Ioan 19
19
Isusul Condamnat Cu Crutsisiri
1Atumtsea Pilatul ursi s-ljea Isusul shi s-lu batã cu cãmciclu. 2Suldatslji featsirã unã curunã di schinji, lji-u bãgarã n-cap sh-lu nviscurã cu un mantil di purpurã. 3Elji yinea la elu sh-lji dzãtsea: “Salut, amirãlu a Iudeilor!” Sh-lu agudea cu pãlnji pri fatsã. 4Deapoea Pilatul ishi nãpoi nafoarã sh-lã dzãsi a lor: “Ia, ma vã-lu aduc nafoarã tra s-videts cã nu aflu la nãsu nitsi unã cãbati.” 5Atumtsea Isusul ishi afoarã cu curuna di schinji n-cap sh-mantilul di purpurã. Pilatul lã-dzãsi a lor, “Ia, omlu!” 6Cãndu lu vidzurã arhipreftsãlji sh-vigljitorlji a lor, aurlarã dzãcãnda: “Crutsisits-lu! Crutsisits-lu!” Pilatul lã dzãsi a lor: “Loats-lu voi sh-crutsisits-lu! Mini nu aflu la nãsu vãrã cãbati.” 7Mãrlji a Iudeilor apãndisirã: “Noi avem unã lege sh-dupã legea a noastrã prindi s-moarã, cã s-acljimã Hiljilu a Dumnidzãlui.” 8Cãndu Pilatul avdzã aesti zboari, s-aspãrã sh-ma multu, 9intrã iarã tu pretorium sh-lji dzãsi al Isus, “Di iu eshti tini?” Ma Isusul nu lj-apãndisi. 10Atumtsea Pilatul lji dzãsi: “A njia nu nji apãndiseshti? Nu shtii tini cã mini am puteari s-ti sãlãghescu shi s-ti crutsisescu?” 11Isusul lj-apãndisi: “Tini nu va s-aveai vãrã puteari pristi mini, ma s-nu ts-eara datã di nsus. Trã atsea atsel tsi mi prideadi la tini ari ma mari amãrtii.” 12Di atumtsea Pilatul cãfta s-lu sãlãgheascã, ma mãrlji a Iudeilor aurla dzãcãnda: “Ma sãlãghish aestu, nu eshti ma oaspili a Cesarului. Caitsido tsi s-fatsi amirã si ncuntreadzã a Cesarului.” 13Pilatul cãndu avdzã aesti zboari, lu adusi Isusul nafoarã shi s-apunã pri thronul a giudicatãljei, tu loclu cai s-acljima “Cãldãrimi” (sh-tu uvreieshti “Gabbatha”). 14Eara dzua a etimãsiriljei di Pashtili, anvãrliga di njeadzã-dzuã, sh-Pilatul lã dzãsi a Iudeilor: “Ia, amirãlu a vostru!” 15Ma elji aurlarã: “Ljea-lu, ljea-lu! Crutsisea-lu!” Pilatul lã dzãsi a-lor: “S-lu crutsisescu amirãlu a vostru?” Arhipreftsãlji apãndisirã: “Noi nu avem altu amirã dicãt mash Cesarlu!” 16Atumtsea Pilatul lu deadi tra s-lu crutsisea. Ashãtsi loarã Isusul sh-lu dusirã nclo.
Crutsisirea al Isus
17Sh-elu, tsãnãnda crutsea a lui, ishi tu loclu tsi s-acljima “Cãpãtsãnã” (tsi tu uvreieshti s-acljeamã “Golgota”). 18Aclo lu crutsisirã deadun cu doi altsã, un di unã parti sh-alantu di alantã parti sh-Isusul tu mesi. 19Pilatul avea scriatã un titlu shi l-bãgã pri crutsi. Aclo eara scriatã: “ISUS NAZAREANLU, AMIRÃLU A IUDEILOR!” 20Ashãtsi aestu titlu lu cãntarã multsã di Iudei, cã loclu iu s-crutsisi Isusul eara aproapi di cãsãbã sh-titlu eara scriatã pri uvreieshti, latineshti sh-gãrtseshti. 21Atumtsea, arhipreftsãlji a Iudeilor lji dzãsirã al Pilat, “Nu scrii, ‘Amirãlu a Iudeilor,’ ma, ‘Elu dzãsi, Mini escu amirãlu a Iudeilor.’” 22Pilatul apãndisi, “Atsea tsi am scriat, u am scriat.” 23Shi suldatslji, dupã tsi lu crutsisirã, lji loarã stranjili a lui, sh-li mpãrtsarã pi patru pãrtsã, unã parti trã cathiun suldat. Elji tora loarã tunica tsi eara tutã tsãsutã di nsus pãnã nghios. 24Trã atsea dzãsirã cu un-alantu: “S-nu u-arupem, ma s-arcãm soartea s-videm a cui va lji hibã.” Ashãtsi va si mplinea Scritura tsi dzãtsi: “Li mpãrtsarã ntrã elji stranjili a meali sh-arcarã soarti di tunica a mea.”#Ps 22:18. Suldatslji ashã li featsirã aesti lucri. 25Ma ningã crutsea al Isus stãtea muma a lui sh-sora a mumãljei a lui, Maria al Cleopa, sh-Maria Magdalena. 26Isusul cãndu vidzu muma a lui shi ningã nãsã uceniclu tsi vrea, lji dzãsi a mumãljei, “Muljeari, ia, hiljilu a tãu!” 27Deapoea lji dzãsi a uceniclui: “Ia, muma a ta!” Sh-di atsea oarã uceniclu u lo Maria la casa a lui.
Murirea al Isus
28Dupã aestã, Isusul, shtinda cã tora tuti eara adrati tra si mplineascã Scritura, dzãsi, “Am seati.” 29Aclo eara un vas mplin cu puscã. Suldatslji muljarã un sfungu cu puscã sh-lu bãgarã pri unã degã di hisopi shi lji-lu apruchearã la gurã. 30Ma cãndu Isusul lo pusca, dzãsi: “S-featsi!” Sh-aplicãnda caplu, deadi suflitlu. 31Metsi eara dzua a Etimãsiriljei, tsi trupurili s-nu armãnea pri crutsi Sãmbãta, cã atsea Sãmbãtã eara unã dzuã mari shi sãmtã, Iudeilji lji cãftarã al Pilat tsi atsilor s-lã frãndzea cicioarili shi s-lji dipuna dit crutsi. 32Atumtsea vinirã suldatslji shi lji li frãmsirã cicioarili a protlui shi alãntui tsi eara crutsisit cu nãsu. 33Cãndu vinirã la Isusul, sh-cum vidzurã cã elu tora avea murit, nu lji li frãmsirã cicioarili, 34ma un di suldatslji lji-u tsãpã coasta cu un gilit shi trãoarã lj-ishi sãndzi sh-apã. 35Sh-atsel tsi ari vidzut, ari mãrtirsit trã aestã sh-mãrtiria a lui easti alihioasã. Elu u shtii cã dzãtsi alihea, tsi voi tutashã s-pistipsist. 36Aesti lucri undzirã tra si mplineascã Scritura, “Nu va lji si frãngã nitsiun os.”#Ex 12:46; Num 9:12; Ps 34:20. 37Sh-unã altã Scriturã dzãtsi, “Va s-veadã atsel tsi au tsãpatã.”#Zac 12:10.
Ngruparea al Isus
38Dupã aesti, Iosiful di Arimatea, tsi eara uceniclu al Isus, ma pri ascumtu di frica a Iudeilor, lji cãftã al Pilat s-loa truplu al Isus sh-Pilatul lji deadi volje. Atumtsea elu vini sh-lo truplu al Isus. 39Ma vini sh-Nicodemul, tsi ma nãinti eara la Isusul noaptea, sh-adusi unã misticãturã di smirnã sh-aloe, aproapi treidzãtsi di kilogram. 40Elji loarã truplu al Isus, sh-lu anvãrtirã cu pãndzã di ljin njurizmatã, dupã cum eara adetea a Iudeilor ti ngrupari. 41Tu loclu iu elu s-crutsisi eara unã gãrdinã, sh-tu gãrdinã un murmintu nou, tu cai ninga nu eara bãgatã vãrã om. 42Metsi eara dzua a Etimãsiriljei a Iudeilor, Isusul lu bãgarã aclo, cã murmintul eara aproapi.
Currently Selected:
Ioan 19: BLRR
Highlight
Copy
Compare
Share
Want to have your highlights saved across all your devices? Sign up or sign in
