Ioan 16
16
1“Vã li-am dzãsã aesti lucri, tra s-nu vã dipãrtats di pisti. 2Va s-vã scoatã dit sinagodzãli sh-ma yini oara tsi, caitsido tsi va s-vã vatãmã, va s-mindueascã cã elu fatsi lucrul a Dumnidzãlui. 3Sh-va vã li fac aesti lucri, cã nu lu au cunuscutã nitsi Tatãl, nitsi mini. 4Ma mini vã li am dzãsã aesti tsi, cãndu s-yinã oara a lor, s-vã adutsets aminti cã mini vã li-am dzãsã. Nu vã li dzãsh di tu apãrnjitã, cã earam cu voi. 5Ma tora mini ma mi duc la atsel tsi mi pitricu. Vãrã di voi nu ma mi-ntreabã: ‘Iu ti duts?’ 6Sh-trã atsea cã vã aspush aesti, nvirinarea u-ari umplut inima a voastrã. 7Cu-tutã-atsea, mini vã spunã alihea: easti ma ghini trã voi tsi mini s-mi duc, cã, ma s-nu mi duc, nu va s-yinã la voi Diznjirdãtorlu. Macã mini mi duc, mini va lu pitrec. 8Cãndu s-aibã yinitã, elu va u-cãndãrseascã lumea di amãrtii, di ndriptati sh-di giudicatã. 9Di amãrtii cã nu pistipsescu tu mini, 10di ndriptati, cã mini ma mi duc la Tatãl, sh-nu va s-mi videts ma, 11sh-di giudicatã, cã domnitorlu a lumiljei aishtei tora easti giudicat. 12Am sh-ma multi trã spuneari a voauã, ma tora voi nu putets s-li tsãnets. 13Ma, cãndu s-yinã elu, Duhlu a alihiljei, va s-vã ndripteadzã la tutã alihea. Elu nu va s-greascã di-la nãsu, ma va s-greascã atsea tsi va s-avdã sh-va s-vã aspunã atseli tsi va s-yinã. 14Elu va mi multumãreascã, cã va ljea di atsea a mea sh-va s-vã-u dimãndã. 15Tuti cãti ari Tatãl suntu a meali. Trã-atsea vã dzãsh cã Duhlu va ljea di a mea sh-va s-vã-u dimãndã a voauã.”
Ucenitsilji au Ntribãri trã Fudzirea al Isus
16“Ninga niheamã sh-nu va mi videts ma. Dupã putsãn chiro va mi videts nãpoi.” 17Atumtsea niscãntsã di ucenitsilji a lui dzãtsea cu un-alantu: “Tsi easti aestã tsi ma nã dzãtsi: ‘Ninga putsãn sh-nu va mi videts, sh-iarã dupã putsãn chiro mini va s-mi videts,’ shi: ‘Cã mini ma mi duc la Tatãl?’” 18Elji ntriba dipriunã: “Tsi easti aestã ‘putsãn’, di cai zburashti? Noi nu shtim tsi zburashti.” 19Isusul aduchi cã vrurã s-ntriba shi lã dzãsi a-lor: “Voi ma ntribats un-alantu cãtse dzãsh: ‘Ninga niheamã sh-nu va mi videts ma, sh-ninga niheamã va s-mi videts nãpoi’? 20Dealihea, mini ma vã dzãc cã va s-plãndzets sh-va s-vãitats, ma lumea va s-hãrseascã. Voi va s-vã nvirinats ma amãreatsa a voastrã va s-toarnã tu harauã. 21Muljearea, cãndu amintã, ari dureari, cã yini oara a ljei. Ma dupã tsi amintã cilimeanlu, nu ma adutsi aminti munduirea, di haraua tsi s-amintã un om tu lumi. 22Ashãtsi-shi voi tora avets amãreatsã, ma mini va s-vã ved nãpoi sh-inima a voastrã va s-hãrseascã, sh-vãrã nu va u ljea haraua a voastrã di la voi. 23Sh-tu atsea dzuã voi nu va mi ntribats ma di tsiva. Dealihea ma vã dzãc, cã itsido tsi s-lji cãftats a Tatãlui tu numa a mea, elu va vã-u da. 24Pãnã tora voi nu avets cãftatã tsiva tu numa a mea. Cãftats sh-va s-loats, tsi haraua a voastrã s-hibã ntreagã. 25Vã li-am dzãsã aesti lucri tu paraboli, ma ma yini oara cãndu nu va s-vã grescu ma cu paraboli, ma va s-vã grescu discljisã ti Tatãl. 26Tu atsea dzuã voi va s-cãftats tu numa a mea, sh-nu ma dzãc cã mini va s-lji fac rigeai a Tatãlui trã voi. 27Tatãl idyiul vã va, cã voi mi vrut mini sh-avets pistipsit cã mini am ishit di la Dumnidzãlu. 28Mini ishi di la Tatãl sh-vinj tu lumi, tora ma u alasã lumea sh-ma mi ducã la Tatãl.” 29Ucenitsilji a lui lji dzãsirã: “Ia, tini tora ma zburashti discljis sh-nu ma foloseshti nitsi-unã parabolã. 30Tora noi aduchim cã tini li shtii tuti sh-nu ai ananghi tsi vãrã s-ti ntreabã. Trã atsea noi pistipsim, cã ai ishit di la Dumnidzãlu.” 31Isusul apãndisi a-lor: “Tora pistipsits voi? 32Ia, ma yini ora sh-tora ari vinitã, tsi voi va vã arãspãndits cathiun tu casa a lui. Voi va mi alãsats singur, ma mini nu escu singur, cã Tatãl easti cu mini. 33Vã li dzãsh aeasti tra s-u avets pacea tu mini. Tu lumi va s-avets munduiri, ma loats curaiu, cã mini u nichisii lumea!”
Currently Selected:
Ioan 16: BLRR
Highlight
Copy
Compare
Share
Want to have your highlights saved across all your devices? Sign up or sign in
