhnak lungpuk sungah an vun hlon. Cule lungpuk kaa-ah cun lungto tumpipi an pen ih acuih lungpen cu tuih san tiangin a um lai a si.
Joshua In Amor Ram Tampi A Lak
28Cuih ni ah Makkedah khua cu Joshua in a do ih a neh ih an siangpahrang bawipa khal a kai. An siangpahrang bawi le an khawsung mi zatein pakhat hman hrelh loin a that thluh. Jerikho siangpahrang parih a tuah vek thotho in Makkedah siangpahrang par khal ah a tuah.
29Cuih hnuah Joshua le a ralkap pawl cu Makkedah ihsin an feh in Libnah khua an do. 30Pathian in nehnak a pek bangtuk in Israel mi pawl cun acuih khua le an siangpahrang bawipa khal cu an neh. Khawsung mi pawl cu pakhat hman taang loin nam in an saat that thluh. Jerikho siangpahrang parih an tuah vek thotho in Libnah siangpahrang khal an tuah a si.
31Cuih hnuah Joshua le a ralkap pawl cu Libnah ihsin Lakhish ah an feh. Lakhish cu an kulh ih an do. 32Pathian in Israel mi hnenah nehnak a pek ih Lakhish khua cu ni hnihnak ah an neh. Libnah mi an thah thluh vekin Lakhish khua mi khal pakhat hman taang loin an that thluh. 33Cule Gezer siangpahrang Horam cu Lakhish run dingah a ra naón Joshua in a neh ih amah le a ralkap pawl cu pakhat hman luat loin a that thluh.
34Cuih hnuah Joshua le a ralkap pawl cu Lakhish ihsin Eglon ah an feh. Eglon khua cu an kulh ih an do. 35A cuih sun thotho ah an lak ih Lakhish khua an tuah vekin Eglon khua mi pawl khal pakhat hman luat loin nam in an sah that thluh.
36Cuih hnuah Joshua le a ralkap pawl cu Eglon ihsin Hebron ah an hung feh ih an do. 37Hebron khua an lak ih an siangpahrang an that ih khawsung mi hmuahhmuah le a kiangkap khua mi pawl khal an that thluh. Hebron cu an siatsuah thluh. Eglon khua an tuah vekin Hebron khawsung khal ah mi pakhat hman taang loin an that thluh a si.
38Cuih hnuah Joshua le a ralkap pawl cu Debir lamah an her ih Debir khua an do. 39An siangpahrang an kaih ih acuih khua le a kiangkap khua pawl tla an lak. An minung an zatein an that thluh. Hebron le Libnah khua mi pawl le an siangpahrang an thah thluh vek thotho in Debir khua mi pawl le an siangpahrang bawipa cu pakhat hman zuah loin an that thluh a si.
40Cuticun cuih hrawng ram pumpuluk Joshua in a neh thluh. Tlangpar ram le Negev nelrawn ram siseh, hmunrawn ram le tlangtluan ram siseh, an siangpahrang bawi pawl thawn a neh thluh a si. Israel Bawipa Pathian thupekmi bangtuk in minung pakhat hman luat loin a that fai thluh a si. 41Joshua in thlanglam ram Kadesh Barnea ihsin tipi kapih ummi Gaza tiang, Goshen ram hmuahhmuah le saklam ramih ummi Gibeon tiang a neh thluh. 42Israel ih Pathian Bawipa cun Israel mi pawl a ṭanpi ruangah hi ram hmuahhmuah le an siangpahrang pawl tla cu ṭumkhat raldo-ah Joshua in a neh thluh hai a si. 43Cuih hnuah Joshua le a ralkap pawl cu an riahnak Gilgal ah an kir sal.
Currently Selected:
JOSHUA 10: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
