Ioan 17
17
Isusul s-Roagã tra s-Multumãreascã
1Cãndu Isusul dzãsi aesti, sculã ocljilji a lui cãtrã tser shi s-rugã: “Pãrinte, oara ari vinit. Multumãrea Hiljilu a tãu, tsi sh-Hiljilu a tãu s-ti multumãreascã. 2Tini ai datã puteari pristi itsido om, tsi elu s-da banã eternã la tuts atselji tsi tini lj-ai datã. 3Sh-aestã easti bana eternã, s-ti cunoascã tini singurlu Dumnidzã alihios, sh-Isus Hristos, tsi tini ai pitricut. 4Mini ti am multumãritã pri loc, fãcãnda lucrul tsi nji ai datã s-lu fac. 5Sh-tora, mi multumãrea Pãrinte ningã tini, cu mãrirea tsi mini u avui ningã tini nãinti tsi s-adra lumea.
Isusul s-Roagã trã Ucenitsilji a Lui
6Mini lji-u am aspusã numa a ta a oaminjlor tsi tini nji lji ai datã dit lumea. Eara a tãlji sh-tini nji lji ai datã, sh-elji lu au vigljeatã zborlu a tãu. 7Tora elji au cunuscut cã itsido tsi tini nji ai datã yini di la tini, 8cã lji-li am datã a lor zboarili tsi tini nji-li ai datã a njia, sh-elji li au aprucheatã sh-au cunuscutã cã dealihea mini ishi di la tini, sh-pistipsirã cã tini mi ai pitricut. 9Mini mi rog trã elji. Nu mi rog trã lumea, ma trã atselji tsi nji ai datã, cã suntu a tãlji. 10Sh-tuti atseali a meali suntu a tali, sh-atseali a tali suntu a meali, sh-mini escu multumãritã prit nãshi. 11Sh-mini nu escu ma tu lumi, iarã elji suntu tu lumi, sh-mini ma yin la tini. Pãrinte sãmtu, veagljili atselji cu putearea a numãljei a ta, atselji tsi nji ai datã, tra s-hibã un, ashã cum him sh-noi. 12Cãndu earam cu elji mini lji am vigljeat sh-lji am apãrat tu numa tsi nj-ai datã. Vãrã di elji nu ari chirut, di cãt mash hiljilu a chireariljei tra si mplinea Scritura. 13Sh-tora mini ma yin la tini shi li grescu aesti tu lumi, tsi elji s-u aibã haraua a mea ntreagã tu nãshi. 14Mini lã am datã a-lor zborlu a tãu sh-lumea lji ari auratã, cã elji nu suntu dit lumi, ashã cum sh-mini nu escu di lumi. 15Mini nu caftu tsi tini s-lji ljeai dit lumi, ma tsi s-lji veglji di arãulu. 16Elji nu suntu a lumiljei, ashã cum sh-mini nu escu a lumiljei. 17Sãmtsea-lji atselji tu alihea a ta. Zborlu a tãu easti alihea. 18Ashã cum tini mi pitricushi tu lumi, tutashã sh-mini lji pitricui elji tu lumi. 19Sh-trã itia a lor mi sãmtsãscu, tsi sh-elji s-hibã sãmtsãsits tu alihea.
Isusul s-Roagã trã Tuts Pistimenjlji
20Tora mini nu mi rog mash di elji, ma sh-trã atselji tsi va s-pistipseascã tu mini prit zborlu a lor, 21tsi tuts s-hibã unã, ashã cum tini, Pãrinte, eshti tu mini shi mini tu tini. Elji s-hibã unã tu noi, sh-lumea s-pistipseascã cã tini mi pitricushi. 22Sh-mini lã am datã a lor mãrirea tsi tini nji ai datã, tsi elji s-hibã unã, ashã cum noi him unã. 23Mini escu tu elji sh-tini tu mini, tra s-hibã ntreagã tu unã. Atumtsea lumea va s-cunoascã tsi tini mi pitricushi shi lji vrushi atselji, ashã cum mi vrushi sh-mini.
24Pãrinte, mini voi tsi aclo iu escu mini, s-hibã cu mini sh-atselji tsi nji ai datã, tra s-veadã mãrirea a mea tsi tini nji ai datã, cã tini mi vrushi ma nãinti di thimiljiusirea a lumiljei. 25Pãrinte ndreptu, lumea nu ti ari cunuscut, iarã mini ti am cunuscut, sh-aeshti shtiu cã tini mi ai pitricut. 26Sh-am faptã cunuscut numa a ta sh-va u-facã cunuscut tsi vrearea, cu cai tini mi vrushi mini s-hibã tu elji shi mini tu elji.”
Currently Selected:
Ioan 17: BLRR
Highlight
Copy
Compare
Share
Want to have your highlights saved across all your devices? Sign up or sign in
