رومیوں 2

خُدا دی عدالت

1اِیں واسطے اے اِلزام لاوݨ آلے، تُوں جیہڑا کوئی وی ہونویں تیڈے کولھ کوئی بہانہ نئیں۔ کیوں جو جڈاں تُوں ڈُوجھے اُتے اِلزام لیندیں تے خود اُوہو کم کریندیں تاں اِینویں آپنڑے آپ کُوں مُجرم بنڑیندیں۔ 2اساں جانڑدے ہیں جو خُدا ایجھے کم کرݨ آلے دی عدالت حق دے مطابق کریندے۔ 3اے اِنسان! تُوں جیہڑا ایجھے کم کرݨ آلیاں اُتے اِلزام لیندیں تے خود اُوہو کم کریندیں، کیا ایہ سمجھدیں جو تُوں خُدا دی عدالت کنُوں بچ ویسیں؟ 4کیا تُوں خُدا دی مہربانی، برداشت تے صبر کُوں نا چیز سمجھدیں؟ تے کیا ایہ نئیں جانڑدا جو خُدا تیکُوں توبہ کرݨ دو گِھن ونجنڑ کیتے تیڈے اُتے مہربانی کریندے؟ 5پر تُوں آپنڑے سخت تے توبہ نہ کرݨ آلے دل دے سببّوں خُدا دے غضب دے ڈینہہ کیتےآپنڑے کیتے غضب جمع کریندا پِیا ہیں، جڈاں خُدا دا سچا اِنصاف ظاہر تھیسی۔ 6او ”ہر بندے کُوں اُوندے اعمال دے مطابق بدلہ ڈیسی#زبُور 62‏:12۔ امثال 24‏:12۔۔“ 7جیہڑے نیک کماں ءچ قائم رہ تے جلال، عزت تے ختم نہ تھیوݨ آلی زندگی دے طالب ہِن اُنہاں کُوں خُدا ہمیشاں دی زندگی ڈیسی۔ 8پر جیہڑے خود غرض ہِن تے سچائی کُوں چھوڑ تے بُرائی دے پِچُھوں چلدے ہِن اُنہاں اُتے قہر تے عذاب نازل تھیسی۔ 9ہر اِنسان اُتے جیہڑا بُرائی کریندے، مُصیبت تے پریشانی آسی، پہلے یہُودی اُتے ولا غیریہُودی اُتے۔ 10پر ہر اُوں بندے کُوں جیہڑا نیکی کریندے جلال، عزت تے سکون مِلسی، پہلے یہُودی کُوں ولا غیریہُودی کُوں۔ 11کیوں جو خُدا کہیں دی طرفداری نئیں کریندا۔

12جیہڑے لوکاں کُوں شریعت نئیں مِلی تے گُناہ کریندے ہِن، او شریعت دے بغیر ہلاک تھیسن تے او جِنہاں کولھ شریعت ہے تے گُناہ کریندے ہِن، اُنہاں کُوں شریعت دے مطابق سزا مِلسی۔ 13کیوں جو شریعت کُوں سُنڑݨ آلے خُدا دی نِگاہ ءچ راستباز نئیں ہوندے بلکہ شریعت اُتے عمل کرݨ آلے ای راستباز کھڑائے ویسن۔ 14ہا، او قوماں جِنہاں کولھ شریعت نئیں جڈاں او فطرتی طور تے شریعت دے مطابق کم کریندیاں ہِن تاں شریعت نہ ہوندے ہوئے وی او خود آپنڑے کیتے ہِک شریعت ہِن۔ 15او ایہ ظاہر کریندے ہِن جو شریعت دے حُکم اُنہاں دے دِلاں اُتے لِکھے ہوئے ہِن تے اُنہاں دا ضمیر وی اِیں گالھ دی گواہی ڈیندے، کیوں جو اُنہاں دے خیال کہیں ویلے اُنہاں اُتے اِلزام لیندن تے کہیں ویلے اُنہاں کُوں بےقصُور آدھن۔ 16ایہ اُوں ڈینہہ تھیسی جڈاں خُدا یسُوع مسیح دے وسیلے اِنساناں دیاں لُکیاں ہوئیاں گالھیں دا اِنصاف کریسی جِینویں مَیں خوشخبری سُنڑیندا ہاں۔

یہُودی تے شریعت

17پر جے تُوں یہُودی اکھویندیں تے شریعت اُتے بھروسا کریندیں تے خُدا اُتے فخر کریندیں، 18تے اُوندی مرضی جانڑدیں تے شریعت دی تعلیم گِھن تے چنگے گالھیں پسند کریندیں، 19تے جے تیکُوں اِیں گالھ اُتے وی یقین ہے جو تُوں اندھیاں دا راہنما تے اندھاریاں ءچ راہنڑ آلیاں کیتے روشنی ہیں، 20تے احمقاں کُوں سِکھاوݨ آلا تے بالاں دا اُستاد ہیں کیوں جو تیڈے کولھ شریعت ءچ علم تے حق دا نمونہ ہے، 21تاں وَل تُوں جیہڑا بئیاں کُوں سکھیندیں، آپنڑے آپ کُوں کیوں نئیں سکھیندا؟ تُوں جیہڑا وعظ کریندیں جو چوری نہ کر، خود کیوں چوری کریندیں؟ 22تُوں جیہڑا آدھیں جو زِنا نہ کر، خود کیوں زِنا کریندیں؟ تُوں جیہڑا بُتاں کنُوں نفرت کریندیں، خود بُت خانیاں کُوں کیوں لُٹ گِھندیں؟ 23تُوں جیہڑا شریعت اُتے فخر کریندیں، خود کیوں شریعت دی نافرمانی کر تے خُدا دی بے عزتی کریندیں؟ 24اِیہو وجہ ہے جو پاک کلام ءچ لِکھیا ہے جو ”تُہاڈی وجہ کنُوں غیر قوماں ءچ خُدا دے ناں دی توہین کیتی ویندی ہے#یسعیاہ 52‏:5۔ ۔“

25 ختنہ دا فائدہ تاں ہے پر شرط ایہ ہے جو تُوں شریعت اُتے عمل کریں۔ پر جے تُوں شریعت دی نافرمانی کریندیں تاں تُوں اُنہاں دے برابر ہیں جیہڑے ختنہ نئیں کریندے۔ 26جے او بندہ جِیندا ختنہ نہ تھیّا ہووے، شریعت دے حُکماں اُتے عمل کریندے تاں کیا او ختنہ تھئے ہوئے لوکاں دے برابر نہ سمجھیا ویسی؟ 27بلکہ کیا او جِیندا ختنہ نہ تھیّا ہووے پر شریعت اُتے عمل کریندے، تیکُوں جِیندا ختنہ تھیّا تے جیندے کولھ شریعت ہے، پر اُوندے اُتے عمل نئیں کریندا، قصُوروار نہ کھڑیسی؟ 28کیوں جو او بندہ یہُودی نئیں جیہڑا ظاہری طور تے ہووے تے نہ ای او ختنہ ہے جیہڑا ظاہری تے جِسمانی ہے۔ 29بلکہ یہُودی اُوہو ہے جیہڑا دِلی طور تے یہُودی ہے تے ختنہ اُوہو ہے جیہڑا دل دا تے رُوحانی ہے نہ جو لِکھے ہوئے حُکم دا۔ ایجھے اِنسان دی تعریف آدمیاں دی طرفوں نئیں بلکہ خُدا دی طرفوں ہوندی ہے۔

Currently Selected:

رومیوں 2: SKRV

Highlight

Copy

Compare