EZEKIEL 18

1 Bawipa in ka hnenah, 2“Israel ram sungih misenpi in,

‘An nu le an pa in sabit thur

an in ih an faate pawl ih

ha a ṭim,’

tiah an saal leuhleuh mi ṭongṭhimnak hi ziangso a si?

3“Pathian nung ka sinak hmin saal in Cungnungbik Bawipa keimah in ka lo sim: Israel ram sungah hi ṭongṭhimnak cu nan saal nawn lo ding. 4Mi hmuahhmuah ih nunnak cu ka ta a si; nu le pa ih nunnak siseh, faale pawl ih nunnak siseh ka ta an si ṭheh. Sualnak a tuahtu cu a thi ding.

5“Thuṭhimnak ah mi ṭhazet, mi ding le mi felzet pakhat a um ti bang sehla. 6Israel mi pawl ih biakmi milem a bia ve lo, khawsia biaknak ih ti le rawl khal a in a ei lo. Midang nupi a thlem lo ih thi a neilai mi nunau thawn a sual lo. 7Zohman a bum lo ih an thil khal a ru lo. Tangka cawitu ih thukamnak thilri khal ṭhatein a khirh sal. Rilrawngmi a cawm ih hnipuan nei lo pawl hnipuan a pek. 8A pungṭhang duh ah tangka mi a cawih lo. Thil ṭha lo tuah cu a duh hrimhrim lo; thu-el awknak ah feltein thu a relcat. 9Cuvek milai cun ka thupekmi a tuah ih ka daan feltein a thlun. Miding a si ih a nung ding,” tiah Cungnungbik Bawipa in a ti.

10“Thuṭhimnak ah hi pa hin fapa pakhat, sim theih lo fapa, nei sehla; cuih a fapa cun a pa ih a tuah dah lomi thil tuah sehla: 11ruk a ru, mi a that, khawsia biaknak ti le rawl a ei ih mi nupi khal a thlem. 12Mifarah a bum, mi thil a ruk, tangka cawitu ih thukamnak thilri khal a khirh nawn lo. Lawki mi raithawinak hmunah a feh, fihnungza milem a biak ih, 13a pungṭhang duh ah tangka mi a cawih. Cupa cu a nung ding maw? A nung lo ding. Hi bangtuk thil, fihnungza thil a tuah ruangah a thi ding. A thih cu amah ih mawh ruangah a si ding.

14“Thuṭhimnak ah hi pa in fapa pakhat a nei ve. A pa ih tuahmi thil ṭha lo tampi kha a hmu, asinain a thlun lo. 15Israel mi pawl ih biakmi milem kha a bia ve lo; khawsia biaknak ti le rawl a ei lo. Midang nupi a thlem lo; 16zohman a hmuhsuam lo, zo ih thil hman a ru lo. Tangka cawitu ih thukamnak thil ṭhatein a khirh sal. Rilrawngmi a cawm ih hnipuan nei lo pawl hnipuan hruk ding a pek. 17Thilsual tuah cu a duh hrimhrim lo ih a pungṭhang duh ah tangka mi a cawih lo. Hi pa in ka daan a thlun ih ka thupekmi a tuah. Hi pa hi a pa ih sual ruangah a thi lo ding; a nung tengteng ding a si. 18Sikhalsehla a pa cun mi a bum, ruk a ru ih mikip parah thil ṭha lo a tuah. Curuangah a thi, amah rori ih tuahmi sualnak ruangah a thi a si.

19“Asinain thu nan sut ih, ‘Ziangtin so a pa ih sual ruangah a fapa tuar ve loin a um ding?’ nan ti a si ahcun thulehnak cu: a fapa cun a dingmi le a ṭhami a tuah ruangah a si, tihi a si. Ka daan pawl a thlun ih ralringzet in a tuah a si; curuangah anih cu a nung tengteng ding. 20Midang si loin a sualtu lawng a thi ding. A pa ih sualnak ruangah a fapa a tuar lo ding; cuvek ṭhiamṭhiam in a fapa ih sualnak ruangah a pa in a tuar ve lo ding. Mi ṭha cu a ṭhatnak ruangah laksawng a ngah ding ih miṭha lo cu a ṭhatlonak ruangah a tuar ding.

21“Mi ṭha lo pakhat in thilsual tuah a bansan ih ka daan pawl thlun in thil ding le thil ṭha a tuah ahcun a thi lo ding, a nung tengteng ding. 22A sualnak hmuahhmuah cu ngaihthiam a si ding ih a nung ding, ziangahtile a dingmi a tuah a si. 23Mi ṭha lo pakhat a thih tikah lung awi dingah maw si in ruat? Si hrimhrim hlah; sir aw in nung sehla ka duh sawn a si,” tiah Cungnungbik Bawipa in a ti.

24“Miding pakhat in thil ṭha tuah a bansan ih thilsual le fihnungza thil a tuah saal a si ahcun a nung vivo ding maw? Nung hlah! Thil ṭha a rak tuah ciami hman hngilh ṭheh a si ding. Rintlak lo a sinak le a sualnak ruangah a thi ding a si.

25“Sikhalsehla nannih in, ‘Cungnungbik Bawipa ih a tuahmi hi a dik lo a si,’ nan ti. I ngaihnik uh, Israel mi pawl! Ka thil tuah daan hi a dik lo nan ti maw si? Nanmah ih thiltuah mi sawn a dik lo a si. 26Midingpa pakhat cu a ṭhami tuah a bansan ih thil ṭhalo a tuah sal ih a thi; thilsual a tuah ruangah a thi a si. 27Mi ṭha lopa pakhat in thil ṭha lo tuah a bansan ih a dingmi le a ṭhami a tuah; cutiin a nunnak a hum a si. 28A thiltuahmi ziangvek a si tikha a thei ih sual nawn loin a um ruangah a thi hrimhrim lo ding, a nung vivo sawn ding. 29Cule nannih Israel mi pawl in, ‘Bawipa ih thiltuahmi hi a dik lo a si,’ nan ti. Ka thil tuah daan hi a dik lo nan ti ngai maw? Nanmah ih thiltuah dan sokhaw a dik lo sawn cu!

30Cungnungbik Bawipa keimah in ka lo sim: Israel mi pawl, nan thiltuahmi zoh in pumpak ciar in nan thu ka ṭhen ding. Thil ṭha lo nan tuahmi ihsin kir sal uh; nan sualnak in lo siatsuah hlah seh. 31Thil ṭha lo nan tuah ringringmi pawl hi tlansan thlang uhla thinlung thar le ruahnak thar nei thlang uh. Israel mi pawl, ziangah so thih cu nan duh? 32Zohman nan thih ding ka duh lo. Nan sualnak sir uhla nung uh,” tiah Cungnungbik Bawipa in a ti.

Currently Selected:

EZEKIEL 18: FCL

Highlight

Copy

Compare