Ioan 20
20
Murmintul Gol
1Tu prota dzuã a stãmãnãljei, dimineatsa cãndu ninga nu avea apirit, Maria Magdalena vini la murmintu sh-vidzu cheatra mutatã di la murmintu. 2Atumtsea ea s-dusi trãoarã la Simon Petrul sh-la alantu ucenic, tsi Isusul lu vrea sh-lã dzãsi a lor, “Lu au loat Domnul dit murmintu sh-nu shtim iu l-bãgarã!” 3Atumtsea Petrul sh-alantu ucenic ishirã afoarã shi s-dusirã la murmintu. 4Alãga doilji deadun, ma-alantu ucenic tricu ma nãinti dicãt Petrul sh-agiumsi protlu la murmintu. 5Elu s-aplicã sh-vidzu pãndzãli di ljin mpadi, ma nu intrã aclo. 6Agiumsi sh-Simon Petrul, tsi l-urma, intrã tu murmintu sh-vidzu pãndzãli di ljin teasi mpadi, 7shi mãndila, tsi eara pri caplu a Isusului, tsi nu eara deadun cu pãndzãli di ljin ma eara anvãrtitã tu un singur loc. 8Atumtsea intrã sh-alantu ucenic tsi avea vinit protlu la murmintu, vidzu sh-pistipsi. 9Elji nu avea aduchitã ninga Scritura, cã elu prindea s-nyeadzã dit mortsã. 10Deapoea ucenitsilji s-turnarã nãpoi tu casa a lor.
Isus s-Aspusi la Maria Magdalena
11Maria stãtea nafoarã ningã murmintu sh-plãndzea. Plãngãnda s-aplicã cãtrã murmintu, 12sh-vidzu doi anghilji, nviscuts cu alghi, shãdzãnda unlu la cap sh-alantu la cicioari, iu eara ma nãinti truplu al Isus. 13Elji lji dzãsirã: “Muljeari, cãtse plãndzã?” Ea lã dzãsi a-lor, “Cã au loatã Domnul a meu, sh-nu shtiu iu lu au bãgatã.” 14Cum dzãsi aesti, ea s-turnã nãpoi sh-vidzu Isusul, tsi stãtea mprostu, ma nu shtia cã eara Isusul. 15Isusul lji dzãsi: “Muljeari, cãtse plãndzã? Cai caftsã?” Ea minduinda cã eara gãrdinarlu, dzãsi: “Doamne, macã lu ai mutat tini, dzã-nji iu lu bãgashi, sh-mini va lu ljeau.” 16Isusul lji dzãsi, “Marie!” Ea s-turnã sh-lji dzãsi tu uvreieshti, “Rabboni!” (tsi va s-dzãcã nvitsãtore). 17Isusul lji dzãsi: “Nu mi pusputea, cã ninga nu mi am alinatã la Tatãl a meu, ma duti la fratslji a melji sh-dzã-lã cã mini ma mi alin la Tatãl a meu, sh-la Tatãl a vostru, la Dumnidzãlu a meu sh-la Dumnidzãlu a vostru.” 18Atumtsea Maria Magdalena s-dusi sh-hãbãrsi ucenitsilji cã avea vidzut Domnul, sh-lã dzãsi a lor cã elu dzãsi aesti zboari. 19Deapoea tu seara a dzuãljei atsiljei, tsi eara prota a stãmãnãljei, sh-cara ushili a loclui iu eara adunats ucenitsilji, eara ncljisi cã avea fricã di mãrlji a Iudeilor. Isusul vini, stãtu tu mesea a lor sh-lã-dzãsi, “Pacea cu voi!” 20Sh-cum lã dzãsi aesti, lã spusi a lor mãnjili sh-coasta. Ucenitsilji cãndu vidzurã Domnul, s-hãrsirã multu. 21Deapoea Isusul lã dzãsi a-lor nãpoi, “Pacea cu voi! Ashã cum mi ari pitricut mini Tatãl, ashã mini ma vã pitrec voi.” 22Dupã tsi dzãsi aesti, suflã pristi nãshi sh-lã dzãsi, “Loats Duhlu Sãmtu! 23Atsilor tsi va lã li ljirtats amãrtiili, va lã hibã ljirtati, a cui va lã li tsãnets amãrtiili, atsilui va lã hibã tsinuti.”
Isusul s-Aspusi al Toma
24Toma, (acljimat Dzeamin), un di doisprãdzatslji, nu eara cu elji cãndu vini Isusul. 25Alantsã ucenitsi lji dzãsirã: “Avem vidzut Domnul!” Iarã elu lã dzãsi a lor: “Ma nu vidzui tu mãnjili a lui seamnili a penjurilor, sh-ma nu bãgai dzeaditlu a meu tu seamnili a penjurilor, sh-ma nu bãgai mãna a mea tu coastea a lui, mini nu va pistipsescu!” 26Optu dzãli ma napoi, ucenitsilji a lui eara nãpoi nãuntru sh-Toma eara cu elji. Isusul vini cu tutã cã ushili eara ncljisi, stãtu tu mesi sh-dzãsi: “Pacea cu voi!” 27Atumtsea lji-dzãsi al Toma: “Bagã dzeaditlu a tãu aoa, sh-vedz mãnjili a meali. Tindi mãna sh-bagu tu coasta a mea shi s-nu eshti nipistimen, ma pistimen!” 28Atumtsea Toma lji dzãsi: “Domnul sh-Dumnidzãlu a meu!” 29Isusul lji dzãsi: “Pistipsish, cã mi vidzush, Toma. Cahara di atselji tsi nu au vidzut sh-pistipsirã!”
Nãetea al Evanghelu dupã Ioan
30Isusul ari faptã sh-multi alti thavmati nãintea a ucenitsilor a lui, tsi nu suntu scriati tu cartea aestã. 31Aesti suntu scriati tsi voi s-pistipsits cã Isusul easti Hristos, Hiljilu al Dumnizãlu, tsi pistipsinda s-avets banã tu numa a lui.
Currently Selected:
Ioan 20: BLRR
Highlight
Copy
Compare
Share
Want to have your highlights saved across all your devices? Sign up or sign in
