EZEKIEL 17
17
Muvanlai Le Sabit Hri Tahṭhimnak
1 Bawipa in ka hnenah, 2“Milaipa, Cungnungbik Bawipa keimah in Israel mi pawl hnenih ka simmi hi an theihnak dingah, 3tahṭhimnak hi sim aw: Muvanlai tumpi pakhat a um ih a thla a tumzet; a thla kaupi in a pharh ih a mawi ngaingai. Lebanon Tlang parah a va zuang ih sidar thing zik a va khiak ih, 4cuih thingzik cu sumtuahnak ramah a zuanpi hnuah sumtuahtu pawl ih khawsungah a va ret. 5Cuih hnuah thingkung note pakhat Israel ram in a lak ih ram ṭhatnak#Hi zawn ah hin Hebru Baibal sungah ṭong fang dang pakhat a um ih a tican fiangtein theih thei a si lo. hmunah a phun; cutawkah cun thingkung ṭhangtertu dingah tidai a um ringring. 6Cuih thingkung cu a ṭhang ih niam nawn in kauzet ih a zaam liailiai mi sabit hri ah a cang. A hnge pawl cu tlunlam muvanlai umnak lamah an kai vivo ih a hram pawl cu thuukpi ah an pil vivo. A hri cu a hnge le a hnah pawl in an khuh a si.
7“Cule a dang muvanlai tumzet pakhat a um ve ih a thla cu a hlai demdem ih a thlahmul cu an sah ngaingai. Sabit hri cun atu ih a dinnak hmunih tidai hnakin tidai tam deuh ka ngah ding ti beisei in cuih muvanlai lamah cun a hram pawl a fehter ih a hnah pawl tla in an pan vivo. 8Sikhalsehla cuih Sabit hri cu ram ṭhazet le tidai tamzet umnak hmunah ciin a si zo ih hnah nei tahrat in tamzet a rahmi sabit hri ṭhazet si ding lawng a bak.
9“Curuangah Cungnungbik Bawipa keimah in hiti in thu ka sut: Hi sabit hri hi nung in a ṭhang ding maw? A hmaisa muvanlai in a hram ihsin a phawicat lo ding maw? A rah pawl tla thlong ṭheh in a hnge pawl a khiak ṭheh lo ding maw? Cutiin a vuai ṭheh lo ding maw? Hi sabit hri phawi dingah cun thacah zet a ṭul lo, miphun cak zet si tla a ṭul lo. 10Asi, phun zo mi cu a si; sikhalsehla a nung ding maw, a ṭhang ngaingai ding maw? Nisuahnak lam thli in a soih tikah a vuai lo ding maw? Atu ih a ṭhannak hmunah khin a vuai ṭheh ko lo ding maw?” a ti.
Tahṭhimnak Cu A Fiangter
11 Bawipa in ka hnenah, 12“Hi tahṭhimnak ih tican an theih le theih lo, hi raltho pawl hi sut hnik. Sim hai aw: Jerusalem ah Babilon siangpahrang a ra ih Judah siangpahrang le a kuthnuai bawi pawl kha a hruai. 13Siangpahrang sungkhat lakih pakhat a ko ih amah thawn lungkimnak cakhen a tuah ih ka lo rian ding ti in siatserh thukamnak a tuahter. Cuih cakhen vekih an thlun ringringnak dingah le, 14hi miphun hi raltho nawn hlah hai seh tinak ah mi upa pawl cu ralkaihmi ah a hruai. 15Sikhalsehla Judah siangpahrang cu ral a tho ih rang tampi le ralkap tampi ngah duh ah Izipt ramah palai a thlah. A hlawhtling ngai ding maw? A tisuak thei ngai ding maw? A thukamnak balsiat tahratin hremnak tuar loin a luat thei lo ding.
16“Pathian nung ka sinak hmin saal in Cungnungbik Bawipa keimah in ka sim: Siangpahrang tokham parih a retu Babilon siangpahrang thawn an tuahmi siatcam thukamnak a pahbal ruangah hi siangpahrang cu Babilon ah a thi tengteng ding. 17Babilon ralkap pawl an ra ih leilung an burh ih mi tampi thah duh ah khawpi phardawl leng ihsin phar an dawlsang ciamco tikah cun a cak zetmi Izipt siangpahrang ralkap pawl hman in an bawm thei lo ding. 18A siatcam thukammi a pah ih lungkimnak cakhen a tuah ciami a bal zo. Hi bangtuk a tuah hnu ahcun a luat hrimhrim lo ding,” a ti.
19Cungnungbik Bawipa in, “Pathian nung ka sinak hmin saal in ka sim: Ka hmin saal in thlun dingah siatcam ih a kam ciami cakhen a bal ruangah ka hrem ding. 20Sadawi pawl ih hmanmi sur ka kam ding ih cuih sungah ka awk ding. Ka parah rintlak lo ih a nun ruangah Babilon ah ka hruai ding ih cutawkah ka hrem ding. 21A ralkap ṭha bik pawl raldonak ah an thi ding ih a taangsun pawl cu khuazakip ah ṭhekdarh an si ding. Cuih hnuah keimah Bawipa in ka sim ti kha na thei ding,” a ti.
Pathian Ih Ruahsannak Thukam
22Cungnungbik Bawipa in hiti in a ti:
“Sidar thing saangpi ziik cu ka la
ding ih thing note cu
ka khiak ding.
Tlang saangpi parah ka phun ding.
23Israel tlangsaangbik parah cun
ka phun ding.
A hnge pawl an cerh ding ih cii
an nei ding;
Sidar thing ṭhazet ah a cang ding.
Vate phunkip a parah an fu ding ih,
A hneemdai ah colhnak an ngah ding.
24Ramsung thingkung hmuahhmuah in
Bawipa ka si kha in thei ding.
Thingkung sang zet pawl cu ka hau ih
A niam pawl sangseh tiah ka
ṭhanter.
Thinghring pawl cu ka vuaiter ih
Thingro pawl thinghring ah
ka tuah.
Keimah Bawipa in ka sim zo. Tuah ding tiih ka sim ciami cu ka tuahsuak tengteng ding.”
Currently Selected:
EZEKIEL 17: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
