JOSHUA 11
11
Jabin Le A ṭanpitu Pawl An Neh
1Israel in ral an nehnak thu pawl cu Hazor siangpahrang Jabin in a rak theih tikah Madon siangpahrang Jobab, Shimron khua siangpahrang, Akshaf khua siangpahrang, 2saklam tlang par siangpahrang pawl, Galilee Tili ihsin thlanglam ih ummi Jordan horkuam siangpahrang pawl, tlanghram hmunrawnih ummi siangpahrang pawl le nitlaknak lamih Dor kiangkap siangpahrang pawl thu a cah. 3Cun Jordan tiva kap hnih ih a ummi Kanaan mi pawl, Amor mi pawl, Hit mi pawl, Periz mi pawl, tlangpar ramih ummi Jebus mi pawl, le Mizpah ram Hermon Tlang hram hrawngih ummi Hiv mi pawl a cah thluh. 4A cah vekin an ra ih an ralkap pawl cu tifinriat kap ih vunnel zat an si. Rang le rangleng tampi an keng. 5Hi siangpahrang pawl cun an ralkap pawl an finkhawm ih Israel do dingah Merom ih ummi Merom Cerh timi kapah an tong khawm aw.
6Cutikah Bawipa in Joshua hnenah, “ṭih hlah. An zatein thaisun atu tikcu-ah Israel kut sungah ka lo pe ding ih an thi thluh ding. An rang pawl ih kaizatha cu sat cat awla an rangleng pawl cu meisa in ur thluh aw,” tiah a ti. 7Curuangah Joshua le a ralkap pawl cun an rin lo laiah Merom Cerh kiang ahcun an do ciamco. 8Bawipa in nehnak cu Israel kut sungah a pek ih an nam tikah an neh ih saklam ah a ummi Sidon le Misrefoth Maim tiang, nisuahnak lamah Mizpah horkuam tiang, an ral pawl cu an dawi. Minung pakhat hman taang nawn lo tiangin an that thluh a si. 9Bawipa ih thupekmi bangtuk in Joshua cun an rang pawl ih kaizatha cu a sat cat ih an rangleng pawl cu meisa in a ur ṭheh.
10Cule Joshua cu a kir sal ih Hazor khua a neh ih an siangpahrang bawipa tla a that. A cuih san ahcun Hazor khua siangpahrang cu siangpahrang ukmi pawl lakah an hotu bik a si. 11Hazor khawsung mi pawl cu pakhat hman taang loin an that thluh ih an khua khal an ur ṭheh.
12Cutawk hrawngih siangpahrang pawl le an khawpi pawl cu Joshua in a neh thluh. Bawipa ih siahhlawh Moses ih thupeknak bangtuk in Joshua cun a that thluh hai a si. 13Sikhalsehla tlang fatete parih an tohmi khua lakah Joshua ih urmi Hazor khua siar lo khawpi dang pakhat hman Israel mi in an ur lo. 14Hi khawpi pawl ihsin an lonmi thil mankhung le ṭilva pawl hmuahhmuah cu Israel mi pawl in anmah ih hrangah an lak. Asinain minung cu an zatein an that thluh; pakhat hman an luat lo. 15Bawipa Pathian in a siahhlawh Moses hnenah thu a pek ih Moses in Joshua hnenah cuih thu cu a pek; acuih thu bangtuk in Joshua cun a thlun ṭheh. Moses hnenih Bawipa ih thupekmi bangtuk in Joshua cun a tuah thluh a si.
Joshua In Ram Pumpi A Neh
16A cuih ram cu Joshua in a neh thluh: tlangpar ram, Negev ram hmuahhmuah, Goshen ram hmuahhmuah, nitlaklam tlanghram, Jordan phairawn, Israel ram sungih tlangpar ram le hmunrawn pawl, 17Seir ram lamih a hungfehmi Halak tlang ihsin Hermon Tlang thuai ih a ummi Lebanon Phairawn ram sungih Baal Gad tiang a neh thluh. Hi ramih siangpahrang pawl cu a kaih hnuah a vuak ih a that hai. 18Caan reipi hi siangpahrang pawl cu a do. 19Gibeon khua ih a ummi Hiv mi pawl siar lo, khui khua hman in Israel mi thawn remnak thukam an tuah lo. An zatein do-awk hnu lawngih nehmi an si thluh. 20Zaangfahnak zianghman um loin thah thluh le siatsuah thluh an sinak dingah an thinlung cu Israel mi do dingah Bawipa in a khohter. Cutiih tuah dingah Bawipa in Moses cu a rak tiam cia zo a si.
21A cuih caan ah tlangpar ramih a ummi: Hebron khua, Debir khua, Anab khua le Judah le Israel tlangpar ram pawl ih a ummi, mitum zetzet Anak mi pawl cu Joshua in a that thluh. An minung pawl an ci in a mihter ih tlunah an khawpi pawl tla a siatsuah thluh a si. 22Israel ram sungah Anak mi pakhat hman an taang nawn lo. Asinain Gaza, Gath le Ashdod khua ahcun malte an taanglai a si.
23 Bawipa in Moses hnenih thu a pek bangtuk in acuih ram pumpuluk cu Joshua in a neh thluh. Cule acuih ram cu Joshua in anmah ih comi ro si dingah Israel mi hnenah a pek; Israel miphun zat in ram cu a ṭhen ih ṭhen khat fingfing a pek a si.
Cuticun an ram cu ral nei loin a cawl.
Currently Selected:
JOSHUA 11: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
