JOSHUA 9

Gibeon Mi Pawl In Joshua An Bum

1Joshua in hi khua pawl a nehnak thu cu Jordan ihsin nitlaknak lamih a ummi siangpahrang pawl le tlang parih a ummi siseh, hmunrawn ih a ummi siseh, Mediterranean Tifinriat kapih a ummi pawl, saklam ah Lebanon ramih a ummi tiangin an thei thluh. Cutiin Hit mi, Amor mi, Kanaan mi, Periz mi, Hiv mi le Jebus mi tla-ih siangpahrang pawl in an theih tikah, 2Joshua le Israel mi pawl do dingin an ṭangkhawm.

3Joshua in Jerikho le Ai khua parih a tuahmi kha Hiv miphun Gibeon khua mi pawl in an theih tikah, 4Joshua cu a bum an tum. A tlekmi dip in rawl an thun ih belhmi savun ih tuahmi sabit thawl thawn laak pawl an phurhter. 5Belhcop mi kedam le hnipuan siava an hruk ih lamcaw an kenmi tla cu a car cia le a mawrmi sang lawnglawng an si. 6Cule Gilgal ih an riahnak ahcun an feh ih Joshua le Israel mi hnenah cun, “Nan hnenah lam hlapi ihsin kan ra ih rem awknak thukam kan tuah hram pei,” tiah an ti.

7Cutikah Hiv mi hnen ahcun Israel mi pawl in, “Lam naite ih ummi tla nan si ahcun ziangtinso rem awknak thukam cu kan tuah thei ding?” an ti.

8Cun Joshua hnenah, “Bawipa, kannih cu na sal kan si,” tiah an ti. Joshua in, “Zoso nan si? Khuitawk in so nan rat?” tiah a sut.

9Cutikah annih in, “Na Bawipa Pathian ih thil a tuahmi kan theih ruangah khawhlapi ihsin kan ra a si. Izipt ramih thil a tuah mi siseh, 10Jordan ihsin nisuahnak lamih a ummi Amor miphun siangpahrang pahnih - Heshbon siangpahrang Sihon le Ashtaroth ih a ummi Bashan siangpahrang Og parih a tuahmi thil pawl siseh, kan thei ṭheh. 11In hotu pawl le kan ram mi hmuahhmuah in, ‘Rawl keng uhla Israel mi pawl va tong uh; nan sal kan si ih rem awknak thukam kanmah thawn tuah hram uh,’ tiih sim dingah in fial a si. 12Kan kenmi sang pawl hi zohhnik. Nangmah tong dingih kan inn ihsin kan pawh tikah a hlum lai hrih a si. Asinain atu-ah cun a car ih a mawr thluh zo. 13Cun sabitti thunnak savun thawl pawl hi zohhnik. A tharte an si naón atu-ah cun an tlek ṭheh zo. Kan hnipuan le kan kedam pawl khal hi zohhnik. Lamhlazet ihsin kan ra ih an ṭet thluh zo a si,” tiah an ti.

14Rawl an kenmi cu Israel hotu pawl in an saang ih an ei. Asinain Bawipa ih duhnak an hawl hmaisata lo. 15Cutiin Joshua in remnak a tuah ih thah an tuar lonak dingah anmah thawn thukamnak a tuah. Cule Israel hotu pawl in acuih thukamnak cu an hngetter.

16Thukamnak an tuah hnu ni thum hnuah Gibeon mi pawl cu lam naite ih a ummi an si ti kha Israel mi pawl in an thei. 17Curuangah Israel mi pawl cu an feh ih Gibeon mi umnak Gibeon khua, Khefirah khua, Beeroth khua le Kiriath Jearim khua ahcun an thleng. 18Sikhalsehla Israel mi pawl in Gibeon mi pawl cu thah dingah a cang thei nawn lo, ziangahtile an hotu pawl in anmah thawn Israel ih Pathian Bawipa ih hmin in thukamnak an rak tuah zo a si. Cuih thu ruangah Israel misenpi pawl cu an hotu pawl parah an phunzai ciamzo. 19Sikhalsehla an hotu pawl cun, “Bawipa, Israel ih Pathian hmin sal in thukamnak kan tuah zo. Ziangti hman in annih kan dai thei nawn lo. 20Thu kan kam zo ruangah kan zuah tengteng a ṭul a si. Kan zuah lo a si ahcun Pathian in kanmah in hrem ding. 21Cu a si ruangah um ve ko hai seh; asinain kan hrangah zanthing an hrep pei ih tidai an khai pei,” tiah an ti. An hotu pawl ih sim vek cun misenpi pawl in an thlun.

22Joshua in Gibeon mi pawl cu a ko ih, “Kan kiangteih ummi nan si naón ziangah so lam hlatpi in kan ra tiah in bum? 23Hitiih in bum ruangah Pathian siatserhmi nan si. Tu-ihsin thokin ka Pathian ih inn hrangah zanthing hreptu le tidai khaitu, hnaṭuantu sal nan si ringring ding,” tiah a ti.

24Cutikah Gibeon mi pawl cun, “Bawipa na Pathian in a siahhlawh Moses hnenah thu a pek ih hi ram pumpi cu na kut sungih pek dingah le hi ram sungih a um mi hmuahhmuah cu thah thluh dingin a sim a si, ti fiangtein kan thei. In that thluh ding ti kan phang ih kan lo ṭih tuk ruangah hiti ih kan lo tinak a si. 25Atu cu na kut sungah kan um zo ih a dik na ti vekin in tuah ko aw,” tiah an ti. 26Cuhrangah Israel mi pawl ih thah lo dingin Gibeon mi pawl cu Joshua in a humhim a si. 27Asinain Bawipa ih biakṭheng hrang le misenpi hrangih tidai khaitu le thing hreptu hnen-um ah a tuah. Bawipa in Amah biaknak hrangih a hrilmi hmun kipah hnaṭuantu pawl cu tuih san tiangin anmah an si.

Currently Selected:

JOSHUA 9: FCL

Highlight

Copy

Compare