Ioan 18
18
Isusul Ligat
1Dupã tsi li dzãsi aesti, Isusul s-dusi cu ucenitsilji a lui napãrti a traplui Chedron, iu eara un gãrdinã tu cai intrã elu cu ucenitsilji a lui. 2Iuda cai ma lu vindea, u shtia loclu, cã di multi ori Isusul s-aduna aclo cu ucenitsilji a lui. 3Atumtsea, Iuda lo unã cohortã cu suldatsi sh-vigljitori di la arhipreftsãlji sh-di la Fariseilji, vini aclo cu fãnãri, lãmbãdzi sh-cu armi. 4Atumtsea, Isusul shtinda itsido tsi va lji undzea, ishi sh-lã dzãsi a lor, “Cai cãftats?” 5Elji lji-apãndisirã, “Isus Nazareas.” Isusul lã dzãsi a lor: “Mini escu!” (Ma sh-Iuda tsi ma lu vindea eara cu elji.) 6Cãndu lã dzãsi a lor: “Mini escu,” elji s-nãpuirã sh-cãdzurã mpadi. 7Atumtsea Isusul lã ntribã nãpoi: “Cai cãftats?” Elji dzãsirã: “Isus Nazareas.” 8Isusul lj-apãndisi: “Vã am dzãsã cã Mini escu. Trã atsea macã mi cãftats mini, alãsats-lji aeshti s-ducã.” 9Atsea s-featsi tra si mplineacã zborlu tsi avea dzãsã: “Nu chirui nitsiunu di atselji tsi nji-ai datã.” 10Atumtsea Simon Petrul, tsi avea unã spatã, u scoasi shi agudi huzmichearlu a arhipreftlui sh-lji-u tãlje ureaclja atsea ndreapta. (Huzmichearlu s-acljima Malcu). 11Atumtsea Isusul lji dzãsi al Petru: “Bagã spata a ta tu seacã! Nu va s-u beau mini cupa tsi nj-ari datã Tatãl?” 12Atumtsea cohorta a suldatsilor, cãpidanlu, sh-vigljitorlji a Iudeilor lu acãtsarã Isusul sh-lu ligarã. 13Deapoea lu dusirã ma nãinti la Anna, tsi eara socrul al Caiafa, arhipreftul a anlui atsilui. 14Ma Caiafa eara atsel, tsi lji avea urnipsitã Iudeilji cã eara ghini tsi un om s-murea trã populu.
Petrul Aleapid Isusul
15Simon Petrul sh-un altu ucenic urma Isusul. Aestu ucenic eara cunuscutlu a arhipreftlui sh-intrã cu Isusul tu uborlu a arhipreftlui. 16Petrul stãtu nafoarã la poartã. Atumtsea, uceniclu atsel alantu, tsi eara cunuscutlu a arhipreftlui, ishi sh-grãi cu purtãreasa sh-bãgã nãuntru Petrul. 17Sh-huzmichearea purtãreasã lji-dzãsi a Petrului: “Nacã eshti sh-tini di ucenitsilji a omlui aishtui?” Elu dzãsi: “Nu escu.” 18Huzmichearlji sh-vigljitorlji avea apreasã un foc cu cãrbunji shi shãdea mproshtsã shi s-ncãldza, cã eara arcoari. Tutashã sh-Petrul shidea mprostu cu nãshi shi s-ncãldza.
Arhipreftul Ntreabi Isusul
19Arhipreftul ntribã Isusul ti ucenitsilji a lui sh-ti nvitsãtura a lui. 20Isusul lji-apãndisi a lui: “Mini lj-am zburãt discljis a lumiljei. Mini totãna am nvitsat tu sinagogã sh-tu templu, iu s-aduna Iudeilji sh-nu zburai tsiva pri ascumtu. 21Trã tse mi ntreghi mini? Ntreabã atselji tsi au avdzãtã tsi lã zburai a lor. Ia, elji shtiu cã tsi am dzãsã mini.” 22Dupã tsi li dzãsi aesti zboari, un di vigljitorlji tsi lji stãtea aproapi lu agudi Isusul cu palmã pri fatsã, dzãcãnda: “Ashã lj-apãndiseshti a arhipreftlui?” 23Isusul lji apãndisi: “Ma s-am zburãtã arãu, mãrtirsea, iu easti arãulu, ma, metsi am zburãtã ghini, cãtse mi agudeshti?” 24Atumtsea Anna lu pitricu ligat la Caiafa, arhipreftul. 25Simon Petru stãtea aclo shi s-ncãldza. Elji lji dzãsirã, “Nacã eshti sh-tini di ucenitsilji a lui?” Elu alipidãnda dzãsi, “Nu escu.” 26Un di huzmichearlji a arhipreftlui, tsi eara di soia a atsilui, a cui Petrul lji avea tãljiatã ureaclja, dzãsi: “Nu ti vidzui tu gãrdinã cu nãsu?” 27Shi Petrul lu alipidã nãpoi shi trãoarã cãntã cucotlu.
Isusul Nãintea al Pilat
28Deapoea, dupã Caiafa lu dusirã Isusul tu pretorium sh-eara dimineatsa curundu. Elji nu intrarã tu pretorium tra s-nu s-pãnĝãneascã, ma s-poatã s-mãca Pashtili. 29Atumtsea Pilatul ishi afoarã ningã elji shi dzãsi: “Tsi acuzã adutsets contra a omlui aishtui?” 30Elji apãndisirã sh-lji dzãsirã: “Ma s-nu eara arãu-fãcãtor aestu nu va lu prideam la tini.” 31Atumtsea Pilatul lã dzãsi a lor: “Loats-lu voi sh-giudicats-lu dupã legea a voastrã.” Ma Iudeilji lji dzãsirã: “A noauã nu nã easti datã ndreptul s-vãtãmãm vãrã.” 32Atsea undzi tra si mplineascã zborlu tsi avea dzãsã Isusul, cã cu tsi moarti va s-murea. 33Atumtsea Pilatul intrã nãpoi tu pretorium, acljimã Isusul sh-lu ntribã, “Eshti tini amirãlu a Iudeilor?” 34Isusul apãndisi, “Aestã u dzãtsi tini di la tini, icã ts-au dzãsã altsã trã mini?” 35Pilatul lji apãndisi, “Escu mini vahi Iude? Fara a ta shi arhipreftsãlji ti prideadirã la mini. Tsi ai faptã?” 36Isusul apãndisi, “Amirãriljea a mea nu easti dit aestã lumi. Ma s-eara amirãriljea a mea dit aestã lumi, huzmichearlji a melji va s-alumta tsi mini s-nu earam pridat la mãrlji a Iudeilor. Ma amirãriljea a mea nu easti di aoa.” 37Atumtsea Pilatul lu ntribã, “Tini eshti amirã?” Isusul apãndisi, “Tini dzãtsi cã mini escu amirã. Trã atsea mini escu amintat sh-trã aestã am vinit tu lumi, tra s-mãrtirsescu trã alihea. Caitsido tsi easti dit alihea, ascultã boatsea a mea.” 38Pilatul lji dzãsi, “Tsi easti alihea?” Sh-cum dzãsi aestã, ishi nãpoi ningã Iudeilji sh-lã dzãsi a-lor, “Mini nu ma aflã la nãsu vãrã cãbati! 39Ma la voi easti adetea tsi mini s-vã sãlãghescu un hãpsãnit ti Pashti. Vrets s-vã sãlãghescu amirãlu a Iudeilor?” 40Atumtsea tuts aurlarã dzãcãnda: “Nu aestu, ma Baraba!” (Baraba eara un rebil).
Currently Selected:
Ioan 18: BLRR
Highlight
Copy
Compare
Share
Want to have your highlights saved across all your devices? Sign up or sign in
